¹ O lenei foi, o i matou o faigaluega faatasi ma ia, ua matou aioi atu ia te outou, aua nei talia fua e outou le alofa tunoa o le Atua. ² Aua ua faapea mai o ia, "O le tausaga e talia ai na ou faalogo ai ia te oe, ae o le aso foi e faaolaina ai na ou fesoasoani ai ia te oe." Faauta o le tausaga lenei e talileleia mai ai. Faauta, o lenei le aso e faaolaina ai. ³ Ua matou le tuuina atu se mea e tasi e tausuai ai, ina nei tauleagaina la matou galuega. ⁴ Ao mea uma lava ua faailoa ai i matou, o auauna a le Atua i matou i le onosai tele, i puapuaga i malaia, i atuatuvale, i le faigata, ⁵ i le sasa, i le tuuina i fale puipui, i faaletaupulea, i galuega mamafa, i po e le mafai ai ona momoe, i le fiaai, ⁶ i le amio mama, i le iloa, i le faapalepale, i le agalelei, i le Agaga Paia, i le alofa moni, ⁷ i le tautala i le upu moni, i le mana o le Atua. Ua iai matou foi auupega o le amiotonu i le itu taumatau atoa ma le itu tauagavale. ⁸ O matou foi e galulue i le viia ma le faaleagaina, i le ta'uleagaina ma le ta'uleleia. ⁹ O loo matou galulue faaleiloga, ua pei a matou feoti, ae peitai-vaai! - o loo matou ola pea e pei na faasala i matou i a matou galuega, ae peitai e lei fasiotia i matou. ¹⁰ Ua matou galulue ma le faanoanoa peitai o loo matou olioli pea, peiseai o e matitiva, ae ua matou faatamaoaigaina le toatele, peiseai e leai se mea iai matou, ae o loo iai matou mea uma. ¹¹ Ua matou matuā tautala atu ia te outou ma le amiotonu, outou Korinito e, ua tatala o matou loto ia te outou. ¹² Ua matou le taofia outou, a ua taofiofi outou i outou lava loto. ¹³ O lea, ou te fai atu ia te outou pei o la'u fanau, ia outou taui mai i lo outou foi loto mataala. ¹⁴ Aua tou te amo faalegatasi ma e le faatuatua. Auā pe faapefea ona faatasi o le amiotonu ma le amio leaga? Pe faapefea foi ona mafuta o le malamalama ma le pouliuli? ¹⁵ Pe faapefea foi ona loto gatasi o Keriso ma Pelialo? Pe faapefea foi ona tofusia faatasi o lē faatuatua ma le ua le faatuatua? ¹⁶ Pe faapefea foi ona feagai le malumalu o le Atua soifua, pei ona fetalai mai o le Atua, "Ou te nofo i totonu ia te i latou, ou te savali foi i totonu ia te i latou; e fai a'u mo latou Atua, e fai foi i latou mo'u tagata." ¹⁷ O lea , " O mai ai outou mai totonu ia te i latou, ma ia outou vavae mai," ua fetalai mai ai le Alii. Aua foi tou te papai atu i se mea leaga; ona ou talia ai lea o outou. ¹⁸ E fai foi a'u mo outou Tamā e fai foi outou mo'u atalii ma o'u afafine, ua fetalai mai ai le Alii e ona le malosi uma lava.