¹ Ua ō atu ai lea o le au faresaio ma le au satukaio, ua latou tofotofo ia te ia, e manana'o e fa'aali ia te i latou se faailoga mai le lagi. ² Ua tali atu Iesu ma faapea atu, " E o'o loa le afiafi ona outou faimai lea, ua laofie; ona ua mūmū mai le lagi. ³ A o‘o i le taeao, ‘ona ‘outou fai ane ai lea, ‘E leaga le tau; auā ua mūmū le lagi ma ua puaoa.' ‘Ua e iloa fa‘amatala foliga o le lagi, ‘ae lē mafai ‘ona ‘e fa‘amatala fa‘ailoga o le taimi. ⁴ O le tupulaga leaga ma le mulilulua ua saʻili ifaailoga, ‘ae leai se fa‘ailoga e avatu ‘iā te ia, tau lava o le fa‘ailoga o Iona.” ‘Ona tu‘ua lea e Iesu o i latou ma alu ‘ese. ⁵ ‘Ua o‘o atu le ‘au so‘o i le isi itū, ‘ua galo ‘iā te i latou ‘ona ‘ave areto. ⁶ ‘Ua fetalai atu Iesu ‘iā te i latou, “Ia outou va'ava'ai ma faaeteete i le au faresaio ma le au Satukaio.” ⁷ Ua fetautalatalaʻi le ʻausoo, ma ua faapea ane, “E mafua ona ua matou le aveina areto.” ⁸ ‘Ua silafia e Iesu lenei mea, ‘ona fetalai atu lea o ia, “O ‘outou o ē fa‘atuatua itiiti, se a le mea tou te felafolafoai ai ma faapea ane ona ua outou le ave areto? ⁹ Tou te lē malamalama ‘ea? Ua outou le manatua ea areto e lima mo le lima afe, ma le fia o ato na outou aoina? ¹⁰ Po o areto e fitu mo le fā afe, e fia fo‘i ‘ato na ‘outou fa‘aputuina? ¹¹ Se a ‘ea le mea tou te lē malamalama ai, ‘ou te le‘i tautala atu ‘iā te ‘outou i le areto? ‘Ia ‘outou va'ava'ai ma fa‘aeteete i le ‘au faresaio ma le ‘au Satukaio.” ¹² ‘Ona latou iloa ai lea e le‘i fetalai atu o ia ‘iā te i latou ‘i mea fa‘afefete i areto; ae ia faaeteete i le aoaoga a le au faresaio ma le au Satukaio. ¹³ ‘Ua o‘o atu Iesu i nu‘u e lata ane i Kaisareia Filipo, ‘ona fesili atu lea o ia i ona so‘o, ‘ua fa‘apea atu, e fai mai ea tagata, o ai ea le Atalii o le tagata?” ‘Ua fai mai i latou, ¹⁴ “‘Ua fai mai isi o Ioane le Papatiso; o isi o Elia; a o isi o Ieremia, po o se tasi o le ‘au perofeta.” ¹⁵ ‘Ua fetalai atu o ia ‘iā te i latou, “O ai a'u ia te outou?” ¹⁶ Ua tali atu Simona Peteru, ua faapea atu, “O oe o le Keriso, o le Alo o le Atua soifua”. ¹⁷ ‘Ua tali atu Iesu, ‘ua fa‘apea atu ‘iā te ia, “‘Amu‘ia oe Simona le atali‘i o Iona, auā e lē o le tino ma le toto na fa‘aali atu ai ‘iā te oe, a o lo‘u Tamā o i le lagi. ¹⁸ ‘Ou te fai atu fo‘i ‘iā te oe, o Peteru oe, ‘ou te ati a‘e fo‘i la‘u ekalesia i luga o lenei papa. E lē manumalo foʻi faitotoʻa o Seoli iā te ia. ¹⁹ Ou te avatu iā te oe ki o le malo o le lagi. O mea uma e te fusifusia i le lalolagi e fusifusia foʻi i le lagi, o se mea foi tou te tatalaina i le lalolagi, e tatalaina foi lea i le lagi”. ²⁰ ‘Ona vavao atu lea o Iesu i ona so‘o, ‘aua ne‘i ta‘u atu i se tasi o ia o le Keriso. ²¹ 21 Talu mai lenā taimi, ua fetalai atu ai Iesu i ona so‘o e tatau ‘ona alu o ia i Ierusalema, ‘ia mafatia i mea e tele i lima o toeaina, ma le ‘au ositaulaga sili, ma le ‘au tusi‘upu, ‘ia fasiotia, ma toe fa‘atūina mai i le aso tolu. ²² ‘Ona ta‘ita‘i lea e Peteru o ia ma vavao ‘iā te ia, ‘ua fa‘apea atu, “Ia mamao lenei mea ia te oe, le Alii e! ²³ A ‘ua faliu Iesu ma fetalai atu ‘iā Peteru, “Satani e, alu ia oe i o‘u tua! O oe o le mea e tautevateva ai aʻu, auā e te lē mafaufau i mea a le Atua, a o mea a tagata.” ²⁴ ‘Ona fetalai atu lea o Iesu i ona so‘o, “‘Āfai se tasi e fia mulimuli mai ‘iā te a‘u, e tatau ‘ona fa‘afiti o ia o ia lava, ma ‘ave lona satauro, ma mulimuli mai ‘iā te a‘u. ²⁵ Auā o lē e fia fa‘asaoina lona ola, e māumau ai ia; a o lē fa‘amaumau lona ola ‘ona o a‘u, e maua e ia. ²⁶ Auā o le ā le aogā i le tagata pe ‘āfai na te maua le lalolagi uma, ‘ae maumau ai lona ola? O le a se mea e mafai ona avatu e se tagata e sui ai lona ola? ²⁷ Auā e sau le Atali‘i o le Tagata fa‘atasi ma ana agelu i le mamalu o lona Tamā. Ona ia tauia lea o tagata taitoatasi e tusa ma ana galuega. ²⁸ O le ‘upu moni ‘ou te ta‘u atu ‘iā te ‘outou, o lo‘o tutū mai ‘i‘inei nisi o ‘outou e lē oo i le oti se‘ia va‘ai atu i le Atali‘i o le Tagata e sau i lona mālō.”