¹ Cwale Jesu hasuka helundu, vantu vangi civamwi cilila. ² Micwale we imbingwa ca keza kwali, cheza kumufukamina ,niku wamba, "Simwine, haiva usaka, uwola kuni cenisa." ³ Jesu chaotolola iyanza ni kumukwata, nikuwamba, "Ni saka. Ucene." Hahofera ca cenisiwa kwi imbwingwa yakwe. ⁴ Jesu camuwambila, "Uvone kuti kowambi cimwi u zumwi muntu. Yende mwi nzila yako, mi ukalivonahaze ku mupurisita ni kukaha impo ina Mushe yavalaeli, kuti ikabe vupaki kuvali." ⁵ Jesu hache njile mwa kapenaumi, mukulwana wa masole abakezi kwali ni ku mubuza, ⁶ nati, "Simwine, muhikana wangu ulele mwinzubo uzuminine imi uchisitwe bubilala." ⁷ Jesu chati kwali, "Munize ni muhoze." ⁸ Mulauli chetava ni kuwamba, "Simwine, kaniswaneli kuti winjile mwi nzuvo yangu, uwambe vulyo inzi, mi muhikana wangu kahole. ⁹ Kakuti ime ni muntu ubikitwe mwikonde lya muvuso, mi nina masole vena mwikonde lyangu. Niwambila uzu,´Yende,´ mi uyenda, ni kuzumwi, ´Wize´mi ukeza, ni kumuhikana wangu, ´Pange ici,´mi ucipanga." ¹⁰ Cwale Jesu hazuwa izi, avakomokwa mi avawambili avovava kumwichilile, "Ceniti nimiwambila, kanini kuwana kale we ina intumelo mwa Isilaele. ¹¹ Nimi wambila, bungi kabazwile kwa upa ni wiko, mi mubekale he ntafule ni Abrahama, ni Isaka, ni Jacobo, mu mubuso wa kwiulu. ¹² Kono bana bamu mubuso kaba sohelwe kwi fifi lyahanze, kwina kulila ni kukwenga meeno." ¹³ Jesu chawambila mukulwana wa chisole, "Yende! Sina ha wazumina, ili kuti ku bebulyo kwako." Mi muhikana abaholi mweyo inako. ¹⁴ Jesu habakwina mwi nzuvo ya Petorosi, cavona mukwenyani wa Petorosi nalele a valwalite ifiva. ¹⁵ Jesu a vamukwati he yanza, mi ifiva ci lyamusiya. cavuka ni kutanga kumuseveleza. ¹⁶ Cwale hakuva Citengu, vantu civaletela Jesu vantu vangi vavakuyendiswa madimona. Avahindiki inhuho ce inzwi nikuhoza vavakulwala vonse vava kulwala. ¹⁷ Mwei inzila kuvezuzilizwa civawambwa ku mupolofita Isaya, nawamba, "iye mwine Avalihindili matuku etu ni mifokolo yetu. ¹⁸ Jesu havona inyangela ci imuzumbulukite, caha itaelo kuti vayende kuimwi imbali ye wate lya Galileya. ¹⁹ Cwale Muñoli ca keza kwali ni wamba, "Muluti, munikwi cilile konse kwete uyende." ²⁰ Jesu cawamba kwali, "Valuwawa vena malindi, ni zizuni zamwi ulu zina zizumbo, kono Mwana Muntu kena hete a shamike mutwi wakwe." ²¹ Zumwi kuvalutiwa vakwe cawamba kwali, "Ireeza, ni zuminine pili nikaunge vandanda." ²² Kono Jesu ca muwambila, "Niicilele,mi usiye vafwile vaunge vafwile kuninavo." ²³ Jesu hecila mucisepe, valutiwa vakwe ci va mwicilila mucili. ²⁴ Micwale, cikweza inwungwa ikando mwiwate, micisepe ciceza kuumbwa mandinda. Kono Jesu abalele. ²⁵ Valutiwa bakwe civeza kumuvusa, ni vawamba, "Tutuse, Simwine, citwina hafuhi ni kufwa!" ²⁶ Jesu cawamba kubali, "Cinzi hamutiyite, inwe be intumelo inini?" Cazima ni kukalimela luhuho ni liwate. Haho cikwa tontola ahulu. ²⁷ Vantu civakomokwa ni kuwamba, "Muntu wina bule uzu, yo kutekiwa niheva luhuho ni wate?" ²⁸ Jesu hakeza kwimbali imwi ni kwi nkanda ya Magadarena, bakwame VoVele vava kuyendiswa madimona civamukatana. Vavakuzwa mumavita mi vavali kutiza hahulu, mi mane kakwina muyenzi yava kuwola kukosaza ce inzila iyo. ²⁹ Micwale, civalila ca kuwongoza ni vawamba, "Cinzi citulukela kupanga nawe, Mwana Ireeza? Weza kunu kwiza kutu kataza inako niseni kusika?" ³⁰ Mukunyi wa ziguluve zingi uva kwete kufulila kule kanini navo. ³¹ Madimona azwili havusu ni kukatazaJesu ni awamba, "Haiba motuhindike, tutumine kuna kawuna mukunyi waziguluve." ³² Jesu cawamba kubali, "Muyende!" Madimona ciazwa ni kuyenda muzigulube. Micwale, mukunyi wonse chiwa tilila hekomwe nikuli wisikiza mwiwate micizafwila mumenzi. ³³ Vakwame vavaku lisa zigulube civatiya. Mi ha vayenda mwitolopo civakaviha zintu zonse, sihulu civapangahali kuva kwame vava kuyendiswa madimona. ³⁴ Micwale, itolopo yonse civazwa kukakatana ni Jesu. Ha vamuvona, civamukumbila kuti azwe mwinkanda yavo.