¹ I vaati Luzuva lwe Insaavata chiinga lwa mana, Mariya Magadalena nne Mariya nyina wa Jemusi, nne Salome vava ka wulyi mafuta kuti veeze va ka siinge muviri wa Jeeso. ² Ka ku sasaani ahulu ku siri ku luunza luzuva lwe intanzi lwe insuunda, nni va fumina ku ikuumbu izuva chi lyi zwa. ³ Va vaalyi ku wambinsaana, ''Injeeni yeeti a ka tu chunduluseza ivwe lyiina ha mulyaango we ikuumbu?'' ⁴ Mmi yi vaati chi va nyemuna menso, nni va vona kuti ivwe lyi zwiisiizwa, mu kuti lyi vaalyi ikaando. ⁵ Nni ve injira mu ikuumbu choku vona mulombwaana a vaa zweete ku tuva, nne ikeere ku malyo, nni vaa komokwa. ⁶ Nnaa vacho kuti, ''Saanzi mu tiyi. Mu saka Jeeso wo mu Nazareta, iiye a va vambulwa. U vuukite! Ka heena aha. Mu vone ha chivaka ha vava mutuulyite. ⁷ Mmi mu yeende, mu ka lwiire varutwana vaakwe nne Pitorosi kuti u kaya vu yeendera ha vusu vweenu kwa Galaleya. Ka mu kamu vone koo kooko siina mwa va mulwiiri.'' ⁸ Nni va zwa mu ikumbu nni va kaya vutiya; nni va chachalyikite nne ku komokwa. Ka kwiina u va vaa lwiiri che ivaaka lyo kuti va veena lyowa. ⁹ Ka ku sasani a hulu nni ku siri ku luunza izuva lye ntanzi lye insunda, cho mana ku vuuka, choku kalyi vonesa kwa Mariya Magadalena, waa va zwiisa madimona eena ku mana iyaanza nne toovere. ¹⁰ Nnaa zwa choku ka lwiira va veena nnaavo, chi va vaalyi ku sii kweete ku mulyira. ¹¹ Va vaa zuwi kuti u hala mane a vaa vonwa naaye, mmi ka heena vaa va zumini. ¹² Ha masulye eezi zintu a vaa kalyi vonahaza mu vantu vooveere va vaalyi kuya vu yeenda mu nzira. ¹³ Nni vaa yeenda choku kalwiira varutwwana voonse, mmi nni va vula ku zumina. ¹⁴ Ku zwaaho Jeeso naa lyi toondeza kwaavo va veena ikumi nne kamwiina chiva sii keere nni valyia he itafulye, choku va lwiisikiza ku vula itumero kwaavo nne inkulo inkukutu, che ivaka lyo kuti keena vava zumini avo vava mu voni chiinga mana ku vuuka mwaavo va fwiire. ¹⁵ Nna vacho kuti, ''Mu kwiiya mu inkaanda yonse, mu ka chumayire mulaeza mu vantu voonse. ¹⁶ Iiye yo zumina choku kolovezwa kaa hazwa, mmi iiye yaa saa zumini ka nyanswa. ¹⁷ Iizi zitoondezi kazi yeende naavo va zumina: Mu izina lyaangu ka va zwiisa Madimona. Ka va waambe mu indimi zihiya. ¹⁸ Ka va woonde inzoka cha maanza aavo, mane hape ka vati nni ha vanywa chinywantu chi ihaya, keeti chichi va sasamisa. Ka va viike valwaala maanza, ku zwaaho ka va holye." ¹⁹ Yi vaati Simwiine choo mana ku waamba nnaavo, nna a taantusizwa ku iwulu choku ke ikala ku iyaanza lye Ireeza la malyo. ²⁰ Varutwaana nni vaazwa choku ka kutaza kumwe nne kumwe, voovo vulyo Ireeza nneena naavo nne izuziriza manzwi che zitoondezi ziva vaalyi ku panga mukati kaavo.