¹ Ua faaiu le fetalaiga o Iesu, ona tuua lea e ia o Kalilaia, ua oo atu i le itumalo o Iutaia i tala atu o le vaitafe o Ioritana. ² Ua mulimuli atu iā te ia le motu o tagata e toatele, ma na ia faamaloloina i ai latou. ³ Ua ō mai foi le au faresaio ia te ia, e tofotofo ia te ia, ua faapea mai ia te ia, “E taga ea i le tulafono ona faatea e le tane lana avā i so o se mea? ⁴ Ua tali atu Iesu, ua faapea atu, Tou te lei faitaulia ea o lē na faia i latou talu le amataga, na ia faia i latou o le tane ma le fafine? ⁵ Na fetalai mai foi Lē na faia i laua, ʻO le mea lea e tuua ai e le tane lona tamā ma lona tinā, ae faatasi ma lana avā, ona avea ai lea o i laua ma tino e tasi. ⁶ E lē toe toalua foi i laua, a o le tino e tasi. O le mea lea, o mea ua faatasia e le Atua, aua nei tatalaina e se tasi.” ⁷ Ona fai mai lea o i latou ia te ia, “Se a foi le mea na poloai mai ai Mose ia te i matou ia avatu le tusi faatea ma tuumuli ia te ia? ⁸ Ua fetalai atu foi o ia ia te i latou, ‘Ona o lo outou loto maaa, na tuu mai ai e Mose outou e faatea a outou avā, ae e lei faapea talu mai le amataga. ⁹ Ou te fai atu foi ia te outou, o sē faatea i lana avā, se‘i vaganā ai le faitaaga, ma fai avā i se tasi, ua mulilua o ia." ¹⁰ Ona fai atu lea o le au soo ia Iesu, "Afai e faapea le tane ma lana ava, e le lelei ona faaipoipo." ¹¹ A ua fetalai atu Iesu ia te i latou, “E lē mafai e tagata uma ona talia lenei upu, ua na o ē ua foaiina atu i ai. ¹² Ae e iai fo‘i eunuka na fa‘aeunukaina e tagata, ma e iai foi o eunuka na fa‘aeunukaina i latou lava ona o le malo o le lagi. O lē e mafai ona talia lenei aoaoga, ia talia e ia.” ¹³ Ona aumai ai lea o tamaiti iti ia te ia, ina ia faaee atu ona aao i luga ia te i latou ma tatalo, a ua vavao atu le au soo ia te i latou. ¹⁴ A ua fetalai atu Iesu, “Tu‘u mai ia o tamaiti, aua foi le vavao ia te i latou e o mai ia te a‘u, auā e faapenā e i latou le malo o le lagi.” ¹⁵ Ua ia tuu atu ona aao i luga o tamaiti, ona alu ese ai lea o ia mai lea mea. ¹⁶ Faauta foi, ua sau le tagata ia Iesu ma fai mai, “Le Aoao e, o le ā le mea lelei e tatau ona ou faia, ina ia ou maua ai le ola e fa‘avavau? ¹⁷ Ua fetalai atu Iesu ia te ia, “Aisea le mea e te fesili mai ai ia te a‘u i le mea e lelei? E na o le toatasi lava e lelei, ae afai e te fia ulu atu i le ola, ia e tausi i poloaiga.” ¹⁸ Ua fai mai le tagata ia te ia, "O le a le poloaiga?" Na fetalai Iesu, “Aua e te fasioti tagata, aua le mulilua, aua e te gaoi, aua e te molimau pepelo, ¹⁹ ia e ava i lou tama ma lou tina, ma ia e alofa atu i le lua te tuaoi ia pei o oe lava ia te oe.” ²⁰ Ua fai atu le taulealea ia te ia, “‘Ua ou anaana i nei mea uma, o le ā se mea ou te mana‘omia? ²¹ Ua fetalai atu Iesu ia te ia, “ Afai e te manao ia atoatoa outou, alu ia ma faatau atu au mea, ma avatu ai i ē matitiva, ona e maua ai lea o le oloa i le lagi; ²² Ae ina ua faalogo le taulealea i le fetalaiga a Iesu, ona alu ese ai lea o ia ma le faanoanoa, auā e tele ana meatotino/oloa. ²³ Ua fetalai atu Iesu i ona so‘o, “E moni, ou te fai atu ia te outou, e faigatā ona sao atu le mauoa i le malo o le lagi. ²⁴ Ua ou toe fai atu foi, e faigofie i le kamela ona ofi atu i le pu o le nila nai lo le mauoa ona sao atu i le malo o le Atua.” ²⁵ Ua faalogo ai le au soo, ona matuā ofo ai lea o i latou ma fai ane, “O ai foi e mafai ona faaolaina?” ²⁶ Ua silasila atu Iesu ia te i latou, ma fetalai atu, “E lē mafaia e tagata, a e mafaia e le Atua mea uma lava.” ²⁷ Ona tali atu lea o Peteru, ua faapea mai ia te ia, Faauta, ua matou tuua mea uma, a ua matou mulimuli atu ia te oe. O le a la se mea matou te maua? ²⁸ Ua fetalai atu Iesu ia te i latou, “E moni, ou te fai atu ia te outou, i le tausaga fou e tietie ai le Atalii o le Tagata i lona nofoali‘i mamalu, e nonofo foi outou o ē mulimuli mai ia te a‘u i nofoalii e sefulu ma le lua, ma faamasino i ituaiga e sefulu ma le lua o Isaraelu. ²⁹ O i latou uma e tuua fale, uso, tuafafine, tamā, tinā, fanau, po o fanua ona o lo‘u igoa, o le a faaselauina pe fa‘asili ona maua, ae faapea foi ona fai mo latou tofi le ola e faavavau. ³⁰ Ae e toatele o ē e muamua e avea o le a mulimuli, ma o ē e mulimuli e avea ma muamua.