¹ Ridzai trombone ku Siao, uye tcheudzai ne izwi guru pa dhunhu rangu riswene; patikai agari ese emunyika; nekuti tsiku ya Ishe irikuwiya, nekuti iri dhuze. ² Tsiku ye rima, tsiku ye makuta ne rima guru, se matchibhesi akaparadzwa pamusoro pe madhunhu; rimwe rudzi guru uye rakasimba, risina kumbowonekwa kuvira kare, kunyangwe kuva kwawo akuzowonekwizwe rimweni, parudzi ne rudzi. ³ Pamberi pake moto unoparadza, uye sure kwake moto urikubhaka; nyika iri pamberi pake yakaita se munda we Edeni, asi sura kwake kwakaita se rendje raparadzwa; apana tchiro mukati mwatcho tchingapukunyuka. ⁴ Tchimiro yatcho yakaita se tchimiro tche mabiza, uye atchagogoma se mabiza. ⁵ Atchambhuka se kurira kwe ngoro dziri kumusoro kwe makomo, se kurira kwe moto urikupisa mauswa, se rudzi rine simba, rakamirira kurwa. ⁶ Pamberi pake marudzi atchatchema, meso dzese dzitchatsukwara. ⁷ Atchagogoma se arwi ehondo, se anarume ehondo atchakwira gwiro remugano; uye umwe na umwe utchaenda ne gwandza rake, uye azoobhudhi mugwandza rawo. ⁸ Apana utchatsikirira umweni wake; atchaenda umwe na umwe mugwandza rake; wanokuwara asina kubhudha pamukumbi. ⁹ Atchaenda mumaguta, atchagogoma nemumutcheto me mugano, atchakwira padyenga penyumba, atchapinda ne mumabhori se mbhava. ¹⁰ Nyika inotekenyeka pamberi pawo, dyenga rinotekenyeka; zua ne mwedzi zwinowa rima, uye nyeredzi dzinodhusa kuetikira kwadzo. ¹¹ Uye Ishe unopurumutsa izwi rake pamberi pe arwi ake; nekuti masodja ake akakura zwikuru; nekuti wakasimba wiya unoterera soko rake; nekuti tsiku ya Ishe yakakura, uye inotyisa; ndiani ungakwanisa kuishingirira? ¹² Saka zwino Ishe unoti: Tendeukai kwandiri ne mwoyo dzenyu dzese, ne mitsanyo, kutchema ne kudyedyera. ¹³ Mwesai mwoyo dzenyu, haiwa matchira enyu. Tendeukai kuna Ishe Mwari wnyu, nekuti Iyena unengone neusisi, unononoka kunyangadzwa, uye wakakura pakunaka, uye unotchindja pakuita zwakashata. ¹⁴ Dyangani Iyena ungapetuka sure uye wotchindja, uye wosia pakwenda kwake maropafadzo, tchimwe tchipo tche zwekurya uye ne zwekumwa kuna Ishe Mwari wenyu? ¹⁵ Rdzai trombone ku Siao, tchenesai umwe mutsanyu, kokai rimwe gungano riswene. ¹⁶ Unganidzai anhu, tchenesai akokwi, unganidzai matchendjevu, unganidzai ana uye arikuamwa; ngabhudye mutchati mumba make, uye mutchati musikana munyumba yake. ¹⁷ Mapirisita, asendzi a Ishe, tchemai pamberi pe nyumba ne aritari, uye buyai: Regererai anhu enyu, Ishe, uye musapase ndtaka yenyu kune kunyodzwa, kuitira kuti marudzi aridzwinyirire. Nekuti pakati pemarudzi aizoti: Uripi Mwari wawo? ¹⁸ Zwadharoko Ishe atchawe ne kutchengeta nyika yawo, uye utcharegerera rudzi rawo. ¹⁹ Uye Ishe utchadyaira uye utchati kune anhu ake: Zwino ndirikukutumirai mikati, sumu yemazambiringa, mafuta, uye mutchagutiswa nazwo; uye amuzowizwe pakunyodzwa pakati pe marudzi. ²⁰ Uye nditchakuvikirai pamberi pemasodja ekumaodza nyemba, uye nditchakandira panyika yakawoma uye yerendje; mberi kwawo kutchawe kwe bhahari rekwatemai dhumba, uye atchafema mwiya wawo unonuha; kuwora kwawo kutchakwira, nekuti aita zwiro zwikuru. ²¹ Usatye iwe nyika; fvara uye dzara ne mufvaro, nekuti Ishe unosoita zwiro zwikuru. ²² Musatye, imwi zwinyama zwe mushango; nekuti mashango emutyambe atchapetukazwe kumera, nekuti miti dzitchabhara mitchero yadzo, muwonde ne muzambiringa dzitchapangidzira kugwinya kwadzo. ²³ Uye imwimwi, ana e Siao, fvarai uye dzarai ne mufvaro munaShe Mwari wenyu; nekuti Iyena utchakupasai nvura yekutanga nekururama, uye utchaita kuti kuwiye pamberi penyu nvura yekutanga neye kupedzisira yepagore, se zwaitika kareko. ²⁴ Uye mwaaka dzitchazara ne kukoha, uye zwifuko zwitchadzara ne vinyu uye ne mafuta. ²⁵ Nekudaro imwimwi mutchapetudzira pamakore akaparadzwa ne makwiza muparadzi, muryi, muputsi ne gwiza muguri-guri, masodja angu akasimba andakatuma kwamuri. ²⁶ Uye mutcharya zwakawanda dzamara maguta; uye mutcharumbidza zina ra Ishe Mwari wenyu, wakaita zwinoshamisa nemwi; uye anhu angu azombovizwe akanyodzwa. ²⁷ Uye mutchazwiziya kuti Inini ndiri pakati pe Iziraeri, uye kuti Inini ndiri Ishe Mwari wenyu, uye akuna umweni; uye anhu angu azonyodzizwe. ²⁸ Uye zwitchaitika kuti nditchadhurura Mwiya wangu pamusoro pe munhu wese; uye anakomana enyu ne anasikana enyu atchaporofita; tchembere dzenyu dzitchawe ne ndoto, uye madjaha enyu atchawe ne zwiwoneso. ²⁹ Uye pamusoro pe asendzi pamatsiku iwona nditchadurura mwiya wangu. ³⁰ Uye nditchaita zwishamiso kudyenga ne panyika; ngazi, moto, uye ne mukumbi we makuta. ³¹ Zua ritchawe rima, uye mwedzi utchawe ngazi, aisati yawiya tsiku guru rinotyisa tsiku ya Ishe. ³² Uye zwitchaitika kuti wese wiya utchadhana zina ra Ishe utchaponeswa; nekuti kudunhu re Siao uye neku Djerusarema utchawoneka kuponeswa, maererano ne zwakabuiwa na Ishe, pakati pe aya anenge asara, aya atchadyaindzwa na Ishe.