¹ Дано те ащи търпинен хари моро безумие! Ва ! потърпинен ман, ² соскето ревнувинав за туменге божественоне ревностяса; понеже сгодингиом тумен иеке мрушеса, те представинел тумен сар шужи девица е Христаске. ³ Но дарав тена, сарто о сап хохавгяс е Ева пе хохамнаса, те нашальол тумари годи тай отперел тари простота тай чистота, която дължинен е Христаске. ⁴ Соскето, ако авел декой тай проповединел туменге авере Исусес, Колес аме на проповедингям, или ако получинен авер духос, ковато на получингиен, или авер благовестие, ковато на приемингиен, туме лесно търпинен лес. ⁵ Обаче мислинав, кай ме на синиом андо нищо по-долно калке превъзходноне апостолендар! ⁶ А па, те овавда анде ме речяте просто, андо знание на синиом; дори аме по секакво начини покажингям туменге давка андо всичко. ⁷ Безех ли кергиом, като смиринавас ман, за те вазден тумен туме, като проповедингиом туменге о Божие благовестие даром? ⁸ Авер кангеря оберингиом, като лавас заплата лендар, за те служинав туменге; ⁹ а като улом паш туменде тай пелом анди нужда, на дотегнингиом никаске, соскето о прала, колато але тари Македония, задоволинде ми нужда, Чука андо всичко опазингиом ман, тай ка пазинав ман, тена дотегнинав туменге. ¹⁰ И Христово истина, която си анде манде, свидетелствинел, кай никой нанай те отнеминел манге дайка похвала андо Ахайска тана. ¹¹ Соске? Соскето нана дехав ли тумен? Жанел о Дел! ¹² А со керав, давка ка керав, за те пресечинав о поводи калкенгоро, колато роден поводи против манде, тай андо давка, колеса хвалинен пес, те окажинен пес сар аменде. ¹³ Соскето салка мануша си хохавне апостола, лукава работникя, колато прекерен пес Христова апостола. ¹⁴ Тай нанай чудно; соскето коркоро о Сатана прекерел пес светоне ангелесте; ¹⁵ чука кай нанай баро варесо, ако лескере служиеля прекерен пес служителя е правдакере. Но ленгоро крайос ка овел според ленгере деловиенде. ¹⁶ Пак пенав, никой тена считинел ман безумнонеске; ако ли не, приеминен ман сар безумно, кай те похвалинав ман меда хари варесо. ¹⁷ ( Давка, ковато пенав салке самоувереноне хвалбаса, на пенав лес сар ко Дел, а сар безумцос. ¹⁸ Чука кай мнозина хвалинен пес ки плът, ка похвалинав ман меда.) ¹⁹ Соскето туме, като синиен разумна, готовностяса търпинен е безумнонен; ²⁰ понеже търпинен, ако декой поробвинел тумен, ако ограбинел тумен, ако използвинел тумен, ако превъзнесинел пес, ако марел тумен ко муи. ²¹ Лажаке пенав лес, се едно кай улам слаба! Но соса осмелинел пес декой те хвалинел пес (сар безумцос хоратинав), осмелинав ман меда. ²² Еврея ли си? Меда синиом. Израиляния ли си? Меда си ом. Авраамово потомство ли си? Меда. ²³ Служителя Христова ли си? (сар безумцос хоратинав), ме по бут: ульом по бут андо трудос, андо бичувания прекомерно, андо тъмницес още по бут, бут дрома мерибнастеда. ²⁴ Панч дром о юдея чалавде манге по саранда без иек ударя; ²⁵ трин дром улом мардо тоягаса, иеквар марде ман баренца, трин дром претърпингиом корабокрушение, иек рат тай иек диес улом ко морска дълбочини. ²⁶ Бут дрома улом андо пътешествия; андо опасностя таро реки, анди опасност таро разбойникия, анди опасност таро съотечественикия, анди опастност таро езичникия, анди опасност андо градос, анди опасност анди пустиния, анди опасност ко морес, анди опасност машкар о хохавне прала; ²⁷ андо трудос тай мъка, бут дром андо безсъние, анди бок тай жажда, бут дром андо неядене, андо шил тай андо нангиба; ²⁸ тай освен окола букя, упрал манде тежинел секо диес и грижа саворе кангериенгири. ²⁹ Кой изнемощинел, без те изнемощинав меда? Кой съблазнинел пес, без те разтабльовав меда? ³⁰ Ако требе те хвалинав ман, ка похвалинав ман далкеса, ковато отнесинел пес жи ме немощяте. ³¹ О Дел тай о Отец е Девлеске о Исуса (Христа), Ковато си благословиме жи ко векос, жанел, кай на хохавав. ³² ( Андо Дамаск о областно управители е тагареске о Арета поставингяс стража андо градос Дамаск, за те уловинел ман; ³³ тай презал о жами ки стена мукле ман кошоса, тай нашлом таро васта леске.)