¹ O le taimi lea na o mai ai le au soo ia Iesu ma fai mai, "O ai e sili i le malo o le lagi?" ² Ua valaau atu Iesu i le tamaitiiti, ua faatuina o ia i totonu ia‘ te i latou, ³ ma fetalai atu, “E moni, ou te fai atu ia te outou, a le liua outou ma pei o tama iti, tou te lē sao lava i le malo o le lagi. ⁴ O lenei, so o se tasi e faamaulalo o ia e ia e pei o lenei tamaitiiti, e sili o ia i le malo o le lagi. ⁵ O lē na te talia se tamaitiiti faapenei i lo‘u igoa, ua na talia a‘u. ⁶ A o sē faaseseina se tasi o i latou nei e faatauvaa o ē faatuatua mai ia te a‘u, e lelei ia te ia pe a nonoa se maa tele i lona ua, ma ia goto i le moana loloto. ⁷ Oi talofa i le lalolagi ona o mea e tausuai ai. Aua e oo mai lava mea e tausuai ai e ao ai, a e ui lava ilea, oi talofa ilea tagata e oo mai ai le mea e tausuai ai. ⁸ Afai e te tausuai i lou lima po o lou vae, ina tipi ese ia ma lafo ese ai. E lelei ona e sao i le ola ma le pipili, nai lo le lafoina i le afi e faavavau ma lima e lua ma vae e lua. ⁹ Afai e te tausuai i lou mata, ia sali ese ma lafoai mai ia te oe. E lelei ona e sao i le ola ma le mata e tasi, ae leaga pe a lafoina oe i le afi i Kena ma ou mata e lua. ^{10 11} Ia outou aua nei inoino i se tasi o i latou nei e faatauvaa. Auā ou te fai atu ia te outou, o lo‘o vaavaai atu pea a latou agelu i fofoga o lo‘u Tamā o i le lagi. ¹² Ae o le a lou manatu? ‘Afai e i ai se tasi e i ai mamoe e selau, ae se le tasi o i latou, pe na te lē tuua ea le ivagafulu ma le iva i luga o le mauga e saili i lē na sē? ¹³ A maua e ia, e moni, ou te fai atu ia te outou, e sili lona olioli i lea mea, nai lo le ivagafulu ma le iva e lei se. ¹⁴ E faapea foi, e lē finagalo lo outou Tamā o i le lagi ia fano se tasi o i latou nei e faatauvaa. ¹⁵ Afai e agasala lou uso ia te oe, alu e aoai ia te ia, i le va na o oe ma ia. Afai e faalogo mai o ia ia te oe, o le a e maua ai lou uso. ¹⁶ Ae afai e lē faalogo mai o ia ia te outou, ia outou ō ma se isi pe toalua, ina ia faamaonia ai upu uma i le mau a le toalua po o le toatolu. ¹⁷ Afai foi e musu o ia e faalogo ia i latou, ia e ta‘u atu i le ekalesia. Afai foi e musu o ia e faalogo i le ekalesia, ia avea o ia ma tagata faapaupau ma ao lafoga. ¹⁸ O le upu moni lava ou te tau atu ia te outou, o mea uma tou te fusifusia i le lalolagi, e faamauina lea i le lagi; ¹⁹ E moni, ou te toe fai atu ia te outou, afai e loto gatasi se toalua o outou i le lalolagi i so o se mea la te ole mai ai, e faia lava mo i laua e lo‘u Tamā o i le lagi. ²⁰ Auā o le mea e potopoto ai se toalua po o se toatolu i lo‘u igoa, ou te i ai ia te i latou.” ²¹ Ona alu atu lea o Peteru ma fai mai ia Iesu, “Le Alii e, e agaleaga mai faafia lo‘u uso ia te a‘u ma ou faamāgalo atu ia te ia? ²² Ona fetalai atu lea o Iesu ia te ia, Ou te le fai atu ia te oe faafitu, a ia fitugafulu ni fitu. ²³ O le mea lea e tutusa ai le malo o le lagi ma le tasi tupu na manao e faamauina tupe i ana auauna. ²⁴ A o amata ona ia totogi atu, ua aumaia ia te ia le auauna e toatasi o lē na aitalafu ia te ia i taleni e sefulu afe. ²⁵ Ae talu ai ua leai se mea e toe totogi atu ai, ona poloai atu lea o lona matai ia faatau atu o ia, ma lana avā ma lana fanau, ma ana mea uma, ma ia totogi atu. ²⁶ Ona faapaū ai lea o le auauna, ua ifo ia te ia, ua faapea atu, ‘Le Alii e, ia e onosai mai ia te a‘u, ona ou totogi atu ai lea ia te oe o mea uma lava. ²⁷ Ona mutimutivale ai lea o le alofa o le matai o lea auauna, ua faasaolotoina o ia ma faamāgalo lana aitalafu. ²⁸ A ua alu atu lea auauna ma maua ai le tasi o ona uso a auauna, ua aitalafu ia te ia o tenari e selau. Ona tago atu lea o ia ia te ia, ua amata ona fetinaiina o ia, ma faapea atu, 'Ia e totogi mai ia te au lau aitalafu.' ²⁹ Ona faapau ai lea o lona uso a auauna ma aioi mai ia te ia, ua faapea atu, ‘‘Ia e onosai mai ia te a‘u, ou te taui atu au mea uma. ³⁰ Ae sa musu le auauna muamua. Na alu o ia ma lafo ma tuu ia te ia i le falepuipui seia toe totogi atu ana mea. ³¹ Ina ua iloa e ona uso a auauna le mea ua tupu, ona matuā faanoanoa ai lea o i latou. Na latou ō mai ma tau atu i lo latou matai mea uma na tutupu. ³² Ona valaau atu lea o le matai o lenā auauna ia te ia, ua faapea atu , "Le auauna leaga e, ua ou faamagaloina au aitalafu uma ina ua e aioi mai ia te a‘u. ³³ Pe e lē tatau ea ona e alofa i lou uso a auauna, faapei ona ou alofa mutimutivale ia te oe? ³⁴ Na ita lona matai ma tuuina atu o ia i tagata sauā seia oo ina ia totogi uma ana aitalafu. ³⁵ E faapea foi ona faia e lo‘u Tamā o i le lagi ia te outou, pe afai tou te lē fa‘amagaloina ma le loto i lo outou uso.”