¹ Напомнине ленге те покоринен пес е началствоненгге тай е властиенге, те шунен лен те овен готова секоне лаче делоске, ² тена злословинен никаске, тена овен крамолникия, те овен блага тай те покажинен съвършено кротост карик саворе манушенде. ³ Соскето амеда декана улам неразумна, непокорна, хохавде тай поробиме таро разна страстия тай удоволствия тай като живинасас анди злоба тай завист, улам мразиме, тай мразинасас амен иек аверес. ⁴ Но като явисали и благост е Девлескири, амаро Спасители, тай Лескири любов карик о мануша, ⁵ Ов спасингяс амен ма според о праведна дела, колато аме кергямас, а по Пери милост, чрез о окъпване, демек о неворождение тай о обновяване е Святоне Духоскоро, ⁶ Колес излеингяс обилно упрал аменде чрез о Исуса Христа, амаро Спасители, ⁷ тай, оправдиме чрез Лескири благодат, те ачовас според и надежда, наследникия е вечноне животоске. ⁸ Верно си давка словос. Тай ме мангав те настоявинес упрал далкесте с цел колка, колато повервинде андо Дел, те упражнинен пес старателно андо лаче дела. Давка си лачо тай полезно е манушенге. ⁹ А отбегвине глупава разисквания, родословия, препирни тай чингара относно о закони, соскето он си безполезна тай суетна. ¹⁰ След като съветвинес иек-дуи дрома е манушес, ковато сеинел раздоря, мук лес, ¹¹ като жанес, кай савка мануш извратисало тай съгрешинел, тари коркоро пестар си одъсиме. ¹² Като бичалав жи туте Артема или Тихик, постараине тут те аве паш манде андо Никопол, соскето решингиом оте те презимувинав. ¹³ Погрижине тут те бичалес дроместе е законикиес о Зина тай о Аполос, чука кай нищо тена липсвинел ленге. ¹⁴ Нека сиклон амареда те упражнинен пес старателно анде салке лаче деловиенде, за тена овен безплодна за о посрещане е необходимоне нужденге. ¹⁵ Поздравинен тут саворе, колато си манца, Поздравине колкен, колато дехен амен анди вяра. Благодат те овел саворенца туменца. Амин.