¹ Uma umuntfu eba inkhabi noma imvu ayibulale nome ayitsengise, kufanele abhadale ngetinkhabi letisihlanu iyinye, netimvu letisihlanu imvu iyinye. ² Uma lisela libanjwa ligcekeza, bese lishaywa liyafa, kute loyawetfwala licala lekubulala ngenca yalo. ³ Kepha uma agcekeza seliphumile lilanga, licala lekubulala liyawubasetikwalowo lombulele. Lisela kufanele libhadale. Uma ete lutfo, kufanele kutsengiswe yena ngenca yalokweba kwakhe. ⁴ Uma lesilwane lasebile sitfolakala kuye sisaphila, noma yinkhabi, nome yimbongolo noma yimvu kufanele abuyisele ngalokuphindvwe kabili. ⁵ Uma umuntfu adlisa tinkhomo takhe ensimini nome esivinini bese uyekelela lesilwane, sidle emasimini alomunye, kufanele abhadale ngalokuncono kakhulu emasimini akhe nome lokuncono kakhulu etivinini takhe. ⁶ Uma kuphunyuka umlilo bese wandza emanyeveni kuze kutsi ngisho kudla lebekugcinwe kahle, nome lokomile kusemasimini, nome ke insimu ishe iphele, impela kufanele kutsi lowo locale lomlilo abhadale. ⁷ Uma umuntfu anika makhelwane wakhe imali nome imphahla kutsi amgcinele yona,uma kwenteka kutsi bese kuyebiwa kulendlu yalendvodza, uma nalelisela litfolakala, lelisela kufanele libhadale ngalokuphindvwe kabili. ⁸ Kepha uma ngabe lelisela lingatfolakali, lomnikati walendlu kufanele avele embikwebahluleli kutobonakala kutsi ngabe akasifaki yini sandla ekunyamalaleni kwaletintfo talomakhelwane wakhe. ⁹ Yonkhe imibango ngelutfo lolutsite, nome yinkhabi, imbongolo, yimvu, kwekwembatsa, nome ke seyini lelahlekile latsi umuntfu, ''Loku kwami,'' lokubanga kwabo bobabili kufanele bese kumikiswa kubehluleli. Lendvodza bahluleli labayitfola inelicala kufanele ibhadale ngalokuphindvwe kabili kulomakhelwane wayo. ¹⁰ Uma umuntfu anika makhelwane wakhe imbongolo, inkhabi, imvu, noma ngusiphi silwane kutsi amgcinele kona, besekuyenteka kutsi kufe noma kuyalimala noma kuyeduka kungabonwa ngumuntfu, ¹¹ kufanele bona bobabili bente sifungo embikwa Simakadze, kutsi kute yini emkhatsini wabo lofake sandla kulesilwane samakhelwane. Lomnikati kufanele akwemukele loko, lomakhelwane ke yena kute latakubhadala. ¹² Kepha uma kukhona lokwebe lakuye,kufanele ambhadale lomnikati wako. ¹³ Uma silwane sidzatjudzatjuliwe, lobekagcine lesilwane kufanele aletse bufakazi ngeticucu letisele. Angeke ambhadale makhelwane ngobe silwane sidzatjudzatjuliwe. ¹⁴ Uma umuntfu eboleka silwane kumakhelwane wakhe bese lesilwane siyalimala nome siyafa lomnikati angekho, impela kufanele lolomunye ambhadale. ¹⁵ Kepha uma loko kwenteke akhona nalomnikati, akukafaneli kutsi lona bekasebolekile abhadale; nangabe lesilwane besicashiwe sesitawubhadaleka ngalemali lekhokhwe nasicashwa. ¹⁶ Uma indvodza iwunga intfombi lesengakatsembisi,uma kwenteka ilala nayo,Impela kufanele bese uyamtsatsa umenta umfati wakhe ngekutsi akhiphe emalobolo lafanele lesento. ¹⁷ Kepha uma uyise walentfombi aphiphita ala kumnika lentfombi, kufanele ahlawule ngemali lelingana nemalobolo etintfombi. ¹⁸ Sangoma lesisikati ningasivumeli kutsi siphile. ¹⁹ noma ngubani lolala nesilwane kufanele abulawe impela. ²⁰ Nome ngubani lowenta umnikelo wemhlatjelo kulomunye nkulunkulu ngaphandle kwaSimakadze kufanele abhujiswe ngalokuphelele. ²¹ Ningasiphatsi kabi sihambi nome nisicindzetele ngobe nani nake naba tigcila eGibhithe. ²² Ningamphatsi kabi umfelokati nome umntfwana lote uyise. ²³ Uma nibahlupha, bese bakhala kimi, mine ngitakuva kukhala kwabo. ²⁴ Lulaka lwami lutawuvutsa, bese nginibulala ngenkemba; bafati benu bataba bafelokati, nebantfwabenu babete boyise. ^{25 27} Uma uboleka lomunye webantfu bami labaswele emkhatsini wenu imali, ungabolingisa umbolekisi wemali kuye nome umfune intalo. ²⁶ Uma utsatsa kwembatsa kwamakhelwane wakho njengesibambiso, ubokubuyisela kuye lingakashoni lilanga, ngobe kuphela kwako latembesa ngako; sembatfo semtimba wakhe. utabese ulala ngani? Uma akhala kimi,mine ngitamuva ngobe nginesihe. ²⁸ Ningangihlambalati mine, Simakadze, futsi ningamcalekisi umbusi wesive senu. ²⁹ Ningawugodli umnikelo wesivuno senu noma walebenikuhluta. Nibonginika ematibulo kumadvodzana enu. ³⁰ Nibowenta njalo nangetinkhabi netimvu tenu. Kubohlala kubonina emalanga lasikhombisa, Kepha ngelilanga lesiphohlongo nibokunikela kimi. ³¹ Nitaba bantfu labehlukaniselwe mine. Ningaboyidla inyama ledzatjulwe tilwane endle. Kunaloko, niboyinika tinja.