¹ O lenei, le au uso e, e uiga i taimi ma tau, e lē aogā ona tusi atu iā te outou se mea. ² Auā ua outou iloa lelei lava, o le aso o le Alii e o‘o mai e pei o se gaoi i le po. ³ A latou faapea ane, “Ua filemu ma saogalemu,” ona faauafeasei ona oo mai ai lea o le malaia iā te i latou. E pei o le tigā o le fanau mai o le fafine tō/maitaga. E lē mafai lava ona latou sao. ⁴ A o outou, le au uso e, tou te le o i le pouliuli ina ia maua mai ai outou e lea aso, e pei o se gaoi. ⁵ Auā o outou uma o atalii o le malamalama ma atalii o le ao. E le o i tatou o ni atalii o le po/pouliuli po o le pogisa. ⁶ O lenei, aua nei o tatou momoe e pei o isi. A ia o tatou mataala ma faautauta. ⁷ Auā o ē e momoe, e momoe i latou i le po, a o ē onā, e onā foi i latou i le po. ⁸ Ae ona o i tatou o tagata o lea aso, e tatau ona tatou mataala ma oofu i le faatuatua ma le alofa e pei o se ufifatafata, ma le faamoemoe o le faaolataga e fai ma o tatou pulou. ⁹ Auā e lei tofia i tatou e le Atua mo le toasā, a ia maua le fa‘aolataga e ala i lo tatou Alii o Iesu Keriso, ¹⁰ o lē na maliu mo i tatou, ina ia tatou ola fa‘atasi ma ia, pe tatou te mataala pe momoe. ¹¹ O le mea lea, ia fefaamafanafanai ma atiina ae e le tasi le isi, e pei ona outou faia nei. ¹² Le au uso e, matou te matuā aioi atu iā te outou, ia outou tautau atu i latou o ē galulue iā te outou, ma pule iā te outou i le Alii, ma aoaoina outou, ¹³ ma ia faasilisili iā te i latou i le alofa ona o la latou galuega. Ia outou nonofo fefilemuai. ¹⁴ Matou te apoapoa‘i atu foi ‘iā te outou, le au uso e, ia outou apoapoai atu i ē paie, ia fa‘amafanafana atu i ē lotovaivai, ia fesoasoani i ē vaivai, ma ia onosai i tagata uma. ¹⁵ Ia outou faaeteete ina nei taui atu e se tasi le leaga i le leaga i se tasi. ¹⁶ Ao lea, ia tausisi i mea lelei mo le tasi ma tagata uma. Ia olioli e lē aunoa. ¹⁷ Tatalo e lē aunoa. ¹⁸ Ia faafetai i mea uma lava. Auā o le finagalo lea o le Atua iā Keriso Iesu mo outou. ¹⁹ Aua tou te tineia le Agaga. ²⁰ Aua le taufaatauvaa i perofetaga. Ia tofotofo i mea uma. ²¹ Ia taofi mau i le mea lelei. ²² Ia fa‘amamao mai i mea leaga uma lava. ²³ Ia atoatoa ona fa‘apaiaina outou e le Atua o le manuia. Ia tausia lava lo outou agaga, loto, ma lo outou tino atoa ma le lē ponā i le afio mai o lo tatou Ali‘i o Iesu Keriso. ²⁴ E faamaoni lē na valaʻauina outou, o lē na te faia lava. ²⁵ Le au uso e, ia outou tatalo foi mo i matou. ²⁶ Ia alofa atu i le auuso uma i le sogi paia. ²⁷ Ou te poloai atu foi iā te outou i le Alii, ia faitau atu lenei tusi i le au uso uma. ²⁸ Ia iā te outou le alofa tunoa o lo tatou Alii o Iesu Keriso.