¹ Ungacali unikete umbiko longemanga nganobe ngubani. ² Ungahlanganyeli nendvodza lekhohlakele kute ube ngufakazi longaketsembeki. Ungalandzeli sicumbi kute wente lokubi, noma wetfule bufakazi nawusehlangotsini lwesicumbi kutei ingalo yemtsetfo inganokwenteka. ³ Ungakhombisi kukhetsa endvodzeni lemphofu nayitekiswa licala ⁴ Nawuhlangana nenkhabi yesitsa sakho noma imbongolo yakhe iduka, funa uyibuyisele kuye. ⁵ Nawubona imbongolo yalomunye lokutondzako iwele phansi nemtfwalo wayo, ungamushiyi loyo muntfu. Funa noma kanjani umusite nembongolo yakhe. ⁶ Ungacali unyundzele lomphofu kute ingalo yemtsetfo ingamusebenteli. ⁷ Ungahlanganyeli nalabanye ekwenteni tinsolo letingemanga, futsi ungacali ubulale labangenacala noma labamsulwa, ngoba ngingeke ngibahlenge labakhohlakele. ⁸ Ungacale utsatse umdizo, ngoba umdizo umphumputsalisa labo lababonako, bese kugucula emavi ebantfu labacotfo. ⁹ Ungacali ugcilate sihambi, njengobe uyati imphilo yesihambi, ngoba nani benitihambi eveni lase Gibhithe. ¹⁰ Ngako iminyaka lesitfupha nitohlanyela emhlabatsini wenu bese nihlanganisa kulomkhicito. ¹¹ Kepha kulomnyaka wesikhombisa nitowuyekela ningakawulimi nekuwugucula, kuze laba labamphofu emkhatsini webantfu benu batokudla. Loko lebakushiyako, tilwane tasendle titokudla. Nitowenta loku fanako nasesivinini senu nasensimini yemincumo. ¹² Kulamalanga lasitfupha nitowenta umsebenti wenu, kepha ngelilanga lesikhombisa fanele niphumule. Yenta loku kute inkhabi yakho kanye nembongolo yakho itotfola kuphumula, phindze kute tigcila takho letinsikati temadvodzana netetihambi titophumula futsi bavuseteleke. ¹³ Nakisisa konkhe lengikushito kuwe. Ungacale usho emagama alabanye bonkulunkulu, noma uvumele emabito abo evakale emlonyeni wakho. ¹⁴ Ubohamba uyobamba umkhosi wami emahlandla lamatsatfu ngemnyaka. ¹⁵ Funa nibobamba umkhosi wesinkhwa lesingenambiliso. Njengoba ngikuyalile, utawudla sinkhwa lesingena mbiliso emalanga lasikhombisa . Ngaleso sikhatsi, uyawuse uvela embikwami ngenyanga ya Abhibi, lebekelwe leyo nhloso. Kwakungaleyo nyanga lapho waphuma khona eGibhithe. Kepha ningacali nivele embikwami nite lutfo esandleni. ¹⁶ Funa nibogcina umkhosi wesivuno, sitselo sekucala semisebenti yenu nanitjala inhlanyelo kulamasimi. Futsi nibogcina umkhosi ekuhlanganyeleni ekupheleni kwemnyaka, nanihlanganisa imikhicito yenu emasimi enu. ¹⁷ Bonkhe labadvuna benu funa bavele embikwe Nkhosi Simakadze katsatfu ngemnyaka. ¹⁸ Ninganikeli ngengati emihlatjelweni leyentiwe kimi ngesisinkhwa lesinembiliso. Lamafutsa alemihlatjelo kulomukhosi wami angasali busuku bonkhe kuze kuse. ¹⁹ Funa niletse letikhetsekile tekucala titselo eveni lenu endlini yami, indlu yaSimakadze Nkulunkulu wenu. Ningacali nibilise lizinyane lembuti elubisini lwa makwalo. ²⁰ Ngitotfumela ingilosi embikwenu itonigadza endleni, bese iniletsa kulendzawo lengiyilungisile. ²¹ Nilalelisise kuye bese niyamtfobela. Ningamucansuli, ngoba ngeke iticolele tiphambuko tenu. Libito lami likuye. ²² Nangabe ngempela nitfobela livi lakhe bese nenta konkhe lenginitjela kona, ngitobese ngiba sitsa etitseni tenu bese ngilwa nalabalwa nani. ²³ Ingelosi yami itohamba embikwenu bese iniletsa kuma Amori, emaHethi, emaPheresi, nemaKhenani, nemaHivi, nemaJebhusi. Ngitobabhubhisa. ²⁴ Ningakhotsami kubo nkulunkulu babo, nibakhonte, noma nente njengoba benta. Esikhundleni, nibobehlisisa bese nibhidlita tinsika tetibondza tabo tibe ticucu. ²⁵ Nibokhonta Simakadze Nkulunkulu wenu, utobese ubusisa sinkhwa senu kanye nemanti. Ngiyo susa kugula emkhatsini wenu. ²⁶ Kute wesifazane lotoba yinyumba, noma aphunyelwe luswane eveni lenu. Ngitoninika imphilo lendze. ²⁷ Ngiyotfumela kwesaba kwami kulabo lebahlale kucala kunani. Ngiyawubulala bonkhe labantfu leniyohlangana nabo. Ngiyawenta tonkhe titsa tenu tinifulatsele ngekwetfuka. ²⁸ Ngitotfumela bomanyovu embikwenu kute batokhokha ema Hevi, emaKhenani kanye nema Hethi embikwenu. ²⁹ Ngingeke ngibakhokhe embikwenu ngemnyaka munye, ngoba lelive litoba tindzala, bese netilwane tesiganga tibatinyenti kini. ³⁰ Esikundleni, ngiyobakhokha kancane kancane embikwenu nize nitsele bese niyalitsatsa lelive. ³¹ Ngitolungisa imincele yenu elwandle lwemhlanga kuya elwandle lema Filisti, bese kuya ehlane kuya eUfrathe umfula. Ngitoninika kuncoba kulelive nebahlali balo. Niyawubakhokha embikwenu. ³² Ningenti sivumelwane nabo noma nabo nkulunkulu. ³³ Bangahlali eveni lenu, noma banente nente sono kimi. Nanikhonta bonkulunkulu babo, loku nomakanjani kutoba lugibe kini.