¹ Wookomavale opheelaka olya ninkhulupale, oweheehe ratta eri ohoolowaa, ² ni wiitjeessenre mwaalo nssikonimwaa, wakhala ntthu oolya ventji. ³ Tjihootjivele etjoolyatjawe, kontha etjoolya tjoohiloka. ⁴ Ohootjivele ovara nteko tjinene woopheela ophwanha n'hakhu; okhale ootjuwelatja wiira otjuwele weemelavale. ⁵ Phimaana, meethwaa anaahala waarya, weekhweeli, okhalana mapupha phanka mwaanuni nvava ntjulu. ⁶ Ohilye eyolya yantthu rina niitho nootakhala, wala tjihootjivele etjoolyatjawe, ⁷ kontha yooyo phintthu naalikela ehissapu yoyoolya. Yena nawiira! Olye owurya, massi nrimaawe khuri niwe. ⁸ Onaahala oraphyaa yeele elyalyaa ni khatjin'hala ontjivela tjuulumatjalyaa. ⁹ Ohuulumatje nipuro niryaawe nlolo, kontha yena naahala otanhifu otjuwelatja womoolumwaa. ¹⁰ Ohikumihe nluku nomwiinano nokhalayi, wala ohikusse mapuro eekhwaatjuni, ¹¹ kontha naahooleela phokuru, ni Yena naahala wooweheeha mwaha weetthu yaapankalyaa. ¹² Ohele wanrimani en'himeeriyaa ni nmeethonimwaa, moolumo ootjuwelatja. ¹³ Ohikhotte on'himeerya mwan'hina, kontha, wanttarussa niikopo, yena khan'hala okhwa. ¹⁴ Omwaatte ninkopo, ni onaahala woopola n'nepaawe nkhapure. ¹⁵ Mwaamwanaka, nrimaa wakhala wootjuwelatja, vano, nrimaaka onaahala okhala wootteeliya; ¹⁶ nrimaaka onaahala otteeliya malakwaa yuuluma yooreera. ¹⁷ Nrimaa ohiwonele nttima oottheka, massi ohihiyenre woova Apwiya nihuku nooteene. ¹⁸ Weekhweeli, massi ohoolo ohaavo nkhuluvelo ni khun'hala omalatho. ¹⁹ Oviriyane mwaamwanaka! Okhale ootjuwelatja ni weettihere nrimaa munttalani. ²⁰ Ohiitakanihere naanan'hapaliya wala oolya tjinene, ookhuratja enama, ²¹ kontha anan'hapaliya naatthu oolya tjinene ankhala amassikhini, ni an'wara mattapwatta. ²² Waaviriyane athumwana, yooyarale, ni ohaatanhifu anumwanaa yuuluvalavale. ²³ Othume ekhweeli, massi ohitumihe; othume otjuwelatja, ohimeeriya niwiiweeha. ²⁴ Athumwaane nassariya anaahala ottapa ventji, ni yoole non'yara mwaana ootjuwelatja naahala otteeliya wayooyo. ²⁵ Athumwana naanumwana atteeliyeke, ni yaale yootjuwenle atthapeke. ²⁶ Mwaamwanaka, okivahe nrimaa, ni meethwaa aweheehe mittalatjaka. ²⁷ Kontha nthiyana ooluvaluva nlikitti nowinssa, ni nthiyana amwaneene ehime yowookwaa. ²⁸ Yena nawiipitha phanka ttapaya intjenraka nunmuru naatthu okossa muntjokoni. ²⁹ Tupani ntjukulatja. Tupani n'wana. Tupani nttokutta. Tupani rina makhwatta woohiira etthu. Tupani rina meetho oosserya. ³⁰ Yaale anwurya nipha tjinene, yaale anttehatteha nipha nootakanihiya. ³¹ Ohiweheehe nipha nakhala noosseerya, naaryakavale nrutthuni ninaweettelana. ³² Woomaleloni, ninaaluma ni ninawoohiyera ehalama phanka evili. ³³ Meethwaa an'hala woona tjitthu tjoohilokaloka ni nimaa on'hala wuuluma moolumo oohiloka. ³⁴ We on'hala okhala ntthu nrupa eriyari epahari wala wanloothoni wonaviyu. ³⁵ Onaahala wiira! Kihaattiya, massi akirakalale. Kihaattiya, massi akoonale oweryaa. Nin'hala okimala tjani niphan'na kirweelaka nikhwaawe.