¹ Машкар далкесте, като кидисало иек бутхилядно множествос, дики, кай иек аврес тъпчиненас пес, Ов почингяс те хоратинел Пе ученикиенге: Англал всичконасте пазинен тумен таро фарисейско кваси, ковато си лицемерно. ² Нанай нищо покрито, ковато нанай те открингьол, тай тайно, ковато нанай те ахалол пес. ³ Далкеске, ковато хоратингиен на тъмно, ка шунел пес ко светло; тай со пенгиен канесте андо андруне стаес, ка прогласинел пес таро покриви. ⁴ А туменге, Мере амала, пенав: Ма даран калкендар, колато мударен о телос тай палал далкесте нанащи нищо по бут те керен. ⁵ Но ка предупрединав тумен кастар те даран: Даран Колкестар, Ковато, след като мударгяс, иси лес власт те чивел андо пъкали. Ва! Пенав туменге, Лестар те даран. ⁶ Нана бикнен ли пес панч чирикле дуие асариенге? Тай ни иек лендар нанай бистердо таро Дел. ⁷ Но туменге о бала ко шеро си саворе генде. Ма даран; туме синиен бут по-скъпа таро чирикле. ⁸ Тай пенав туменге: Секой, който изповединел Ман англал о мануша, ка изповединел лес о Човешко Чаво англал о Божия ангеля; ⁹ но ако отречинел пес декой Мандар англал о мануша, ка овел отречиме англал о Божия ангеля. ¹⁰ Тай всеконес, ковато ка пенел дума против о Човешко Чаво, ка простинел пес леске; но ако декой похулинел е Святоне Духос, нанай те простинел пес леске. ¹¹ Тай като ингален тумен андо синагогес тай англал о началства тай властя, ма безпокойнен тумен сар или со ка отговоринен, или со ка пенен. ¹² Соскето о Свято Духос ка сикавел тумен ко също сахати со требе те пенен. ¹³ Тай декой таро множествос пенгяс Леске: Учителю, пен ме пралеске те разделинел манца о наследство. ¹⁴ А Ов пенгяс леске: Човече, кой поставингяс Ман машкар туменде те съдинав или те делинав? ¹⁵ Тай пенгяс ленге: Внимавинен тай пазинен тумен всеконе користолюбиестар; соскето о животос е манушескоро нана съсоинел пес таро изобилие лескере имотиескоро. ¹⁶ Тай пенгяс ленге притча, като пенгяс: О нивес иеке барвалескере биянде бут плоди. ¹⁷ Тай ов размишлинелас анде песте: Со те керав, соскето нанай ман кате те кидав ме плодове? ¹⁸ Тай пенгяс- Аке со ка керав: Ка перавав ме житницес тай ка строинав по-баре, тай оте ка кидав ме саворе жита тай ме блага. ¹⁹ Тай ка пенав ме душаке: Душо, иси тут бут блага, натрупиме буте брешенге; успокойне тут, ха, пи, веселине тут. ²⁰ А о Дел пенгяс леске: Глупецо! Кайка рат ка изисквинен ти душа; а кавка, ковато приготвингян, каскоро ка овел? ²¹ Чука ачол калкеса, ковато кидел имоти песке, тай нана барвалол андо Дел. ²² Пенгяс още Пе ученикиенге: Далкеске пенав туменге, ма безпокойнен тумен тумаре животоске, со ка хан, нито те телоске, со ка уриен. ²³ Соскето о животос си по бут таро хабе, тай о телос - таро облекло. ²⁴ Раздикен е вранен, кай на сеинен, нито жънинен; лен нанай нито съкровищницес, нито житница, но пак о Дел парварел лен. Кити по-скъпа синиен туме таро птицес! ²⁵ Тай кой тумендар ащи гриженца те прибавинел иек лакъти карик пе ръстиесте? ²⁶ Тай чука, ако о най-цикно варесо нанащи керен, соске безпокойнен тумен авереске? ²⁷ Раздикен о кремовия сар барион; нана трудинен пес, нито прединен; но пенав туменге, кай дори о Соломон анде саворе пере славате нана уриелас пес сар иек лендар. ²⁸ Тай ако о Дел чука урявел и полско чар, която авдиес иси ла, а тася чивен ла анди пещ, кити по бут ка урявел тумен, маловерция! ²⁹ Тай чука, ма роден со те хан тай со те пиен, тай тена овен тумен съмнения ан тумаре гогиенде; ³⁰ соскето всичко давка роден о езичникия ко светос; а тумаро Отеци жанел, кай нуждаинен тумен далкестар. ³¹ Но роден о Божие тагарипе тай всичко давка ка прибавинел пес туменге. ³² Ма дара, цикно стадос, соскето тумаро Отеци благоволингяс те дел тумен о тагарипе. ³³ Бикнен тумаро имоти тай ден милостиния; керен туменге кесиес, колато нана овехтинен, неизчерпаемо съкровищес ко небеса, кате чор нана приближинел пес, тай ковато молеци нана хал. ³⁴ Соскето кате си тумаро съкровищес, оте ка овел тумаро сърцес. ³⁵ Тумаро думо те овел препасиме тай тумаре светилникия тарде; ³⁶ тай овен коркоре туме прилична манушенге, колато жарен пе господариес те иринел пес биавестар, за те путрен леске незабавно, щом авел тай похлопинел. ³⁷ Блажена колка слуги, каскоро господари аракел лен жангале, като авел песке; истина пенав туменге, кай ка препасинел пес, ка традел лен те бешен ки софра тай ка авел те прислужвинел ленге. ³⁸ Тай ако авел ки второ стража, или ки трето стража, тай аракел лен чука, блажена си колка слуги. ³⁹ Но давка те жанен, кай ако о стопани е керескоро жанелас анде коле сахакиесте ка авел о чор, ка бдинел тай нанай те мекел те подкопинен лескоро кер. ⁴⁰ Овен, тумеда готова; соскето ко сахати, като на мислинен, о Човешко Чаво ка авел. ⁴¹ Тогава о Петър пенгяс: Господи, само аменге ли пенес кайка притча, или саворенге? ⁴² О Дел пенгяс: Тай чука, кова си ковка верно тай благоразумно настойники, колес лескоро господари ка поставинел упрал пе слугенде, те дел лен навреме о определено хабе? ⁴³ Блажено ковка слугас, каскоро господари, като авел песке, аракел лес, кай керел чука. ⁴⁴ Истина пенав туменге, кай ка поставинел лес упрал пе селоне имотиесте. ⁴⁵ Но ако ковка слугас пенел ан пе сърцесте: Мо господари забависало, тай почнинел те марел е чавен тай е чаиен, те хал, те пиел тай те макярел пес, ⁴⁶ ов о господари колке слугаскоро ка авел андо диес, като ов на очаквинел лес, тай андо сахати, ковато на жанел, тай като марел лес паресте, ка определинел лескири участ е неверноненца. ⁴⁷ Тай ковка слугас, ковато жанелас и воля пе господариескири, но нана приготвисало, нито постъпингяс ки воля леске, ка овел бут мардо. ⁴⁸ А ковка, ковато нана жанелас тай кергяс варесо, ковато заслужинел мариба, хари ка овел мардо. Тай секас, колес си бут дадено, бут ка изисквинел; тай каске бут поверинде, лестар по бут ка изисквинен. ⁴⁹ Яг алом те чивав ки пув; тай со по бут те мангав, ако вече табили? ⁵⁰ Но иси ман кръщение, колеса требе те кръстинаман; тай кити измъчвинав ман, жи кай извършингиол! ⁵¹ Мислинен ли, кай алом те дав мири ки пув? Нака, пенав туменге, но по-скоро раздяла. ⁵² Соскето от акана наоте панч иеке кересте ка овен разделиме, трин против дуиенде, тай дуй против триненде. ⁵³ Ка разделинен пес дад против о чаво тай чаво против пе дадесте; дай против и чай, тай чай против и дай; сасуй против и бори, тай бори против и сасуй. ⁵⁴ Пенелас още е народоске: Като дикен облаки те ваздел пес таро запад, веднага пенен: Бришим ка дел, тай чука ачол. ⁵⁵ Тай като пудел южно балвал, пенен: Ка ачол жега, тай ачол. ⁵⁶ Лицемерция! О муи е пувякоро тай е небескоро жанен те разтълкувинен, а кавка времес сар нана жанен те разтълкувинен? ⁵⁷ А соске тумендар нана съдинен со си право? ⁵⁸ Соскето, като жас те противникиесте те явинес тут англал о управители, постараине тут ко дром те помиринес тут леса, тена завлечинел тут ко съдияс тай о съдияс те предел тут ко служители, тай о служители те чивел тут анди тъмница. ⁵⁹ Пенав туке, нисар нанай те иклос отар, жи кай нана изплатинес о най-последно петачес.