¹ Uso e, ma tamā, faafofoga/faalogo mai i lau tali atu nei ia te outou. ² Ina ua faalogo le motu o tagata o tautala atu Paulo ia i latou i le gagana Eperu, sa latou filemu. Na ia faapea atu, ³ O a'u lava o le tagata Iutaia, na ou fanau i Taso i Kilikia. Sa aoaoina au e tusa ma ala sa'o o le tulafono a o tatou tamā. Ou te maelega mo le Atua, e pei lava o outou uma aso nei. ⁴ Na ou saua atu i lenei lotu ina ia oti i latou sa ou fusifusia ma tuuina atu i fale puipui o tane atoa ma fafine, ⁵ e pei ona molimau mai foi ia te au nei e le faitaulaga sili, atoa ma toeaina uma, sa ou maua mai ai foi tusi i le au uso, ma ou alu atu i Tamaseko e fusifusi i e o iai, ma taitai mai ia te i latou i Ierusalmea ina ia faasalaina i latou. ⁶ Ao ou malaga ma ua latalata atu i Tamaseko, o le tutonu o le la ua faafuasei ai ona pupula faataaliolio mai ia te au o le malamalama tele mai le lagi. ⁷ Ona ou paū lea i lalo ile eleele, ma ou faalogo atu i le siufofoga ua faapea mai ia te au, Saulo, Saulo e, se a le mea ua e saua mai ai ia te a'u? ⁸ Ona ou tali atu lea, Le Alii e, o ai ea oe? Ua fetalai mai o ia ia te au. O a'u lava o Iesu le Nasareta ua e saua mai i ai. ⁹ O ē na iai fa‘atasi ma a‘u, ua vaaia le malamalama, ae lei malamalama i latou i le si‘ufofoga o lē na fetalai mai iā te au. ¹⁰ Na ou fai atu, Le Alii e, se a se mea ou te faia? Ua fetalai mai le Alii iā te au, Inā tulai ia ma alu i Tamaseko. O i inā e tau atu ai iā te oe mea uma ua tofia mo oe e fai. ¹¹ Na lē mafai ona ou vaai ona o le pupula o lenā malamalama, ma ua taitaiina foi a'u e i latou na matou faatasi, ona ou oo mai ai lea i Tamaseko. ¹² O i inā na ou feiloa‘i ai ma le tagata e igoa iā Anania, o le tagata amio Atua e tusa ma le tulafono, ma ta‘uleleia e tagata Iutaia uma sa nonofo ai. ¹³ Na sau o ia iā te a‘u, ua tu mai iā te a‘u, ma fai mai, Saulo le uso e, ia e pupula. I lena lava itula na ou vaai ai ia te ia. ¹⁴ Na fai mai foi o ia, Ua tofia oe e le Atua o tatou tamā ia e iloa lona finagalo ma e vaaia lē Amiotonu, ma ia faalogo i lona siufofoga. ¹⁵ Auā e fai oe māna molimau i tagata uma lava i ia mea na e vaaia ma e faalogo i ai. ¹⁶ O lenei foi, se a le mea e te faatuai ai? Tulai ia, ma ia papatisoina oe, ma ia fufulueseina au agasala i lou valaau i le suafa o le Alii. ¹⁷ Ua ou toe fo‘i mai i Ierusalema, a o ‘ou tatalo i le malumalu, na o‘o mai ai iā te a‘u le fa‘aaliga. ¹⁸ Na ou iloa foi o ia ua fetalai mai iā te a‘u, ‘Ia vave ona tu‘ua Ierusalema, auā latou te lē talia lau mau iā te a‘u. ¹⁹ Ona ou fai atu lea, Le Alii e, ua iloa lava e i latou sa ou masani na tuu i falepuipui ma sasa i lea sunako ma lea sunako i e faatuatua ia te oe; ²⁰ Ina ua faamasaaina le toto o Setefano o lau molimau, sa ou tu ai foi ma malie faatasi mai latou, ma sa ou leoleo i ofu o e na fasioti ia te ia.. ²¹ Ona fetalai mai lea o ia ia te au, Alu atu ia, auā o a'u, ou te auina atu oe i nuu ese e mamao. ²² Ua latou faalogo iā te ia seia oo i lea upu. Ona latou leo ​​tetele ai lea, ma ua faapea mai, ‘Ia ave ese le tagata faapenā i le lalolagi, auā e lē tatau ona ola o ia.” ²³ A o latou alalaga, ma lafo ese o latou ofu, ma lafo le efuefu i le ea, ²⁴ ona poloaʻi atu lea o le taitai au sili ina ia taitaiina Paulo i le olo. Ua poloai atu foi o ia ina ia suesue ma sasa ia te ia, ina ia ona iloa ai le mafuaaga ua latou alalaga e faasagatau atu ai ia te ia fa‘apenā. ²⁵ Ua saisai foi o ia e i latou i nonoa, ona fai atu lea o Paulo i le taitai au o le toaselau o loo tu mai, “Pe e taga ‘ea i le tulafono ona outou sasa i le tagata Roma e le‘i fa‘amasinoina?” ²⁶ Ua faalogo ai le taitai au, ona alu atu lea o ia i le taitai au sili, ma tau atu iā te ia, “Se a le mea e te faia? auā o le tagata Roma lea.” ²⁷ Ua sau foi le taitai au sili, ua faapea mai iā te ia, “Ta‘u mai ia iā te a‘u, o oe o se tagatānuu o Roma?” Fai mai Paulo, "Ioe." ²⁸ Ua tali mai le taitai au sili, “Na o le tele o tupe na ou maua ai le tofi o le nu‘u.” Ae fai mai Paulo, ²⁹ "Na ou fanau mai o se tagatanuu o Roma." Ona ō ese loa lea o tagata o ē na fia fesili iā te ia. Ua fefe foi le taitai au sili, ina ua iloa o Paulo o le tagata Roma o ia, auā ua ia saisai iā te ia. ³⁰ O le aso na sosoo ai, na fia iloa lelei ai e le taitai au sili e uiga i tuuaʻiga a tagata Iutaia iā Paulo. O lea na ia tatalaina ai ona noanoataga ma poloai atu i le aufaitaulaga sili ma le aufono uma e latou te feiloai. Ona ia ave ifo lea o Paulo ma tuu i o latou luma.