¹ O le taimi lenā, na faalogo ai Herota le pule o le malo i le tala iā Iesu. ² Ua fai atu o ia i ana auauna, “O Ioane le Papatiso lenei, ua toetū mai o ia nai ē ‘ua oti. O le mea lea o loo galue ai nei mana ia te ia.” ³ Auā na pu‘eina e Herota Ioane, ma saisai ia te ia, ma tuu i le fale puipui ona o Herotia le avā a Filipo lona uso. ⁴ Auā na fai atu Ioane ia te ia, “E sa i le tulafono ona fai oia ma au avā.” ⁵ Na manao Herota e fasioti ia te ia, a ua fefe o ia i le nuu, auā o lo latou taofi/manatu o ia o le perofeta. ⁶ Ae ina ua oo i le aso e faamanatu ai le aso fanau o Herota, ona saasaa/siva ai lea o le tama teine a Herotia i totonu ma faafiafiaina ai Herota. ⁷ Ua tali mai o ia, ona tautō ai lea o ia na te avatu ia te ia so o se mea e manao ai o ia. ⁸ Ua uma ona faatonuina e lona tinā, ona fai atu lea o ia, Aumai ia te a‘u iinei, i luga o le tanoa, le ulu o Ioane le Papatiso. ⁹ Ua tiga le tupu ona o lana augani/talosaga, ae ona o lana tautoga ma i latou uma sa aai faatasi ma ia, na ia poloai atu ai ia faia. ¹⁰ Na ia auina atu ai lea e ia se tasi, ua vavae ese le ulu o Ioane i le falepuipui. ¹¹ Ona aumai ai lea o lona ulu i luga o le tanoa, ma avatu i le teine, ua na aveina atu e ia i lona tina. ¹² Ona ō mai lea o ona so‘o, ua ave le tino ma tanu. Ua mavae ia mea, ona latou ō ai lea ma ta‘u atu ia Iesu. ¹³ Ua fa‘afofoga Iesu i lenei mea, ona maliu ese ai lea o ia i le vaa i le mea tuufua. Ua fa‘alogo i ai le motu o tagata, ona latou mulimuli atu ai lea ia te ia mai lea aai. ¹⁴ Ona maliu atu lea o Iesu i o latou luma, ua silafia foi e ia le motu o tagata e toatele. Ona mutimutivale ai lea o lona alofa ia i latou ma ua faamalolo foi e ia o latou maʻi. ¹⁵ Ua oo i le afiafi, ona ō mai ai lea o ona soo ia te ia, ua faapea mai, “O le mea tuufua lenei, ma ua leva foi le aso. Ia e tuuina atu le motu o tagata, ina ia latou o atu i aai e faatau ai ni meaai mo i latou.” ¹⁶ A ua fetalai atu Iesu ia te i latou, “E lē tatau ona ō ese i latou. ¹⁷ Ia outou avatu ne meaai mo latou. Ua latou fai mai ia te ia, “E na o le lima areto ma i‘a e lua ua ia te i matou nei.” ¹⁸ Ua fetalai atu Iesu, "Aumaia iinei ia te au.” ¹⁹ Ona fai atu lea o Iesu i le motu o tagata e nonofo i lalo i le mutia. Ua tago o ia i areto e lima ma i‘a e lua. Ua tepa ae o ia i le lagi, ua fa‘afetai ma tofitofi areto ma avatu i le au soo, ona tufa atu ai lea e le au soo i le motu o tagata. ²⁰ Ua aai uma i latou ma ua maoona. Ona tago ai lea o i latou i mea na totoe, o ato e sefulu ma le lua ua tutumu. ²¹ O ē na aai pe tusa ma le lima afe o tane, e lei faitaulia ai fafine ma tamaiti. ²² Ona fai atu loa lea o ia i ona so‘o e ō i luga o le va‘a ma muamua atu ia te ia i le isi itu, a o tu‘uina atu e ia le motu o tagata e ō. ²³ Ua tu‘uina atu e ia le motu o tagata e ō, ona maliu a‘e lea o ia na o ia i le mauga e tatalo. Ina ua oo i le afiafi, ua na o ia sa iai i lea mea. ²⁴ A ua mamao le vaa mai i uta, ua felafoaiina e peau, auā ua agi mai i luma le matagi. ²⁵ Na faalatalata au Iesu ia i latou, i le leoleoga lona fā o le pō, ua savali i luga o le vai. ²⁶ Ua iloa atu e le au soo o ia o savali i luga o le vai, ona atuatuvale ai lea o i latou, ua faapea ane, “O le aitu,” ona latou alalaga lea i le matatau. ²⁷ A ua fetalai atu Iesu ia te i latou, “‘Ia outou lototetele, o a‘u lava, aua tou te matatau.” ²⁸ Ua tali mai Peteru ia te ia, ua faapea atu, Le Alii e, afai o oe, ia e fetalai mai ia te au ou te alu atu ia te oe i luga o le vai. ²⁹ Ua fetalai atu Iesu, “Inā sau ia.” Ona alu ese ai lea o Peteru mai le vaa ma savali i luga o le vai e alu atu ia Iesu. ³⁰ Ae peitai, ina ua vaai atu Peteru i le matagi malosi, ona fefe ai lea o ia. Ua amata ona magoto, ona alaga atu lea o ia, “Le Alii e, ia e laveai mai ia te a‘u!” ³¹ Ona aapa atu loa lea e Iesu o lona aao, ua tago atu ia Peteru, ma fetalai atu ia te ia, “O oe lē faatuatua itiiti, se a le mea ua e masalosalo ai?” ³² Ua ō atu Iesu ma Peteru i le vaa, ona mālū ai lea o le matagi. ³³ Ona ifo atu lea o le au soo i le va‘a ia Iesu, ua faapea mai, “E moni, o oe lava o le Alo o le Atua.” ³⁴ Ua latou sopoia atu le tasi itu, ona oo lea i uta i Kenesareta. ³⁵ Ua iloa e tagata o i lea nofoaga Iesu, ona latou aauina atu lea o feau i nuu uma, ma aumai ia te ia o ē mama‘i uma ³⁶ lava. Ua aioi mai i latou ia te ia ina ia latou pai atu tau lava o le pito o lona ofu, ona malolo ai lea o i latou uma na pa‘i atu i ai.