¹ Ua uma ona fa'atonu e Iesu ona au so'o e toasefulu ma le lua, ua alu ese foi o ia mai i lea mea e aoao ma lauga atu i o latou aai. ² Ua fa'alogo foi Ioane mai totonu o le falepuipui i galuega a Keriso, ua ia ave foi le feau e ala atu i ona so'o ³ ma fai atu ia te ia "o oe ea lea ua sau pe matou te vaavaai i se isi? ⁴ Ua tali mai foi Iesu ma fai atu ia te i latou, "ina o ma ta'u atu ia Ioane o mea ua outou vaai ma fa'alogo i ai. ⁵ O tauaso ua pupula, o pipili ua savavali, o lepela ua fa'amamaina, o tagata tutuli ua toe faalogo, ua toe tutu mai foi e na oti, ma ua talai atu le tatalelei i ē matitiva. ⁶ E manuia lē e lē tautevateva ona o au." ⁷ Ua o foi so'o i lo latou ala, ua fetalai atu foi Iesu i le motu o tagata e uiga ia Ioane, "O lea le mea na outou ō atu ai i le toafa e matamata o se lau(ofe) ua luluina e le matagi? ⁸ A o lea le mea na outou ō atu ai e matamata, o le tagata ua laei i ie malu? E moni, o e laei i ie malu e nonofo i le maota o le tupu. ⁹ Ae o le a le mea na outou o atu e matamata, o le perofeta? Ioe oute fai atu ia te outou, e sili atu o ia i le perofeta. ¹⁰ O ia lea sa tusia mai ai, "Vaai, oute auina atu le avefeau i o outou luma, na te tapenaina(teuteua) le ala i ou luma.' ¹¹ E moni oute fai atu ia te outou, o e na fanau mai i fafine, e leai se isi na tula'i mai e sili atu ia Ioane le papatiso. Ae peitai, o lē aupito itiiti i le malo o le lagi, e sili atu o ia ia te ia. ¹² Talu mai ona po o Ioane le papatiso e oo mai nei ona po, o le malo o le lagi ua afaina i sauaga, ma o tagata sauā o lo'o latou ave ma le fa'amalosi. ¹³ Auā o perofeta uma ma tulafono 'ua vavalo seia oo mai ia Ioane, ¹⁴ afai tou te taliaina, o ia lava o Elia na tu'u e sau. ¹⁵ O se ua iai taliga ina faalogo ia. ¹⁶ O le ā se mea e fa'atusatusa ai lenei tupulaga? E fa'apei o tamaiti e nonofo i nofoaga lautele ma valaau atu i isi tagata, ¹⁷ ma fai atu 'sa ili(tata) le faili mo outou ae tou te lei sisiva. Na matou fa'anoanoa ae tou tē lei fetagisi. ¹⁸ Auā na sau Ioane e lei 'ai o ia i le areto ma inu i le uaina, a ua latou fai mai, 'o ia te ia le temoni.' ¹⁹ O le Atali'i o le Tagata ua sau ua ai ma inu, a ua latou faimai, 'vaai, o le tagata ai tele ma le onā, o le uo o le ao lafoga ma ē agasala!.' Ae o le poto e tauamiotonuina ai ana galuega." ²⁰ Ua amata e Iesu ona ta'uleagaina aai na faatino ai le tele o vavega, ona o le lē salamo. ²¹ "Oi talofa ia te oe Koasini! Oi talofa ia te oe Petesaita! pe ana faia vavega i Turo ma Saitonu o vavega na faia ia te outou, po ua leva ona salamo i le ie talatala ma le lefulefu. ²² Ae oute fai atu ia te outou, e feoloolo Turo ma Saitonu i le aso o le fa'amasino i lo outou. ²³ O oe Kapanaumi, e te manatu ea e fa'aeaina oe i le lagi? E leai, e ave ifo oe i Seoli. Aua ana fai i Sotoma vavega ua faia ia te oe, po ua tumau ai e oo mai i le aso nei. ²⁴ Ae oute fai atu ia te oe, e faigofie le nuu o Sotoma i le aso fa'amasino i lo o oe." ²⁵ O lea lava taimi, ua fetalai atu Iesu, “‘Ou te vivi‘i atu ‘iā te oe, lo‘u Tamā e, o le Ali‘i o le lagi ma le lalolagi, auā na e nanā ia mea mai i ē popoto ma ē atamamai, a ‘ua e fa‘aali atu i tamaiti laiti. ²⁶ Ioe, lo'u tamā, auā o mea ia e mālie i ou fofoga. ²⁷ O mea uma ua e tu'uina mai ia te au lo'u tamā; e leai se tasi na te iloa le Atali'i ua na o le Tamā, e leai foi se tasi na te iloa le Tamā ua na o le Atali'i ma so'o se tasi ua filifili le atali'i e fa'aali i ai. ²⁸ Ina o mai ia ia te au o e galulue ma le tiga, ma mafatia i avega mamafa; oute avatu foi ia te oe le malologa. ²⁹ Ia e ave lo'u amo ma fa'a'aoao mai ia te au, auā o a'u o le agamalu ma le loto maualalo, ona maua ai lea e outou le malologa mo outou agaga. ³⁰ O lou amo foi e avegofie ma lau avega foi e mama ia."