¹ O'u uso e, matou te mananao ia outou iloa, le uiga o le alofa tunoa o le Atua na foaina atu i ekalesia i Maketonia. ² I le taimi na tetele ai tofotofoga ona o puapuaga, o le maoa'e o lo latou olioli ma le tetele mai o le mativa, na faatupulaia ai le faa'oaina o i latou i le agalelei atu. ³ A oute molimau atu na latou foa'i e tusa ma le mea na oo i ai lo latou mafai, sa latou faapea fo'i ona latou foa'i e sili atu nai lo le mea latou te mafaia, ae na fai lava ma lo latou loto malie. ⁴ Na latou ai'oi mai ma le faatauanau mo se avanoa latou te faatino ai lea tautua i tagata paia o le Atua. ⁵ E le i tupu lenei mea ona o so matou mana'o, ae na mua'i tuuina atu i latou e i latou lava i le Alii, ona faapea ai lea ia i matou ona o le finagalo o le Alii. ⁶ Sa matou ai'oi atu ia Tito, o le na mua'i amatalia lea faamoemoe, ina ia mafai ona ia faamae'aina ia te outou lea galuega o le alofa tunoa. ⁷ A ia faatuputeleina oe i mea uma - i le faatuatua, i le tautala atu i le upu, i le malamalama, atoa ma le filiga i mea uma, faapea lou alofa mo i matou. Ma ia faapea ona mautinoa lou faatinoina lelei o lenei galuega i le alofa tunoa. ⁸ Ua ou fai atu nei mea e le o se faatonuga, a ia tofotofina ai le moni o lou alofa, pe a faatusatusa atu i le naunau o isi tagata. ⁹ Ua e iloa le alofa tunoa o lo tatou Alii o Iesu Keriso. E ui lava o Ia o se tagata tamaoaiga, ae mo lou manuia na Ia avea ai o Ia ma se ua mativa, ina ia mafai i lona mativa ona faatama'o'aigaina oe. ¹⁰ I le mataupu lenei, oute tuuina atu ai se fautuaga e fesoasoani ia te oe. I le tausaga na te'a nei, sa le gata ina e amataina se mea, ae na naunau lou loto e fai. ¹¹ Ia faauma, e pei lava ona i ai lou naunau ma lou loto e fai ai, ia faapea fo'i ona e faamae'aina, i le malosi e te mafaia ai. ¹² Aua afai o lou naunau lea e faatino lea faamoemoe, o se mea lelei ma ta'uleleia. E tatau ona fua i luga i se mea o lo o i le tagata, ae le o se mea e le o ia te Ia. ¹³ E le o se tulaga lenei ina ia fifilemu nisi, ae tigaina oe, e le faia faapena. ¹⁴ Ae o lou tamaoaiga i le taimi nei o le a fesoasoani i lo latou mana'o. Ina ia mafaia fo'i e lo latou tamaoaiga ona fesoasoani mai i lou mana'o, ina ia fea ma tauave faatasi le avega. ¹⁵ E pei ona tusia. "O le tele ana mea e leai ni mea ua totoe ma soona faatauna, ae o le e ititi ana mea e leai se mea e mativa ai o ia." ¹⁶ Ae faafetai i le Atua i lona tuuina i le loto o Tito o le alofa e pei o lo'u loto ia te oe. ¹⁷ E le gata ina ia taliaina la tatou talosaga atu, ae na i ai ma lona naunautaiga i ai. Na sau ia te oe i lona lava loto fuatia ifo. ¹⁸ Ua matou auina atu ia ma le uso o lo o vaai maualuga i ai le tele o ekalesia i lana galuega e ala i le tala'iina o le Talalelei. ¹⁹ E le gata i lea, ae ua filifilia o ia e ekalesia matou te malaga faatasi mo le viiga o le Alii, faapea lo matou loto lelei. ²⁰ O lo o matou taumafai e taofia se avanoa e ono faitio mai ai se tasi i la matou galuega alofa o lo o matou faatinoina. ²¹ Matou te taumafai ina ia matou faia le mea lelei, e le gata i luma o le Atua, a o luma fo'i o tagata. ²² Ua matou auina atu fo'i se isi uso e o ma i latou. Na matou tofotofoina o ia i le tele o mea, ma lo matou mautinoa o ia e famoemoeina i le tele o ni tiute faatino. Ma ua sili atu lona naunau i le taimi nei ona o lona faatuatuaga ia te oe. ²³ A o Tito, o ia o la'u paaga ma lo'u uso i le galuega mo oe. Mo o'u uso, o i latou o ave feau mai i Ekalesia. O i latou o le viiga ia Keriso. ²⁴ Ia faaali atu ia i latou le faamaoniga o lou alofa, ma faaali atu i ekalesia le mafuaaga e ala ai ona matou mitamita ia te oe.