¹ Yoole niimaaliha nrweela enphelaawe, ni n'wanana moolumo ooteka. ² Nlolo khanphwanha yontjivela mootjuwelatjani, massi oowehaweha tjiri wanrimaniwawe. ³ Ntakhali, haana otanhifu wootakaneela ehaaya noovaanhihiya. ⁴ Moolumo antthu ari phanka maatji owinssera; otjuwelatja emwaamuro yokuru. ⁵ Khunphwanela olikanatja nintthu oovavaryaa, wala okhotta essariya wanassariya. ⁶ Malaku anlolo an'mwaana ewaniwani, ni malakwaawe anonruma waattakana. ⁷ Malaku anlolo phuukwanhuwatjawawe, ni nvarihatjiya munryankhoni momalakwaawe. ⁸ Moolumo antthu oohanhuriha ari phanka eyoolya enkela mwiirutthuni. ⁹ N'nhoonhatjiya nintekwaawe mun'nawe yoole nkwanhula. ¹⁰ Ntjina naApwiya elipihero yuulupale; nassariya naatthawenla ni nkhala wooliipa. ¹¹ N'hakhu wanassariya epoomaawe yoolipihatjiya ni, n'muupuwelelonimwawe, eluwani yoorekama. ¹² Wiittottopa owaana okwanhuwatja, wiiyeviha on'mwaa nttittimiho ohinaaya. ¹³ Yoole naakhula hiniiwa nthoonhera ohiloka ni nawoona ehaaya. ¹⁴ N'nepa wantthu on'hala okhala nkwerereni, massi n'nepa woomora, tupani n'haala ovilela. ¹⁵ Nrima wantthu ntjuwelala naaphwanha otjuwelatja, ni maaru antthu ootjuwelatja naahala orweela. ¹⁶ Etthuvo envaha ntthu enantthukulela nttala, non'waanela ntthu ootjuwanyeessa. ¹⁷ Nantjera ottonka mwahaawe niitjoona orattaru npaka wankohiyaawe nuule n'muulumelaawe. ¹⁸ Oriha eparakha onaamaaliha tjookhuma ni onawaakawaniha atthu oolipa. ¹⁹ Mun'na ootarawiya orika onkhwitiri ohovirikana niipooma yoolipa, wuuluma milattu ori phanka tjoolipihiya tjonupa. ²⁰ Napwiipwi akhula ntthu tjarale n'hokorokho on'mwaanowawe; tjin'hephaawe wamalakuniwawe, phinonkhaliha. ²¹ Nookhwe nookumi on'wehawehiya ninlimi, ni yaale anfenta anaahala olya n'hokorokhwaaya. ²² Yoole naaphwanha amwaarawe naaphwanha yooreera, ni naaphwanha n'nema naApwiya. ²³ Massikhini nlepela niikiriri, thaatjiri ntjipwa voorakaliha. ²⁴ Yoole nkupaleela okhalana assinpwanaawe entji naapwetessiya niyaayo, massi ohaavo onpwana waattaman'nalyaa woovirikana mwaamun'naa.