¹ Принудиме синиом те хвалинав ман, при все кай нанай ползаке; но акана ка авав жи ко видения тай откровения таро Дел. ² Пенджарав иеке манушес андо Христа, ковато преди дешуштар бреша ( андо телос ли, на жанав, аври таро телос ли, на жанав; о Дел жанел) уло ингалдо жи ко трето небес. ³ Тай салке манушес пенджарав (андо телос ли, би е телоскоро ли, на жанав; о Дел жанел), ⁴ ковато уло ингалдо андо рай тай шунгяс неизразима думес, колато манушеске нанай позволиме те хоратинел. ⁵ Салке манушеса ка похвалинав ман; а манца нанай те похвалинав ман, освен ме немощиенца. ⁶ (Соскето, даже ако мангав те похвалинав ман, нанай те овав безумно, понеже ка хоратинав истина; но икерав ман, тена декой мислинел манге по бут, состар дикел или шунел мандар.) ⁷ А за тена превъзнесинав ман ашал о пребут откровения, диняс пес манге каро* анди плът, пратеники таро Сатана, те мъчинел ман, за тена превъзнесинав ман. ⁸ Далкеске трин дром молисалом е Девлеске те отстранинел лес мандар; ⁹ тай Ов пенгяс манге: Ресел туке Мери благодат; соскето Ми сила анди немощ покажинел пес съвършено. Тай чука, е пребуте лошаласа по-лачес ка похвалинав ман ме немощиенца, за те вселинел пес анде манде и Христово сила. ¹⁰ Далкеске аракав удоволствие андо немощя, андо укоря, андо лишение, андо гонения, андо притеснения за е Христаске; соскето, като синиом немощно, тогава синиом силно. ¹¹ Ачилом безумцос. Туме принудингиен ман, соскето туме требеше те препоръчвинен ман; понеже на улом по-долно калке превъзходноне апостолендар, макар те овав нищо. ¹² Наистина о признакя иеке апостолескере - знамения, чудеса тай велика деловя, покажинде пес машкар туменде пердоне постоянствоса. ¹³ Соскето, анде состе улен поставиме по-теле околе кангериендар, освен анде далкесте, кай на дотегнингиом туменге? Простинен манге дайка неправда! ¹⁴ Аке, готово синиом те авав паш туменде трето дром тай нанай те дотегнинав туменге, соскето на мангав тумаро, а тумен; понеже о чада нанай длъжна те киден имоти пе родителенге, а о родителя - е чадовиенге. ¹⁵ А па ме пребуте лошаласа ка жертвинав тай цело ка жертвинав ман за тумаре душенге. Ако ме дехав тумен по бут, туме по-хари ли ка дехен ман? ¹⁶ Но, пенен туме, чука те овел - на дотегнингиом туменге, обаче сар пирно долгиом тумен измамаса. Чука ли си? ¹⁷ Възползвисалом ли тумендар чрез декасте колкендар, колато бичалгиом жи туменде? ¹⁸ Помолингиом е Титиес те авел паш туменде тай леса бичалгиом иеке пралес. О Тит ли припечелингяс варесо тумендар? На пирас ли анде иеке същоне духосте? Андо иек тай съща стъпкес? ¹⁹ Още ли мислинен, кай аме оправдинас амен англал туменде? Нака; англал о Дел хоратинас давка андо Христа, тай то всичко, любезна мере, за тумаре назиданиеске. ²⁰ Соскето дарав тена, като авав, те аракав тумен ма саве мангав тумен, тай ме те аракловав туменге ма саво манген ман, тай тена овел машкар туменде раздори, завист, гняв, партизанство, одумваня, клюкарство, високомерие, безредицес. ²¹ Тена, като ка авав пак, те смиринел ман моро Дел машкар туменде, тай те оплаквинав мнозинен, колато англал далкесте съгрешинде тай нана покаинде пес е нечистотаке, о блудство тай о сладострастие, коленде предине пес.