¹ Ohiwoonele nttima atthu anvara tjootakhala, wala ohuupuwele wiitakanihera niyaayo, ² kontha mirimatjaya tjinuupuwela ovara tjootakhala, nimalakwaaya anuuluma tjoonhala. ³ Mwaha wootjuwelatja, etthoko phuntekiyaaya, ni mwaha wowiiwelela, onaakhala ninrettele. ⁴ Mwaha wootjuwelatja, mapuro ankhalaaya tjinaatjara mihakhu tjooreera ni tjoophwanela. ⁵ Nakhotto ootjuwelatja nkhala oolipa, nintthu ootjuwelatja nintjenra ekurutjawe, ⁶ kontha, ninttala wootjuwelatja, onaapanka ekhotto, naanamalakalaka entji, otthema ohaavo. ⁷ Nlolo otjuwelatja onanrekamela tjinene, nipuro niri ahooleli, wankhora, yena khanuulumata. ⁸ Haavo nlakela opanka yootakhala; atthu anonvaa ntjina nafunti otjitthu tjootakhala. ⁹ Etthunelo yoohikhala etanpi, ni atthu anantanhifu namahanhuriha. ¹⁰ Wakhala ootteetthyaa niwoova nihuku nomikatjamiho, vano ekurwaa en'hala okhala yankaani. ¹¹ Moopole yaale anpheela wiiviya, ni waavarenle anpheela wiiva. ¹² Wiirakavale: Khiivo entjuweleehu, vano, Yoole nvarenla mirima khantjuwela en'himyeenhu. Ni yoole nssunka ekumyeenhu khantjuwela. Vano, Nluku khanonvaha khula ntthu enonphwanela. ¹³ Mwaawanaka, olyeeke oravo, kontha phuwooreera, ni onaanaa. ¹⁴ Tjitjon'mo phuutjuwelatja wanrimaniwaa; waphwanhavale, ni okhuluvelawaa khun'malatho. ¹⁵ Ohikhaleke oowehaweha, phanka ntthu oovavarya nkela ntthooko nanassariya. Ohikwanhule enupaaweeyo. ¹⁶ Kontha nassariya naamora emaara ssaapa ni naavuwa, massi atthu oovavarya an'morihiya nimahuviho. ¹⁷ Ohitthape n'wananyaa amoravale, ni nrimaa ohikhale wootteeliya yena amora, ¹⁸ Apwiya anaahala woona nohikhaliha etthu ni anaahala ohulussa orussiyawaya wayena. ¹⁹ Ohikutakuthyee mwaha waatakhali, wala ohoonele ntthima atthu oovavaryaa, ²⁰ kontha ntthu oovara tjootakhala kharina yowanriiha, ni nthuko waatthu oovavaryaa onaahala ottiphyaa. ²¹ Moove Apwiya ni n'moove mwene, mwaamwanaka; oheettane yaale anaatanhifu, ²² kontha, wowaakuvyaatja, okwanhuwatjawaya onaahala owa, ni tupani ntjuwela enan'na yookwanhuwatja on'hala waawela ooteene. ²³ Yaala phamoolumo antthu ootjuwelatja: khunreera othanlana muulumaka nlattu wonketteloni. ²⁴ N'hala omwiirela ntakhali: We onassariya naahala otakhalihiya naatthu noothanhiya nlaponi. ²⁵ Massi yaale anaavaanhiha atakhali anaahala otthapeliya niitthuvo tjon'nema tjinaahala on'weela. ²⁶ Yootjipwa yooreera eri phanka etjwaatjwaa yeepatthani. ²⁷ Otthonkomanihe ntekwaa woota ni ohiye tjoolikana n'mattanimwaa; vano, otekeke enupaa. ²⁸ Ohinkhalele ossaahiti mwaattaman'nwaa ohimoonale yiiralyaawe, wala ohoothe nimalakwaa. ²⁹ Ohiire: Kinanpanka ekipankalyaawe; kinahala on'hokolosera ekinpankalyaawe. ³⁰ Kihovira n'mattani mwantthu owoolwaa, kihovira munlimaawe ntthu oohitjuwelatja. ³¹ Mwiiwa tjinowun'nuwatja miphantte tjooteene, etthayeeyo yaanootakhaleliya ni eluwanyaayeeyo yaahomora. ³² Vano, kaahoona ni kaahokhalihera; kaahoona ni kaahohimeeriya. ³³ Orupa vakaani, ohitjila vakaani, omumula vakaani ni myoono tjookumaana; ³⁴ ni ossikhinyaatja onooweela phanka ttapaya, ni tjootthunatjaa tjinkhala phanka nakhotto oolikaneliya.