¹ O'u uso e, aua nei toatele outou e avea ma a'oa'o, auā ua outou iloa o i tatou o e a'oa'o atu, e sili atu ona faamasinoina o i tatou. Auā e tele mea e tautevateva ai i tatou. ² Afai e e lē tautevateva se tasi i upu, o ia o le tagata ua sa'o atoatoa, ua mafaia foi ona taofi i lona tino uma. ³ Faauta, afai tatou te avane faagutu i gutu o solofanua ina ia latou usiusita'i mai ia te i tatou, e mafai foi ona tatou liliu i o latou tino uma. ⁴ Faauta mai foi i vaa, e ui lava ina tetelē ma faalelea e matagi malolosi, e liua i le foeuli itiiti lava ile mea e manao i ai le tautai. ⁵ E faapea foi i le laulaufaiva, o le mea itiiti lea, a ua lafo upu faasili. Faauta o le afi itiiti e mu ai le vao matua (laau) tele. ⁶ O le laulaufaiva o le afi foi lea, o le faupuega o amio leaga. O le laulaufaiva e leaga ai le tino uma, e faamuina le olaga nei uma lava; e faamuina foi lena mai Kēna. ⁷ Auā e mafai e le poto o le tagata ona faalataina, ua uma foi ona faalataina o itu aiga taitasi o manu feai, o manu felelei, o mea fetolofi ma mea ola i le sami. ⁸ Ae peitai e le mafai e se tagata ona faalata i le laulaufaiva. O le mea leaga e le mataofia, ua tumu i le mea oona e oti ai. ⁹ O lea ua tatou vivii ai i le Atua le Tamā, o lea foi ua tatou fetuu ai i tagata, ua faia e foliga i le Atua. ¹⁰ E luai mai i le gutu e tasi le vivii ma le fetuu. O'u uso e, e le tusa ona faia faapea o na mea. ¹¹ E puna mai ea i le gutu e tasi o le vaipuna le vai suamalie ma le vai oona? ¹² O'u uso e, e fuga mai ea e le mati se olive? po o le vine, se mati? E le mafai foi e se vai oona ona puna mai ai se vai magalo. ¹³ O ai se outou ua poto ma ua malamalama? Ina faaali mai ia e ia ai le amio lelei o ana lava galuega i le agamalu o i ai le poto. ¹⁴ Ae afai o ia te outou le finau leaga ma le misa i o outou loto, soia le mitamita, aua foi le pepelo e faaleaga ai le upu moni. ¹⁵ E le o le poto lenei ua alu ifo mai lugā; a o la le lalolagi ia, o le mea faaletino, o le faatemoni ia. ¹⁶ Auā o le mea e i ai le loto leaga ma le manatu faapito, e i ai le lē mautonu ma fa'atinoga leaga uma. ¹⁷ A o le poto mai luga e muamua ona mamā, i le ua filemu, e agamalu, e faautauta, e tumu i le alofa ma fua lelei, e lē alofa faapito, e le faatagā fai. ¹⁸ Ua luluina foi fua o le amiotonu ma le filemu e i latou o e faatupuina le filemu.