¹ Ngase ngiyabona esandleni sangasekudla saloyo lohleti esihlalweni sebukhosi incwadzi legociwe ibhalwe ngembili nangemuva, ivalwe yanamatseliswa ngetimphawu letisikhombisa. ² Ngabona ingilozi lenemandla imemeta ngelivi lelikhulu itsi,'' ngubani lofanele kuvula lencwadzi acatulule timphawu tayo?'' ³ Kute ezulwini noma emhlabeni noma ngephansi kwemhlaba lobekakhona kuvula lencwadzi noma ayifundze. ⁴ Ngakhala ngacacamba ngoba kute lowatfolakala afanele kuwuvula noma kuwufundza. ⁵ Kepha munye walabadzala watsi kimi,''Ungakhali. Buka! Libhubesi laseJudiya , imbewu yaDavide, incobile.Uyakhona kuvula incwadzi acatulule timphawu letisikhombisa.'' ⁶ Ngabona imvu ime emkhatsini wendzawo yesihlalo sebukhosi emkhatsini kwetidalwa letine letiphilako emkhatsini kwebantfu labadzala. Wabukeka kungatsi bamubulele . Bekanetimphondvo letisikhombisa nemehlo lasikhombisa ,lokuyimimoya yaNkulunkulu lesikhombisa letfumelwe kuwowonkhe umhlaba. ⁷ Wahamba wabamba umbhalo ngesandla sangesekudla saloyo lebekahleti esihlalweni sebukhosi. ⁸ Nasesitsatse lencwadzi legocotiwe, tidalwa letine letiphilako nebantfu labadzala labangema-24 bawa phansi embikwemvu. Ngamunye wabo bekane habhunetitja teligolide tigcwele imphepho, lekuyimithantazo yebantfu labangcwele baNkulunkulu. ⁹ Bahlabela ingoma lensha: ''ufanele kutsatsa lencwadzi legocotiwe uyivule ucatulule timphawu tayo. Ngobewena wahlatjwa ,ngengati watsenga bantfu wabatsengela Nkulunkulu kuto tonkhe ticheme, nasetilimini tonkhe ,ebantfwini bonkhe ,nakutonkhe tive. ¹⁰ Wabenta baba makhosi nebaphristi kutsi bakhonta Nkulunkulu wetfu, futsi batawuphatsa emhlabeni.'' ¹¹ Ngatsi ngiyabuka ngeva livi letingilozi letinyenti letatitungelete sihlalo sebukhosi tidalwa letiphilako nebantfu labadzala. Letingilozi setitonkhe bekutigidzi netigidzi netinkhulungwane netinkhulungwane . ¹² Batsi ngelivi lelikhulu,''lofanele yimvu ,lehlatjiwe,kutfola emandla ,bunjinga, buhlakanipha, nekuncoba, ludvumo, nebukhosi, nesibusiso.'' ¹³ Ngeva yonkhe intfo leyadalwa lebeyisezulwini nasemhlabeni nangephansi kwemhlaba naselwandle-konkhe kubo -batsi,'' kulowo lohleti esihlalweni sebukhosi nakulo liwundlu alube ludvumo, sibusiso,bukhosi nemandla ekubusa ,phakadze naphakadze.'' ¹⁴ Tidalwa letine letiphilako tatsi, ''Akubenjalo!'' nebantfu labadzala baguca phansi badvumisa.