¹ Mulimuli ane ua malaga faataamilo Iesu i aai ma nuu eseese, e tala'i ma lauga atu le talalelei i le malo o le Atua. Sa ia te Ia le sefululua, ² faapea ma fafine na faamaloloina mai ma'i ma faasaolotoina mai agaga leaga: O Maria le na ta'ua o le Makatala, o le e to'afitu temoni na tutuli mai ai i fafo, ³ O Ioana le ava a Kusa, ta'ita'i 'au a Herota, o Susana, faapea ma nisi na faasaolotoina mai i o latou noanoataga, ma i latou na tali o latou mana'o ⁴ Ina ua potopoto mai le motu o tagata, o tagata ua o mai ia te Ia mai lea aai i lea aai, ona ia faamatala atu lea o se faataoto. ⁵ "Na alu se fai faatoaga e lulu ana fatu. Na ia lulu ma pa'u nisi i tafatafa o le auala ma soli ai e vae, ma o mai manulele mai le vanimonimo ma latou aina. ⁶ Na pa'u nisi i luga o papa, e le'i leva ona tutupu mai ae toe mamate, ona o le matutu. ⁷ Na pa'u nisi i le vao tuitui, ona tutupu faatasi lea o le vao tuitui ma laau, peita'i ua fetineia'i ma le vao tuitui. ⁸ Ae pa'u nisi i le eleele lelei ma ua tupu mai le laau e ta'i selau ona fua lelei" Ina ua uma ona fai atu Iesu i ia mea, ona ia faapea atu lea "O ai e i ai taliga e faalogo ai, ina faalogo mai ia" ⁹ Ona fesili lea o ona soo ia te Ia po o le a le uiga o lea faataoto. ¹⁰ Ua Ia tali mai, "Ua faaali atu ia te outou le iloa o mea lilo o le malo o le Atua, ae mo isi tagata oute tautala atu i ai i faataoto, ina ia latou vaai ae latou te le o iloa, e latou te faalogo ae latou te le o malamalama". ¹¹ O le uiga lenei o le faataoto: O le fatu o le upu a le Atua. ¹² O fatu na pa'u i tafatafa o le auala o i latou ia na faalogo, ae sau le tiapolo ma aveese le upu mai o latou loto, ina ia aua ne'i o latou talitonu ma faaolaina ai i latou. ¹³ O fatu na pa'u i le papa o i latou ia a faalogo i le upu, ua latou talia ma le olioli, peita'i e le nofomau le upu, ua latou talitonu i ai mo sina taimi, ae ua latou toe o ese ina ua tofotofina i latou. ¹⁴ O le fatu na pa'u i vao tuitui o tagata ia na faalogo i le upu, ae a'o alu la latou savaliga, ona faalavelaveina lea o i latou i mea fai, o le 'oa ma mea faafiafia o lenei olaga, ma ua le matutua ai fua o o latou olaga. ¹⁵ Ae o le fatu na pa'u i le eleele lelei, o i latou ia na faalogo i le upu ma le faamaoni ma le lelei o o latou loto, ua latou taofi mau i ai, ma fua mai ona o le onosa'i i tiga. ¹⁶ "E leai se tasi na te tutu se moli ma ufiufi i se apa faaofuofu pe tuu fo'i i lalo o se moega. Ae peita'i na te tuu i luga o le tuugamoli ina ia iloa uma atu e i latou e ulufale mai le moli. ¹⁷ E leai se mea e natia e le faailoaina, e leai fo'i se mea lilo e le iloa ma oo i ai le malamalama ¹⁸ Ia faalogo lelei mai, mo le e tele ana mea e toe avatu ia te ia isi mea, a'o le e leai se mea, e oo lava i mea e manatu o ia te ia e aveesea mai ia te ia. ¹⁹ Ua o mai ia te Ia o lona tina ma ona uso, ae ua le maua atu so latou avanoa ia te Ia ona o le tumutumu o tagata. ²⁰ Ona ta'u atu le ia te Ia, "O lo o i fafo lou tina ma ou uso, o lo o mananao e fia vaai ia te oe". ²¹ A ua tali atu Iesu ia te i latou, "O lo'u tina ma o'u uso o i latou e faalogo i le Upu a le Atua ma fai." ²² O se tasi o aso na o ai o Ia ma ona soo i le vaa, ona Ia fai atu lea ia te i latou, "Ina tatou o atu ia i le tasi itu o le vai" Ona alu atu lea o le latou vaa. ²³ A o alu la latou malaga a ua moe o Ia. Ona agi mai lea o se matagi malosi i le vai, ma ua faatumulia le vaa i le vai, ma ua tauau ina faaletonu i latou. ²⁴ Ua o mai soo o Iesu ma fafagu ia te Ia ma faapea atu, "Le Alii e!, le Alii e! ona nofo mai lea o Ia i luga ma Ia taofi i le matagi faapea le malosi mai o le vai, ona taofia ai lea, ma ua maua se malu. ²⁵ Ona Ia fai atu lea ia te'i latou, "O fea lo outou faatuatua?". A ua fefefe i latou ma tau fai ofo, ma faapea ane le tasi i le tasi, "O ai ea lenei, ua oo i le matagi ma le vai ua ia faatonu, ma usita'i mai ia te Ia?" ²⁶ Ua latou malaga atu i aai o Katara, e faafesaga'i ma le vai i Kalilaia. ²⁷ Ina ua tu laueleele Iesu, ae faafetaia'i mai o Ia e se tagata mai lea aai o lo o ulufia e temoni. Ua tele aso o fealua'i telenoa o ia ma ua le nofo fo'i i lona aiga, ae ua mau o ia i le mea o i ai tuugamau. ²⁸ Ina ua ia iloa atu Iesu, ona alaga mai lea o ia ma faapa'u fao i ona luma, ma ia valaau mai ma le leo tele, "Iesu le Atalii o le Atua Silisili Ese, o le a le mea ua e sau ai ia te a'u? Oute ai'oi atu ia te oe, aua e te faatiga mai ia te a'u". ²⁹ A ua faatonu e Iesu le agaga leaga e sau i fafo ma ia. E tele ina osofa'i e lea agaga o ia, ma e ui ina taumafai e fusifusia o ia i loka ma filifili uamea e taofia ai o ia, ae motusi e ia o ia loka ma filifili u'amea, ona ave faamalosia ai lea o ia e temoni i le vao. ³⁰ Ua fesili atu Iesu ia te ia, "O ai lou igoa?" Ua tali mai o ia "O Lekeono", e toatele temoni ua ulufale ia te ia. ³¹ Ona latou matua ai'oi mai lea ia te Ia e aua ne'i tutuli atu ia i latou i le vanu. ³² Sa i ai se lafu puaa tele o lo o fafagaina i se eleele maualuga. Ua ai'oi mai temoni ia te Ia, ina ia tutuli atu i latou i totonu o puaa, ona ia faataga atu lea o i latou. ³³ Ona o mai lea i fafo o temoni mai lea tagata ma o i totonu o puaa, ona taufetuli lea o le lafu puaa ma ua feosofi atu i le vai ma malelemo ai i latou. ³⁴ Na faate'ia i latou na fafagaina puaa i le mea na tupu, ona tammo'e atu ai lea o i latou ma ta'u atu lenei mea i le aai, faapea ma nuu o lata ane ³⁵ Ona o mai lea o tagata e matamata i le mea na tupu, ma latou tau mai ia Iesu ma le tagata na tuli mai ai i fafo temoni. O lo o nofo o ia i lalo ifo o vae o Iesu, ua fai ona lavalava ma ua toe lelei lona mafaufau, ona tupu ai lea o le fefe ia i latou. ³⁶ Ua faamatala atu e i latou na molimau i le faamaloloina o le tagata na ulufia e temoni. ³⁷ Ona ai'oi mai lea o tagata mai aai o Katara ia Iesu ina ia alu ese ma latou, ona ua matua ufitia i latou i le fefe tele. Ona alu ane lea o Iesu i le vaa ma toe fo'i atu. ³⁸ A ua faataunau o Ia e le na tutuli ese mai ai temoni ina ia latou o ma ia, ae ua taofi o ia e Iesu ma faapea atu ³⁹ "Ia e toe fo'i atu i lou aiga ma e ta'u uma mea na faia e le Atua mo oe." Ona alu lea o ia, ua ia tala'i atu i le aai atoa le mea na faia e Iesu mo ia. ⁴⁰ Ina ua toe fo'i mai Iesu, na faafeiloa'i o Ia e le motu o tagata aua sa latou faatalitali ia te Ia. ⁴¹ Ae peita'i o le tagata e igoa ia Iairo, o ia o se tasi o ta'ita'i i le sunako, ua sau o ia ma faapa'u fao i vae o Iesu, ma ia ai'oi atu ia te Ia e alu ane i lona fale, ⁴² Ona o lona afafine e toatasi pe tusa i le sefululua ona tausaga, ua tali oti o ia. Ona alu ane lea o Iesu, ae ua lolofi mai ia te Ia le motu o tagata e toatele. ⁴³ Sa i ai se fafine ua sefululua tausaga o maua o ia i le puna toto, ma ua le maua se togafitiga mo ia. ⁴⁴ Ua taamilo mai o ia i tua o Iesu ma pa'i ane i le pito o lona ofu, ona faafuase'i lea ona taofia le puna o lona toto. ⁴⁵ Ua fai ane Iesu, "O ai lea na pa'i mai ia te a'u?". E leai se isi na tali mai, ona faapea mai lea o Peteru, "Le Alii e, e toatele le motu o tagata o lo o lolofi mai ma pa'i atu ia te oe. ⁴⁶ 46. A ua tali atu Iesu, "E i ai le tagata na pa'i mai ia te a'u, ona na ou lagona ua alu atu le mana mai ia te a'u". ⁴⁷ Na iloa e le fafine e i'u ina faailoa lava o ia, ona sau lea o ia ma le fefe ua faapa'u fao i ona luma. I le tumutumu o tagata, ae ua ia faailoa atu le mafuaaga na ia pa'i atu ai ia te Ia, ma ia faailoa fo'i le faafuase'i ona malolo o lona ma'i. ⁴⁸ Ona Ia fai atu lea ia te ia, "Afafine, o lou faatuatua ua e malolo ai. Alu ia oe ma le filemu". ⁴⁹ A o tautala o ia, a ua sau se tasi mai le fale o le ta'ita'i i le sunako ma fai mai, "Ua oti lou afafine, aua e te toe faalavelave atu i le a'oa'o". ⁵⁰ A ua lagona mai e Iesu le faamatalaga lea, ona Ia fai atu lea ia Iairo, "Aua e te fefe, ae na'o lou talitonu mai pea, ona malolo ai lea o ia." ⁵¹ Ua oo atu o Ia i le fale, ona ia taofia lea o i latou uma i fafo, ae ulufale atu na'o Ia ma Peteru ma Ioane ma Iakopo, ma le tama o le teineititi faapea ma lona tina. ⁵² O i latou na i le fale o lo o tagi aue ma tagitu'i i latou, a ua ia fai atu ia te'i latou, "Aua tou te fetagisi, e le o oti o ia o lo o moe. ⁵³ A ua aamu mai i latou, aua ua latou iloa ua oti le teineititi. ⁵⁴ A ua tago atu o ia i lona lima ma Ia valaau atu faapea, "La'u pele, nofo mai i luga!" ⁵⁵ Ua toe fo'i mai lona agaga ia te ia, ona tu mai lea o ia i luga. Ua Ia faatonu atu i latou ina ia avane sana meaai. ⁵⁶ Ua matua ofo ona matua, a ua taofi atu e Ia i la'ua ia aua ne'i ta'u atu lenei mea i se isi.