¹ Ua oo fo'i Feso i lona itu malo, ua mavae aso e tolu, ona alu ae lea o ia nai Kaisareia i Ierusalema. ² Ua aumaia fo'i e ositaulaga sili ma alii o Iutaia moliaga e fa'asaga ia Paulo, ³ ua aioi atu ia te ia ina ia alofa mai i mea o ia Paulo, ia aami atu ia te ia e sau i Ierusalema, auā ua lamalama i latou ina ia fasioti ia te ia i le ala. ⁴ A ua tali mai Feso o Paulo o lo'o nofo vaavaaia i Kaisareia, e le o toe mamao ona alu atu lea o ia iai. O le mea lea, ua ia faapea atu ai ia te i latou ⁵ "Outou uma o e mafai ona o ifo, ia o fa'atasi ma i matou. Afai o i ai se mea ua sese ai lenei tagata, ona outou molia ai lea o ia. ⁶ Ua nofo Feso ma i latou e le sili atu ma le sefulu aso, ona alu ifo lea o ia i Kaisareia. O le taeao na soso'o ai, ua nofo ai o ia i le nofoa faamasino ma poloaina ia taitaiina mai Paulo ia te ia. ⁷ Ina ua taunuu o ia, ona vagavagai ai lea o Iutaia e na omai mai Ierusalema, ua latou molia foi Paulo i moliaga se tele ma le mamafa latou te le mafaia ona faamaonia. ⁸ Ua finau atu foi o Paulo mo ia ua faapea atu, "Ua ou lē agasala lava i le tulafono a Iutaia, po o le malumalu po o Kaisara." ⁹ A o Feso, ua loto o ia e faafiafia i tagata Iutaia, ua fai mai o ia ia Paulo, ua faapea mai, " Ua e loto ea ina e alu ae i Ierusalema, ia faamasionina ai oe i o'u luma? ¹⁰ Ona fai mai lea o Paulo, "Ou te tu i luma o le nofoa faamasino o Kaisara, le mea e tatau ona faamasinoina ai o a'u. Ua ou le faia se mea le tonu ia Iutaia, ua e matuā silafia lava. ¹¹ Auā afai ua ou le faia se mea ua le tonu ma ua ou faia se mea e tatau ai le oti, ou te le musu lava ou te oti ai. Ae afai e le moni a latou moliaga, e le mafaia ona tuuina atu a'u e se tasi ia te i latou. Ou te valaau ia Kaisara." ¹² Ina ua uma ona fetautalatalaa'i Feso ma lē pule, ona tali mai lea o ia, "Ua e valaau ia Kaisara, O Kaisara lava e te alu i ai!." ¹³ Ua mavae nai aso, ona o mai ai lea o le tupu o Akeripa ma Perenike i Kaisareia e faafeiloa'i aloaia Feso. ¹⁴ Ua tele aso o nonofo ai i laua, ona faailoa atu lea e Feso le tupu le tala ia Paulo, ua faapea atu, "E i ai se tasi tagata ua tuu e Filiki o se pagota. ¹⁵ A'o ou i ai i Ierusalem, na molia mai ai ia te a'u e le au faitaulaga sili ma toeaiina o Iutaia, sa faatoga mai foi ia faasala ia te ia. ¹⁶ Ona ou tali atu ai lea ia te i latou, e le o se tu a Roma le tuuina atu se tagata ia oti ae le'i fesagai le ua molia ma e na molia o ia, ma tuuina i ai se avanoa e finau ai o ia i moliaga e faasaga ia te ia. ¹⁷ Ua oo mai foi i latou iinei, ou te le'i faatuai lava, ua ou nofo i le nofoa faamasino i le taeao lava, ma faatonuina ina ia taitaiina mai lea tagata. ¹⁸ Ua tutu mai i latou e na molia o ia, ua lē molimau mai e i latou se mea na ou manatu ua leaga ai o ia, ¹⁹ a ua molia o ia e i latou i feeseeseaiga i la latou tapuaiga, ma le tasi tagata e igoa ia Iesu ua oti, a ua fai mai Paulo ua ola o ia. ²⁰ Ua ou le mautonu pe faapefea ona suesueina lenei mataupu, ona ou fesili atu lea ia te ia, pe ua loto e alu atu i Ierusalema ia faamasino ai o ia i ia mea. ²¹ A ua tatalo atu Paulo ina ia taofia o ia ina ia faamasinoina e Aokuso, ona ou faatonuina atu lea ia leoleoina o ia, seia ou auina atu o ia ia Kaisara. ²² Ona fai atu lea o Akeripa ia Feso, "Ou te fia faalogo atu foi a'u i lena tagata." "A taeao," ua faapea atu ai Feso, "e te faalogologo ai ia te ia." ²³ O le aso na soso'o ai, na omai ai Akeripa ma Perenike ma le faalialia tele, ua ulufale i le maota atoa ma alii fitafia, atoa ai ma alii o le aai. Ona faatonu atu lea o Feso, ona taitaiina mai ai lea o Paulo. ²⁴ Ona fai atu lea o Feso, Le tupu e Akeripa, atoa ma outou alii uma o tatou o faatasi nei, ua outou silasila mai i lenei tagata, ua aioi mai ai ia te a'u le nuu uma o Iutaia i Ierusalema atoa foi ma iinei, ua alalaga mai e le tatau ona toe ola ia. ²⁵ A'o a'u ou te leiloa se mea ua na faia e tatau ai le oti, ua valaau foi e ia nei lava ia Aokuso, ua ou manatu ai e momoli atu o ia ia te ia i Roma. ²⁶ Aepeita'i, ua le ia te a'u se moliaga patino ou te tusi atu ai i le alii. O le mea lea ua ou taitai mai ai ia te ia i o outou luma, aemaise oe lena le tupu Akeripa, ina ia ou maua se mea e tusi atu ai, pe a uma ona faamasinoina. ²⁷ Auā e le tusa i lo'u manatu ona momoli atu o se tagata o fusifusia, ae le faailoa atu o moliaga e faasaga ia te ia.