¹ O Paulo, o Siluano, ma Timoteo, i le ekalesia i Tesalonia i le Atua le Tamā ma le Alii o Iesu Keriso. Ia ia te outou le alofa tunoa ma le manuia ² Matou te avatu pea le fa‘afetai i le Atua ona o outou uma lava, o loo matou ta‘uta‘ua outou e lē aunoa i a matou tatalo. ³ Matou te manatua i luma o lo tatou Atua le Tamā la ‘outou galuega o le fa‘atuatua, ma le galuega o le alofa, ma le ‘onosa‘i ma le fa‘amoemoe i lo tatou Ali‘i o Iesu Keriso. ⁴ Le au uso ua alofaina e le Atua, ua matou iloa ua filifilia outou e ia, ⁵ auā ua lē oo atu la matou tala lelei iā te outou i le upu, a o le mana fo‘i, ma le Agaga Pa‘ia, ma le mautinoa tele. E fa‘apea foi ona outou iloa le ituaiga tagata na matou i ai iā te outou, ona o ‘outou. ⁶ Na outou fa‘aaoao mai iā te i matou, atoa ma le Alii, ina ua outou talia le upu i le puapuagā tele, ma le olioli mai le Agaga Paia. ⁷ O le mea lea, ua avea ai outou ma fa'aaoao i tagata fa‘atuatua uma i Maketonia ma Akaia. ⁸ Auā ua salalau atu le afioga a le Alii mai iā te outou, e lē gata i Maketonia ma Akaia, a ua salalau atu foi lo outou fa‘atuatua i le Atua i mea uma lava. O le mea lea e le tau fai atu ai se tala e uiga i ia mea. ⁹ Auā o i latou lava, ua iloa ai le tala ia te i matou i le uiga o lo matou oo atu ia te outou na, ma lo outou liliu mai i le Atua mai i tupua e auauna i le Atua soifua ma le moni, ¹⁰ ma ia fa‘atalitali atu i lona Alo mai le lagi, o lē na fa‘atūina mai e ia nai ē ua oti, o Iesu, o lē na te lavea‘iina i tatou ai le to‘asā o le a o‘o mai.