¹ Ina ua oo i le aso Penetekoso, na i ai i latou uma ma le loto gatasi i le nofoaga e tasi. ² Ae faafuase'i lea o le taalili mai o se leo e pei o le sau o se matagi tele mai le lagi, ona faatumulia ai lea o le fale i le mea o latou potopoto ai. ³ Ona vaaia lea e i latou o laulaufaiva e pei o afi ua vaevaeina ma nofo i luga taitoatasi o i latou. ⁴ Ona faatumuina lea o i latou uma i le Agaga Paia ona amata lea ona tautatala mai i latou i gagana eseese, e pei ona foaina mai e le Agaga o le iloa ia te i latou. ⁵ Na i ai i lea mea o Iutaia na aumau i Ierusalema, o tagata o le Atua mai atunuu uma o le lalolagi. ⁶ Ina ua faalogo i latou i lea taalili, ona potopoto mai lea o i latou e toatele ma ua le mautonu i latou, ina ua latou faalogo atu ua taitasi o i latou ma tautala mai i lana gagana. ⁷ Ona ofo tele ai lea o i latou ma latou faapea ane, "Faauta, e le o ni Kalilaia ea i latou uma o lo o tautatala mai? ⁸ Aisea ua matou faalogo atu ai, o lo o taitoatsi ona tautatala mai i latou i a matou gagana?. ⁹ O Patia, ma Metai, ma Elama, ma i latou e o mai i Mesopotamia, ma Iutaia, ma Kapatokia, o Pono ma Asia, ¹⁰ O Ferukia ma Pafulia, o Aikupito ma vaega o Lipua, e sosoo ma Kurene, atoa ma e na asiasi mai Roma, o Iutaia ma e ua liu lotu Iutaia ¹¹ O Kereta ma Arapi, ua matou faalogo atu ua faamatala mai e i latou galuega matautia a le Atua ia matou gagana." ¹² Ua taufaiofo ma faate'ia i latou uma, ona fapea ane lea o le tasi i le tasi, "O le a le uiga o nei mea?". ¹³ Ae ua aamu nisi ma faapea mai, "Ua onana i latou i le uaina fou". ¹⁴ Ua tula'i Peteru ma le to'asefulu ma le tasi, ma ia alaga leotele, ma lauga atu ia i latou, "O outou Iutaia ma i latou uma e o mai i Ierusalema, ia outou iloa lenei mea, ma ia outou faalogo mai i a'u Upu. ¹⁵ E le o onana i latou nei e pei ona outou manatu ai, aua o lea faato'a oo i le itula e iva i le taeao. ¹⁶ A o le mea lenei na valo'ia mai e le perofeta o Ioelu. ¹⁷ "O le a oo mai i aso mulimuli", ua fetalai mai le Atua, "Oute liligi atu lo'u Agaga i luga o tagata uma. E perofeta ane o ou atalii ma ou afafine, e vaai taulelea i faaaliga, ae fai miti toeaiina". ¹⁸ O ia fo'i aso o le a 'Ou liligi ifo ai Lo'u Agaga i luga o auauna uma ma auauna fafine, ma latou perofeta ane. ¹⁹ O le a 'Ou faia vavega i le lagi i luga, ma faailoga i le lalolagi i lalo, toto, afi, atoa ma le asu mafiafia faaniutu. ²⁰ O le a faapouliuligia le la, ma gase toto le masina, a'o le i oo i le aso tele o le toe afio mai o le Alii. ²¹ O i latou uma o e valaau atu i le Suafa o le Alii e faaolaina i latou. ²² O i latou uma o i Isaraelu, faalogo maia i nei Upu ; O Iesu le Nasareta o Ia o le tagata, ua saunia e le Atua mo outou faatasi ma galuega mamana, o vavega ma faailoga na faia e le Atua ia te Ia mo outou, e pei ona outou iloa. ²³ O Ia na auina mai e le Atua e tusa ma lana fuafuaga mamao ma lona silafia atoatoa. A o outou o tagata amio leaga, ua outou fasiotia o Ia e ala i le faasatauroina o Ia. ²⁴ Ae na toe faatuina o Ia e le Atua, ma tatala mai o Ia mai noanoataga o le oti, aua na le mafai e le oti ona taofia o Ia. ²⁵ Aua ua faapea mai Tavita e uiga ia te Ia, "Oute vaai soo pea i le Alii i o'u luma, aua o lo o i lo'u itu taumatau o Ia oute tumau ai. ²⁶ O lea ua olioli ai lo'u loto ma alaga fiafia lo'u laulaufaiva. E faapea fo'i lo'u tino o le a ola ma lona faamoemoe. ²⁷ E te le tuua lo'u agaga i tuugamau, e faapea fo'i ona e le tuua le tagata paia e pala. ²⁸ Ua e faailoa mai ia te a'u ala o le ola, e te faaatoatoaina lo'u fiafia i ou fofoga." ²⁹ Uso e, e talafeagai mo a'u ona ou talanoa atu ia te outou i le faasinomaga o Tavita, aua na oti o ia ma tanumia, ma o lo o i a'i tatou lona tuugamau se'ia oo mai i le aso. ³⁰ O lenei, o ia o se perofeta na folafola i ai e le Atua, na te faanofoina se tasi o ana fanau i lona nofoalii. ³¹ Na ia vaai atu i mea o le a tutupu i le lumana'i, ma ia tautala ai i le toetu mai o Keriso, ma e le i tuulafoa'ia o Ia i tuugamau, e le i oo fo'i se pala i lona tino. ³² O Iesu lea, na toe faatu mai e le Atua, e pei ona sa tatou molimau uma i ai. ³³ O lenei, ua siitia o Ia i le itu taumatau o le Atua, ma Ia talia le Agaga Paia na tauto mai ai le Tama, na Ia liligi fo'i mai e pei ona e vaai ma faalogo i ai. ³⁴ E le i siitia a'e Tavita i le lagi, ae na fai mai o ia, "Na fetalai mai le Alii i lo'u Alii, Nofo i Lo'u itu taumatau, ³⁵ se'ia ou faia ou fili uma ma mea e tuu ai ou vae". ³⁶ O lenei, ia iloa e aiga uma o Isaraelu ua faapea ona siitia e le Atua o Ia e fai ma Alii ma Keriso, o Iesu lea na outou faasatauroina" ³⁷ Ina ua latou faalogo i lea tala, ona ootia ai lea o o latou loto, ma latou faapea atu ia Peteru ma le 'au soo. "Le 'au uso e, o le a se mea matou te faia? ³⁸ Ona fai atu lea o Peteru ia te i latou, "Salamo ma ia papatisoina outou taitoatasi i le Suafa o Iesu Keriso mo le faamagaloina o a outou agasala, ona outou maua lea o le meaaalofa o le Agaga Paia. ³⁹ Aua o le mea na folafolaina mai, e mo outou ma a outou fanau e pei ona valaauina e le Alii lo tatou Atua. ⁴⁰ E tele isi ana upu na ia faamalosi ma faamafanafana ai ia te i latou, ma ia faapea atu, "Ia faaolaina outou mai i lenei tupulaga leaga". ⁴¹ Ona latou talia lea o lana Upu ma papatisoina i latou, ona faaopopo mai ai lea o agaga e toluafe i lea aso. ⁴² Ua latou faamaoni i aoaoga ma le mafutaga ma le 'au aposetolo, e ala i le faia o le faamanatuga i le falaoa atoa ma le tatalo. ⁴³ Ua oo le matata'u i le toataele o i latou, ma ua tele vavega ma faailoga na tutupu na ui mai i aposetolo. ⁴⁴ O i latou uma na talitonu ua latou potopoto mai, ma ua tasi lo latou manatu, ⁴⁵ ma ua latou faatau atu a latou fanua ma meatotino, ona tufatufa atu lea i tagata uma e tusa ma o latou manaoga. ⁴⁶ Ua latou o atu ma le faamaoni i le malumalu ma le faamoemoe e tasi mai lea aso i lea aso. Ua faapea fo'i ona latou tofitofi le falaoa mai lea fale i lea fale, ma latou faasoa faatasi i meaai ma le fiafia ma le agaga lelei. ⁴⁷ Ua latou vivii i le Atua ma alolofa atu i tagata uma, ma o aso uma ua faaopopo e le Alii le numera o i latou e faaolaina.