¹ Ao o outou foi lava, o e na oti i amio leaga ma agasala, ² na outou savavali ai anamua, e tusa ma ala o lenei lalolagi. Na outou nonofo ma le ta'ita'i o le au faipule ile vanimonimo o le agaga lea o loo matuā galue nei i e ua faalogogata. ³ O i tatou foi, na amio faatasi i tatou uma lava ma i latou anamua, ina ua tatou nonofo i tuinanau a o tatou tino, na faia foi e i tatou o mea na loto i ai le tino atoa ma le mafaufau. Na fanau mai foi i tatou o le fanauga a le toasa, faapei o isi atoa foi. ⁴ A o le Atua, ua i ai le faulai o le alofa, ona o lona lava alofa tele na ia alofa mai ai ia i tatou. ⁵ A o oti lava i tatou i amio leaga, ua na faaola mai ia i tatou faatasi ma Keriso - o le alofa tunoa ua faaolaina ai i tatou. ⁶ Ua na toe faatutu faatasi mai foi, ma faanofonofo faatasi i tatou ma Keriso Iesu i mea o i le lagi, ⁷ ina ia faaalia i tupulaga atali le silisili ese o le faulai o lona alofa tunoa, i le agalelei mai ia te i tatou ia Keriso Iesu. ⁸ Auā o le alofa tunoa ua faaolaina ai outou i le faatuatua; e le mai ia te outou foi lea, a o le meaalofa ua foaiina mai e le Atua; ⁹ e le ona o galuega, ina nei mitamita se tasi. ¹⁰ Auā o i tatou o lana lava galuega, na faia i tatou ia Keriso Iesu, ina ia faia galuega lelei, na saunia anamua e le Atua, ina ia tatou savavali ai. ¹¹ O lenei, ia outou manatua, sa pei outou o tagata o nuu ese i la le tino. Na ta'ua outou o e le peritomeina e i latou ua ta'ua o ē peritomeina, o le peritomeina lea ua faia e lima ile tino. ¹² O ona po ia, sa tuueseeseina outou mai ia Keriso, sa tagata ese outou i le nuu o Isaraelu, o tagata ese foi i feagaiga ua i ai le mea na folafolaina, sa leai se faamoemoe ae sa leai foi le Atua i le lalolagi. ¹³ Ao lenei ona o Keriso Iesu, sa outou vava mamao mai anamua ua faalatalataina mai ai i le toto o Keriso. ¹⁴ Auā o ia lava o lo tatou filemu/leleiga, ua na faia ia tasi e sa faalua, na na soloia foi le pa vaeloto o le feitagai sa vaeluaina. ¹⁵ Aua ua ia faaumatia foi i lona lava tino le tulafono i poloaiga ma faatonuga; ina ia liliu e ia lava lea toalua ia fai ma tagata fou e tasi,ia tupu ai le leleiga. ¹⁶ Na faaleleia e Keriso e sa toalua i le tino e tasi ona o le satuaro ina ua faaumatia ai le feitagai. ¹⁷ Na maliu mai Iesu e folafola mai le tala lelei o le filemu/leleiga ia te outou sa vava mamao atoa ma e ua latalata. ¹⁸ O Iesu le auala e ulufale atu ai i le Agaga e toatasi ma le Tamā. ¹⁹ O lenei, e le toe tagata ese outou, po o e ua āumau. A ua nuu faatasi ma le au paia, o le aiga foi o le Atua. ²⁰ O loo ua atiina ae i luga o le faavae o le au aposetolo, atoa ma le au perofeta, o Keriso Iesu foi o ia o le maatulimanu. ²¹ Ua faatatauina ia te ia le fale atoa, o loo alu ae, ina ia fai ma malumalu paia i le Alii. ²² O outou foi, ua atiina ae faatasi outou ia te ia e fai ma afioaga o le Atua i le Agaga.