¹ Тай чука, со ка пенас, кай амаро отеци о Авраам придобингяс по плът? ² Соскето, ако о Авраам оправдисало деловиенца, иси соса те хвалинел пес, само ма англал о Дел. ³ Понеже, со пенел о Писание: " О Авраам повервингяс андо Дел тай давка сменисало леске правдаке." ⁴ А калкеске, ковато керел дела, лескири награда нана считингиол сар благодеяние, а сар дълги; ⁵ а калкеске, ковато на керел дела, а верувинел анде Колкесте, Ковато оправдинел е нечестивонес, лескири вяра сменинел пес леске правдаке. ⁶ Сарто о Давид хоратинел е блаженствоске е манушескоро, каске о Дел сменинел правда независимо таро дела: ⁷ " Блажена колка, каскере беззакония си простиме, каскере безеха си покрита. ⁸ Блажено ковка мануш, колес о Дел нанай те сменинел безех". ⁹ Впрочем, давка блаженство само е обрежименге ли си или е необрежименге? Понеже пенас: " Е Авраамеске и вяра сменисали правдаке". ¹⁰ То сар сменисали леске? Като сине вече обрежиме ли, или още необрежиме? Ма като сине обрежиме, а необрежиме. ¹¹ Тай ов приемингяс о обрязване сар знаки тай печати е правдаке чрез и вяра, която сине лес, като сине необрежиме, за те овел ов отеци саворенге, колато верувинен, макар необрежиме, за те сменинел пес и правда ленгеда, ¹² тай отеци колкенге о обрежиме, колато ма само си обрежиме, но пирен андо стъпкес колке вяраке, която амаро отеци о Авраам исине лес, като сине необрежиме. ¹³ Понеже о обещание карик о Авраам или карик о потомство леске, кай ка овел наследники е светоске, нана диняс пес чрез о закони, а чрез о оправдаване посредством и вяра. ¹⁴ Соскето ако си наследникия калка, колато облегнинен пес ко закони, то и вяра си чучи тай о обещание -осуетено; ¹⁵ понеже о закони анел ма обещание, а гняв; но кате нанай закони, оте нанай престъпление. ¹⁶ Далкеске о наследство си тари вяра, за те овел по благодат, чука че о обещание те овел осигуриме саворе потомствоске, ма само калкеске, ковато облегнинел пес ко закони, но за колкескеда, ковато си тари вяра е Авраамеске, ковато си отеци саворенге аменге ¹⁷ (сарто си пишиме: " Кергиом тут отеци буте народоске") англал о Дел, Колесте повервингян, Ковато съживинел е мулен; тай викинел андо действително съществувиба ковка, ковато нана съществувинел. ¹⁸ О Авраам надявинелас пес, без те овел причина за надежда, повервингяс, за те ачол отеци буте народоске, според о пендо: " Дики ка овел торо потомство". ¹⁹ Без те отслабнинел анди вяра, ов делас пес сметка, кай лескоро телос си вече замъртвиме , понеже сине на около шел бреша, сарто сине замъртвиме е Саракири утроба, ²⁰ обаче относно е Девлескоро обещание нана усъмнисало чрез неверие, а закреписало анди вяра, тай отдиняс слава е Девлеске, ²¹ увериме, кай давка, ковато о Дел обещингяс, Ов си силно те изпълнинел лес. ²² Далкеске сменисало леске правдаке. ²³ Давка па, кай сменисало леске правдаке, нана пишисало само леске, ²⁴ но аменгеда, коленге ка сменинел пес правдаке, като верувинас анде Калкесте, Ковато възкресингяс таро муле е Исусес, амаро Дел, ²⁵ Ковато сине предиме амаре прегрешениенге тай сине възкресиме амре оправданиеске.