¹ Или нана жанен, пралален ( соскето хоратинав манушенге, колато жанен со си закони), кай о закони владеинел упрал о мануш само жи кай ов си живдо? ² Соскето прандеме ромни си свържиме чрез о закони за ко ром, жи кай си живдо; но като о ром мерел, ой освободинел пес далке закониестар. ³ Тай чука, ако паш ко животос пе ромеске ой пранденел авереске ромеске, ачол блудница; но ако мерел лакоро ром, свободно си далке закониестар тай нана ачол блудница, ако пранденел авере ромеске. ⁴ Тай чука, пралален мере, тумеда мулен спрямо о закони чрез о Христово телос, за те свържинен тумен Авереса, е Възкръсименеса таро муле, за те принесинас плоди е Девлеске. ⁵ Соскето, като улам плътска, о греховна страстия, колато възбудиненас пес чрез о закони, действиненас анде амаре телесноне частиенде, за те принесинас плоди, ковато анел мериба; ⁶ но акана, като мулам за далкеске, ковато икерелас амен, освободисалам таро закони; чука че аме служинас неве духосте, а ма по пурани буква. ⁷ Тогава со? Тен пенас ли, кай о закони си безех? Да не бъде! Но напротив, нанай те пенджарав и безех освен чрез о закони, соскето нанай те пенджарав, кай о пожелание си безех, ако о закони нана пенелас: " Ма пожелавине". ⁸ Но и безех, понеже лилас поводи тари заповед, произведингяс анде манде секакво пожелание; соскето би е закониескоро и безех си мули. ⁹ Меда улом живдо декана би закониескоро, но като али и заповед , и безех оживингяс, а па ме мулом: ¹⁰ тай араклом, кай и самото заповед, която ули назначиме те анел животос, ангяс манге мериба. ¹¹ Соскето и безех, като лилас поводи тари заповед, измамингяс ман тай мударгяс ман чрез лате. ¹² Чука че о закони си свято тай и заповед - свято, праведно тай лачи. ¹³ Тогава, кавка ли, ковато си лачо, ачило мериба манге? Да не бъде! Но и безех причининел манге мериба чрез давка лачо варесо, за те покажинел пес, кай си безех, чука че чрез и заповед и безех те ачол бут грешно. ¹⁴ Соскето жанас, кай о закони си духовно; а па ме синиом тари плът, бикиндо телал и безех. ¹⁵ Соскето нана жанав со те керав; понеже нана керав давка, ковато мангав, но ковка, ковато мразинав, лес керав. ¹⁶ Обаче, ако керав кавка, ковато нана мангав, съгласно синиом е закониеса, кай си лачо. ¹⁷ Далкеске ма ме акана керав давка, но и безех, която живинел анде манде. ¹⁸ Соскето жанав, кай анде манде, демек анди плът мери, нана живинел лачо; понеже желание лачипнаске иси ман; но ма сила те керав лес. ¹⁹ Соскето нана керав о лачипе, ковато мангав; а о зло, ковато нана мангав, лес керав. ²⁰ Но ако керав давка, ковато нана мангав, то вече нана керав лес ме, а и безех, която живинел анде манде. ²¹ Тай чука, аракав анде манде кавка закони, кай паш манде, като мангав те керав лачипе, о зло си паше. ²² Соскето, кити ме андруне естествоске, ме насладинаман андо Божие закони; ²³ но анде ме телесноне частиенде дикав различно закони, ковато воювинел против о закони ме гогякоро тай заробинел ман телал о греховно закони, ковато си ан ме частиенде. ²⁴ Окаяно ме мануш! Кой ка избавинел ман далке телостар е мерибнаскоро? ²⁵ Благодаринав е Девлеске! Иси избавление чрез о Исус Христос, амаро Дел. Тай чука, коркоро ме гогяса служинав е Девлескере закониеса, а е плътяса- е греховноне закониеске.