¹ Baraao pakawona kuti waidhakadza Yahweh pakuropafadza Iziraeri, iyena ana kuita, se zwaita sure, kusendzesa uroi. Kundze kwazwo, woringira kudhii reku tyambe. ² Wopurumutsa madziso ake uye wowona Iziraeri yainge yakagara, umwe na umwe pa dzindza rake, uye Mwiya wa Mwari wowiya kwari. ³ Iyena wotambira tchiporofita itchi uye woti: "Baraao, mwana wa Beori, uri kudha kubuya, kune mwanarume une madziso akanyasa kufungunuka. ⁴ Iyena unobuya uye unozwa mazwi a Mwari. Iyena unowona tchiwoneso tcha Nyasimba rese, pamberi pa wiya wanogwadhamira ne madziso akafungunuka. ⁵ Zwitumba zwako zwakanyasa kurungama, Jakobo, mbuto yaunorarama, Iziraeri! ⁶ Se mirambo iwona anobhararika, se munda we edeni mumutcheto me murambo, se maruwa akasimwa na Yahweh, se macedro ari mumutcheto me nvura. ⁷ Nvura inobhuda mumigoro yake, uye mbeu yake inodhirirwa zwakanaka. Mambo wake utchasimudzirwa kupinda Agage, uye umambo wake utchakudzwa. ⁸ Mwari wamuvisa kuva kuGipigta ne simba re nhombe yemushango. Utchaparadza marudzi anorwa naye. Utchaputsa putsa makodho ake kuita madhimbu madhimbu. Utcha baya mipasha dzake. ⁹ Iyena unogwadhama se shumba, ndiani ungaedza kumuyambira. Wese wanomuropafadza ngawaropafadzewo; wese wanomutuka ngawatukwewo". ¹⁰ Zwadharo, kunyangadzwa kwa Barake kwakawiya kuna Baraao uye iyena woponda nyara dzake pamwepo ne shungu. Barake wotsa kuna Baraao: "Inini ndakudhaindza kuti utuke awengi angu, asi wona, iwewe uri kuwaropafadza katatu. ¹¹ Saka, ndisie zwino uye enda kumba kwako. Ndabuya kuti ndaizokupasa rukudzo, asi Yahweh wavaridzira kuti uwine umwe mubhairo". ¹² Zwadharo, Baraao wodhaira kuna Barake: "Inini ndabuya kune atumwa emasoko awanditumira: ¹³ 'Kunyangwe Barake andipase nyumba yake yeumambo yakadzara ne ndarama ne goridi, ndaidhapi kuita zwisikaenderani ne mazwi a Yahweh ndoita kudha kwangu zwakanaka kana zwakashata. Nditchabuya zwiya bhasi zwanditchavundza na Yahweh kuti ndibuye'. Andina kumuvundzai izwona. ¹⁴ Saka, zwino, wona, nditchapetuka kumba kwangu, asi tchekutanga ndisie ndikuvundze zwiya zwitchaizwa ne anhu aya kune anhu ako pamatsiku arikutera". ¹⁵ Baraao wotanga kuporofita. Iyena woti: "Baraao, mwana wa Beori buya, mwanarume wekuti madziso ake akanyasa akafungunuka. ¹⁶ Itchi nditchiporofita tcheumwe munhu unozwa mazwi a Mwari, aneruziyo re Nyadyenga, ane zwiwoneso zwe Nyasimba rese, pamberi pa Wiya wanogwadamira ne madziso akafungunuka. ¹⁷ Inini ndirikumuwona, asi Iyena asi pano zwino. Inini ndirikumuringira, asi Iyena asi paduze. Imwe nyeredzi itchawiya kuva kuna Jakobo, uye tchimwe tchiwoneso tchitchawiya ku Iziraeri. Iyena utchaparadza atungamiriri e Moabe uye utchaputsa putsa ese edzindza ra Sete. ¹⁸ Zwadharo, Edomo itchawe ye Iziraeri, uye Seiro itchawewo ye Iziraeri, awengi eIziraeri, atchatorwa ne Iziraeri ne simba. ¹⁹ Kuva kuna Jakobo, kutchawiya umwe mambo utchawatonga, uye utchaparadza anenge asara muguta". ²⁰ Zwadharo, Baraao woringira kuna Amareke uye wotanga kuporofita. Woavundza: "Amareke yakambowe rudzi guru kupinda ese marudzi, asi magumo aro kutchawe kuparara". ²¹ Baraao woringira kudhii rema keneu uye wotanga kuporofita etchiti: "Mbuto yamuri kurarama yakasimba, uye masaki enyu ari mumapuwe. ²² Asi keneu itchaparadzwa kana Asuri ikamutorai kuita asungwa". ²³ Zwadharoko, Baraao wotanga tchiporofita tchake tchekupedzisira etchiti: "Ai! Ndiani utcharamba ane ndaramo kana Mwari akaita izwi. ²⁴ Zwikepi zwitchawiya kuva ku Kitimo; iwona atcharwisa Asuri uye wotora Eberi, asi iwonawo, atchaparadzawo". ²⁵ Zwadharoko, Baraao wopurumuka woenda. Wopetuka kumba kwake, uye Barake woendawo.