¹ Nkulunkulu wamkhumbula Noah, tilwane tasendle kanye nayo yonkhe imfuyo lebeyisemkhunjini. Simakadze wenta kutsi kuhhushe umoya emhlabeni, emanti ke wona ase acala kubotja. ² Imitfombo lejulile kanye nemafastelo elizulu kwase kuyema kutfulula imvula, loko kwase kuba kuma kwemvula. ³ Tikhukhula temanti tabotja kancane kancane emhlabeni, ekupheleni kwemalanga langu-150 emanti abesabotjile impela. ⁴ Umkhumbi wona wema kundanda ngenyanga yesikhombisa, ngelilanga lelishumi nesikhombisa, etikwetintsaba ye Ararati. ⁵ Emanti achubeka kubotja kwaze kwaba yinyanga yelishumi. Kwatsi ngelilanga lekucala enyangeni, kwabonakala ticongo tetintsaba. ⁶ Emva kwemalanga langemashumi lamane Nowa walivula lifastelo lemkhumbi labelakhile. ⁷ Watfumela lihhwabayi lelehla lenyuka lindiza aze emanti oma emhlabeni. ⁸ Wase utfumela lituba entela kubona kutsi emanti abesabotjile yini emhlabatsini, ⁹ kepha lelituba alizange likhone kubeka lunyawo, lwalo etikwemhlaba lavele labuyela kuye emkhunjini, ngenca yekutsi emanti abesolo angakomi kahle emhlabatsini. Welula sandla sakhe, walitsatsa walingenisa emkhunjini kanye naye. ¹⁰ Walindza letinye tinsuku letisikhombisa waphindze watfumela lelituba lebe lisemkhumbini. ¹¹ Lituba lona labuyela ekushoneni kwelilanga kuNoah. Bona! Emlonyeni walo bekunelicembe lelalincutfwe esihlahleni semncumo. Loko kwenta kutsi Noah ati kutsi emanti abesabotjile emhlabeni. ¹² Waphindze walindza letinye tinsuku letisikhombisa, waphindze walitfumela lelituba. Aliphindzanga labuyela kuye. ¹³ Kwatsi ngemnyaka wemakhulu lasitfupha nemnyaka wekucala, ngelilanga lekucala enyangeni yekucala, emanti abesomile emhlabatsini. Noah wasisusa sivalo semkhumbi, wabuka ngephandle, wakhandza kutsi umhlabatsi besewomile. ¹⁴ Ngenyanga yesibili, ngelilanga lemashumi lamabili nesikhombisa enyangeni, umhlaba besewomile. ¹⁵ Simakadze watsi ku Noah, ¹⁶ '' Phuma emkhunjini wena, umkakho, emadvodzana akho kanye nebafati bawo. ¹⁷ Phuma kanye nako konkhe lokuphilako kwayo yonkhe inyama -- tinyoni, nako konkhe lokunwabutelako emhlabatsini-- kute kutokwandza kakhulu emhlabeni, kute kutalane kwandze emhlabeni.'' ¹⁸ Nowa ke wase uyaphuma nemadvodzana akhe, umkakhe, nabomakoti bakakhe. ¹⁹ Konkhe lokuphilako, konkhe lokunwabutelako, nalolonkhe luhlobo lwetinyoni, konkhe lokuhamba emhlabatsini, ngekwemindeni yako, kwaphuma emkhunjini. ²⁰ Noah wakhela Simakadze lilati. Watsatsa letinye tetilwane lebetihlantekile naletinye tetinyoni lebetihlantekile, wenta umhlatjelo wekushiswa elatini. ²¹ Simakadze weva liphunga lelimtfokotisako wase utsi enhlitiyweni yakhe, ''Angiphindzi ngiwucalekise umhlaba ngenca yemuntfu, nome tinjongo tetinhlitiyo tabo titimbi kusukela ebuntfwaneni. Angiphindzi futsi ngibhubhise konkhe lokuphilako, njengobe ngentile. ²² Yingci umhlaba nawusekhona, kuhlanyela nekuvuna, kubandza nekushisa, busika nelihlobo, imini nebusuku angeke kuphele.