¹ Yooreera okhala oovilela noolya vakaani wahikhanle etthoko tjootjala tjooliya niiwaniwani. ² Nanteko ootjuwelatja naahala omweettihera mwaamwanawe npakatja tjitthu tjohaaya, ni naahala okhalana ekhipantte wayoohiyeriya phanka mwaana ankunhaawe. ³ Crisol opuro ontulussiya eparatha, ni efoorumu nipuro nintulussiya ewooru, massi Apwiya antulussa mirima. ⁴ Ntthu npanka yootakhala n'weheeha malaku owootha; atthu owootha anviriyana malaku ookwanhula. ⁵ Nontanhifu massikhini nonruwana Munpale, ni yoole niittottopa noohaawawawe khan'hala okhala woohihuvihiya. ⁶ Atthu oophwanela etthuvo yaatthu oolupale ni an'nathumwanihu an'mwaana nttittimiho waassaanaaya. ⁷ Etthu yooreera khinphwanenle nlolo; yoothaka ventji nimalakwaaya. ⁸ Olavilavi ori phanka nluku nootatussatjiya wayoole nvaha; hata arwee vayi, yena naahala okhala ooreeriya. ⁹ N'huluwatja otarawiya nrweela nfento, massi naakulela yooyo mwahooyo nawaakawaniha assinpwanaawe. ¹⁰ Yoovaanhihiya enkhala n'hina mwantthu rina otjuwelatja ovirikana ewaniwani emiya tjanlolo. ¹¹ Ntthu ootakhala nrima npheelatja otanhifu, phimaana, naahala oveeleeliheriya nrumeyi ootakhala nrima. ¹² Yooreera okumanatja niinama yaahiyale assaanaaya wahikhanle nlolo nitjoovaratjawe. ¹³ Ntthu aivaka yooreera ni yootakhala, yootakhala khinkumatho vapuwaniwawe. ¹⁴ Yiipatjeraka ekhotto onkhala phanka yoole n'mwaressa maatji yeettelaka nphantte wooteene.; phimaana, naatthawa nipuron'ne ehinantjera. ¹⁵ Yoole nonvaha essariya ntakhali ni yoole nonttarussa nassariya ooyeeli khanphwanela waApwiya. ¹⁶ Essiyani nlolo waahalaawe oliva wiira afuntte otjuwelatja hirina ewryelo yoofuntta. ¹⁷ Npwanaawe ntthu naafenta owakathi wooteene, ni mun'na n'yariya owakathi womahuviho. ¹⁸ Ntthu hinuupuwela naapanka tjookhuluveliha tjinonkutakutheeha mwaneene, ni tjoolokihiya tjamwaattaman'nwaawe tjinkhala tjawawe. ¹⁹ Yoole nfenta ewaniwani nfenta etanpi; yoole nrekamiha nkhoraawe nuntakatja makhuva. ²⁰ Ntthu rina nrima woohiloka khanphwanha etthu yooreera; yoole nuulumatja woohilika n'morela mookwanhuwatjani. ²¹ Yoole nonkhalana nlolo niiwiihera mahuviho mwaneene; npheela okhala thumwaane antthu oohilika khan'hala otteeliya. ²² Nrima wootteeliya nthale wooreera, massi n'nepa woomora onawunmiha makhuva. ²³ Ntthu oovavaryaa nawaamini ohukheriya wowinpithyaa wowiira mittala tjossariya tjikhale tjoovahiya. ²⁴ Yoole niiwa ekhovyaawe n'wehiha wootjuwelatjani, massi meetho anlolo anrimeela woomaleloni elapo. ²⁵ Mwaana nlolo mahuviho aathumwaane ni ottharuwa waanumwaane amun'nuwihale. ²⁶ Khawanphwanela onttarussa nassariya, wala waattakatja amassikhini ahiirale etthu. ²⁷ Yoole rina otjuwelatja nuulumatja vakaani, ni yoole niiwa haana tjootakaneela tjoolipa. ²⁸ Hata nlolo n'nohimeeriya nintthu ootjuwelatja akhala oomaala; malakwaawe ankhala oomaala, nhalihiya wiira ntthu ootjuwelatja.