¹ Иек събота, като диняс те хал маро андо кер иекеске таро фарисейска началникия, он наблюдавиненас Лес. ² Тай аке, англал Лесте сине десаво мануш, насвало от воднянка. ³ Тай о Исус, захоратингяс е законикиенге тай е фарисеиенге, пенгяс: Позволено ли си те целинел декой анди събота, или нака? ⁴ А он траниенас. Тай Ов, като долгяс е манушес, изцелингяс лес тай муклас лес. ⁵ Тай пенгяс ленге: Ако перелас о осели или о воли декаске тумендар андо кладенеци, нанаяс ли ов ко сахати те извлечинел лес андо съботно диес? ⁶ Тай нанащине отговоринен далкесте. ⁷ Тай като забележинелас сар о поканиме избириненас о първа столовя, пенгяс ленге притча: ⁸ Като поканинел тут декой биявесте, ма беш ко първо столос, тена уло каниме десаво по-почетиме тутар, ⁹ тай те авел кавка, ковато поканингяс тут да лес да, тай пенел туке: Отстъпине кавка тан калке манушеске; тай тогава ка почнинес лажаса те заеминес о последно тан. ¹⁰ Но като поканинен тут, жа тай беш ко последно тан, тай като ка авел кавка, ковато поканингяс тут, те пенел туке: Амала, нак по-упре.Тогава ка овел тут почит англал саворенде калкенде, колато бешен туса ки софра. ¹¹ Соскето всекой, ковато възвишинел пес, ка смиринел пес, а ковато смиринел пес, ка възвисинел пес. ¹² Пенгяс калкескеда, ковато поканингясас Лес: Като дес обеди или вечеря, ма канине те амален, ни те прален, ни те енданиен, нито барвале комшиден, тена поканинен тут онда, тай те овел туке отплатиме. ¹³ Но като дес угощение, поканине сиромасиен, недъгава, куца, коре; ¹⁴ тай ка овес блажено, соскето, понеже лен нанай соса те отплатинен туке, ка овел туке отплатиме андо възкресение е праведноненгоро. ¹⁵ Тай като шунгяс давка иек таро бешле Леса, пенгяс леске: Блажено ковка, ковато ка хал маро андо Божие тагарипе. ¹⁶ А Ов пенгяс леске: Десаво си мануш диняс бари вечеря тай канингяс мнозина. ¹⁷ Тай андо сахати е вечеряке бичалгяс пе слугас те пенел е поканименге: Елан, понеже всичко си вече готово. ¹⁸ А он саворе почнинде единодушно те извининен пес. О първо пенгяс леске: Кингиом манге нива тай требе те иклав те дикав ла; молинав тут, считине ман за извинено. ¹⁹ Авер пенгяс: Кингиом манге панч чифтя воловя тай жав те опитинав лен; молинав тут, считине ман за извинено. ²⁰ А авер пенгяс: прандесалом, далкеске нанащи авав. ²¹ Тай о слугас ало тай пенгяс давка пе господариеске. Тогава о стопани, разгневиме, пенгяс пе слугаске: Икли скоро ко градска улицес тай пътекес, тай ан ате е сиромасиен, недъгавонен, корен тай куцонен. ²² Тай о слугас пенгяс: Господарю, со заповедингян, ачило, тай още тан иси. ²³ Тай о господари пенгяс е слугаске: Икли ко дрома тай ко оградес, тай кити аракес, убедине лен те ден, за те периол мо кер; ²⁴ соскето пенав туменге, кай никой колке манушендар, колато уле поканиме, нанай те вкусинел ме вечерятар. ²⁵ А баре множества пиренас заедно Леса; тай Ов ирисало, тай пенгяс ленге: ²⁶ Ако авел декой паш Манде тай нана намразинел пе дадес, пе дая, пе ромня, пе чадовиен, пе прален тай пе пениен, а още по собствено животос, нанащи овел Моро ученики. ²⁷ Който на пиравел поро кръстос тай на пирел палал Манде, нанащи овел Моро ученики. ²⁸ Соскето, кова тумендар, като мангел те съградинел кула, нана бешел първо те пресметнинел о разноскес, дали ка овел соса те доикалел ла? ²⁹ Тена, като положинел основа, а нанащи доикалел, саворе, колато дикен, те почнинен те асан леске тай те пенен: ³⁰ Кавка мануш почнингяс те градинел, но нанащине доикалел. ³¹ Или кова тагар, като жал на война мамуял авере тагаресте, нанай те бешел първо те съветвинел пес, ащи ли с дешхиляда те устоинел против калкесте, ковато авел мамуял лесте с бишхиляда? ³² Иначе, жи кай ковка си още дуре, бичалел посланикиен те манген условия мириеске. ³³ Тай чука, ако декой тумендар нана отречинел пес всичконастар, со иси лес, нанащи овел Моро ученики. ³⁴ Лачо варесо си о лон, но ако о самото лон обезсолингьол, соса ка подправинел пес? ³⁵ Ои нана струвинел нито е пувяке, нито ториеске; чивен ла аври. Кас иси кана те шунел, нека шунел!