¹ Тай като Ов молинелас пес иеке танесте, като престанингяс, иек Лескере ученикиендар пенгяс Леске: Господи сикав амен те молинас амен, сарто о Йоан сикавгяс пере ученикиен. ² А Ов пенгяс ленге: Като молинен тумен, пенен: Отче амаро, Ковато синян андо небеса, те светинел пес Торо алав; те авел Торо тагарипе, те овел Тери воля, сарто ко небес, чука ки пув; ³ де амен всеко диес амаро ежедневно маро; ⁴ тай простине амаре безеха, соскето аме коркоре простинас всеконе амаре длъжникиеске; тай ма въведине амен андо изкушение но избавине амен таро лукавия. ⁵ Тай пенгяс ленге: Ако декас тумендар иси амал тай жал паш лесте машкар ират, тай пенел леске: Амала, де ман назаем трин маре, ⁶ понеже иек моро амал ало кере дроместар тай нанай со те товав англал лесте; ⁷ тай ако ов андрал в отговор пенел: Ма безпокойне ман; о вудар си вече заключиме тай ме чаве си манца андо тан; нанащи те ухкяв те дав тут; ⁸ пенав туменге, кай даже ако нана ухкиел те дел лес, соскето си лескоро амал, ов поради лескири настойчивост ка ухкиел тай ка дел лес кити требел леске. ⁹ Меда пенав туменге: Манген, тай ка дел пес туменге; роден, тай ка аракен; хлопинен, тай ка путрелпес туменге. ¹⁰ Соскето всекой, ковато мангел, получинел; ковато родел, аракел; тай калкеске, ковато хлопинел, ка путрелпес. ¹¹ Тай кова си давка дад машкар туменде, ковато, ако мангел леске лескоро чо маро, ка дел лес бар? Или, ако мангел леске мачо, наместо мачо, ка дел лес сап? ¹² Или, ако мангел аро, ка дел лес скоприони? ¹³ Тай чука, ако туме, колато синиен каниле, жанен те ден блага тумаре чадовиен, кити по бут о Небесно Отеци ка дел о Свято Духос колкен, колато манген Лестар! ¹⁴ Иеквар Ов гонинелас иеке лалоре бесос; тай като иклило о бесос, о лалоро захоратингяс, тай о народос почудисало. ¹⁵ А десаве лендар пенде: Чрез о началники е бесовиенгоро, о Веелзевул, гонинел е бесовиен. ¹⁶ А авер, като изпитвиненас Лес, мангенас Лестар знамение таро небес. ¹⁷ Но Ов, като жанелас ленгере помислес, пенгяс ленге: Всеко тагарипе, разделиме против песте, запустинел, тай кер, разделиме против песте*, перел. ¹⁸ Чука също, ако о Сатана разделинел пес против песте, сар ка устоинел лескоро тагарипе? Понеже пенен, кай гонинав е бесовиен чрез Веелзевул, ¹⁹ тай ако Ме чрез о Веелзевул гонинав е бесовиен, тумаре последователя чрез касте гонинен лен? Далкеске он ка овен туменге съдиес. ²⁰ Но ако Ме е Девлескере наеса гонинав е бесовиен, ов о Божие тагарипе ресло жи туменде. ²¹ Като о силно въоражиме мануш пазинел по дворос, лескоро имоти си андо безопасност. ²² Но като иек по-силно лестар нападнинел тай надвинел, лел лескоро саворо оръжие, колесте надявинелас пес, тай разделинел со грабинел лестар. ²³ Ковато нанай Манца, против Манде си; тай ковато нана кидел заедно Манца, ов разпилинел. ²⁴ Като о нечисто духос иклол таро мануш, ов накел таро тана би паниескоро тай родел спокойствие; тай като нана аракел, пенел: Ка иринаман ме кересте, катар иклильом. ²⁵ Тай като авел, аракел лес шулавдо тай наредиме. ²⁶ Тогава жал тай лел песа ефта авер духовя, по зла лестар, тай като ден, живинен оте тай о последно състояние колке манушескоро ачол по канило таро първо. ²⁷ Като хоратинелас давка, иек ромни таро множество силноне гласоса пенгяс Леске: Блажено и утроба, която пирагяс Тут, тай о гърди колато сучингян. ²⁸ А Ов пенгяс: По-лачес пен: Блажена колка, колато шунен о Божие слово тай пазинен лес. ²⁹ А като о народос киделас пес около Лесте, почингяс те пенел: Кавка поколение си нечестиво поколение; мангел знамение, но авер знамение нанай те дел пес леске, освен о знамение е пророкиескоро о Йона. ³⁰ Соскето, сарто о Йона ачило знамение е ниневийциенге, чука о Човешко Чаво ка овел калке поколениеске. ³¹ И южно царица ка явинел пес ко съдос е манушенца калке поколениестар тай ка осъдинел лен, соскето али таро крайща е пувякере те шунел и Соломоново мъдрост; а аке, ате иси по бут таро Соломон. ³² О ниневийска мруша каа явинен пес ко съдос калке поколениеса тай ка осъдинен лес, соскето покаисале чрез и Йоново проповед; а аке, ате иси по бут таро Йона. ³³ Никой, като тарел светилос, нана товел лес андо зимники, нито телал и шиника, но ко светилники, за те дикен и светлина колка, колато ден. ³⁴ О светилос те телоскоро си тери як. Като ти як си здраво, ов то цело телос си осветиме; а като си болнаво, то телос да си андо мраки. ³⁵ Далкеске, внимавине да не би и светлина анде туте те овел тъмнина. ³⁶ Ако о цело торо телос овел осветиме, без те овел лес тъмно част, ов цело ка овел осветиме, сарто като о светилос осветинел тут пе сияниеса. ³⁷ Като хоратинелас, иек фарисеи поканингяс Лес те обедвинел лесте; тай Ов диняс тай бешло ки софра. ³⁸ А о фарисеи почудингяс пес, като диклас, кай Ов нана товгяс пес първо англал о обеди. ³⁹ Тай о Дел пенгяс леске: Акана туме, о фарисея, чистинен о авруно е чашакоро тай е паницакоро; а тумаро андрунипе си пердо грабежиенца тай нечестиеса. ⁴⁰ Несмислена! Кавка, Ковато кергяс о авруно, нана кергяс ли о андрунода? ⁴¹ По-лачес чистинен о андруно; тай аке, всичко ка овел туменге шужо. ⁴² Но горко туменге, фарисея, соскето ден десятъки таро джожени, таро седефчес тай таро всекакво зеленчуки, а пренебрегвинен о правосъдие тай и Божия любов. Давка требваше те керен, а ковка да тена пренебрегвинен. ⁴³ Горко туменге, фарисея! Соскето дехен о първа столовя андо синагогес тай о поздравия ко пазария. ⁴⁴ Горко туменге! Соскето синиен сар миморя, колато на личинен, чука че о мануша, колато пирен ленде, нана жанен. ⁴⁵ Тай иек таро законикия в отговор пенгяс Леске: Учителю, като пенес давка, аменда коринес. ⁴⁶ А Ов пенгяс: Горко туменгеда, законикия, соскето товаринен е манушен бремеса, колато паресте пиравен пес; а коркоре туме нито иеке наеса нана допиринен тумен жи ко бремена. ⁴⁷ Горко туменге! Соскето градинен о гробницес е пророкиенгере, а тумаре дада избинде лен. ⁴⁸ Тай чука, туме свидетелствинен е деловиенге тумаре даденгеренге тай съгласинен тумен ленца; соскето он избинде лен, а туме градинен ленгере гробницес. ⁴⁹ Далкеске и Божия премъдрост пенгяс: Ка бичалав ленге пророкия тай апостола, тай икен лендар ка мударен тай гонинен; ⁵⁰ за те изискинел пес калке поколениестар о рат саворе пророкиенгоро, ковато си проливиме таро създаване е светоскоро - ⁵¹ таро рат е Авелеске жи ко рат на Захария, ковато загинингяс машкар о олтари тай о светилище. Ва! Пенав туменге, ка изискинел пес калке поколениестар. ⁵² Горко туменге, законикия! Соскето отнемингиен о ключос е знаниескоро; коркоре туме нана диниен, тай калкенге кате ден попречингиен. ⁵³ Тай като иклило отар, о книжникия тай о фарисея почнинде яростно те преследвинен Лес тай те предизвикинен Лес те хоратинел за още буте букиенге, ⁵⁴ като дебниненас Лес, за те уличинен Лес варесоске Лескере думендар.