¹ Ha kusasani, Vapurisita vakulwaana nni va kopana nne vakulwaana nne vangolyi nne voonse va ziululyi va Vajuda. Ku zwaaho nni vaa sumina Jeeso choku muhindira kuungi. Nni va mulyeeta kwa Pilato. ² Pilato nna mu vuuza kuti, ''Aa njoowe Simwiine wa Vajuda?'' Nna mu itava kuti, ''Chi waa waamba." ³ Vapurisita vakulwaana nni va lyeetera Jeeso milaandu miingi. ⁴ Pilato hape nna mu vuuza, "Ka wu itavi? ''Vone kuti milaandu yoolye yi va kweete vaku hambirza!" ⁵ Mmi Jeeso naa ziimika ku itava Pilato, ku zwaaho iichi nni cha mukomosa a hulu maaswe. ⁶ Mmi lyiinu mu inako yo mukiti, Pilato a vaalyi ku sumunuaanga ibantiti lwii mwiina, ibantiti lyiva vaalyi ku kuumbiraanga. ⁷ Kwa teni uuko nne zihanga mu intorongo, mukati ke ziihayi va vaa woondeerwa vuhanga vwaavo, ku veena mukwaame yaa vaalyi ku suumpwa Barabasi. ⁸ Chiina vuungi nni che iza kwa Pilato, choku taanga nni chi mukumbiira kuti a va chitire mwaa vaalyi kuva chitiraanga kalye. ⁹ Pilato nna a vee tava cho kuti, "Mu saka kuti nni mu zwiisikiza Simwiine wa Vajuta?" ¹⁰ Ka kuti a veezi kuti ivaalyi cha mavaka o muna chiingi Vapurisita vakulwaana va vaa lyeeti Jeeso kwaalyi, ¹¹ Mmi Vapurisita vakulwaana nni vaa ngunduganya vantu kuti ku zwiiswa Barabasi nni ha kuva vulyo. ^{12 13} Pilato nna a ve itava hape kuti, ''Lyiinu nni chite nzi cha Simwiine wa Vajuda?'' Nni vaa huwa hape, "A vaambulwa!" ¹⁴ Pilato nna vacho kuti, "Mulaandu iinzi waa chiite?" Mmi aavo nni va zwiira kuvusu nni va huwa, "A vaambulwa." ¹⁵ Pilato nna saka ku koonda vantu, lyiinu nna a va zwiisikiza Barabasi. Choku shimeha Jeeso ku zwaaho choku mu vaha kuti va mu vaambulye. ¹⁶ Masolye nni va mu hiindira mu irapa (iiyo yi vaalyi nje inzuvo inkaando yo muvusu), nni vaa suumpa chikwata choonse cha masolye. ¹⁷ Nni vaa muviika chizavalo iiye Jeeso chi kola chi suvira, ku zwaaho mane choku mu pangira ihwiisi yo miiya cho kuyi mu zavika. ¹⁸ Nni vaa taanga ku mu kuteka choku shewunwiina nni vati, "Rumere, Simwiine wa Vajuda!" ¹⁹ Va va mukavi mu mutwi nne ku muswiira mate. Nni va mufukamina cho kulyi chitisa iiri va murapera. ²⁰ Chiinga vaa mana ku mu shewunwiina, choku mu zavula ijira lyi kola lyi suvira ku zwaaho choku mu zavika zizwaato zaakwe, mane choku mu hiindira kuunze kuku ka mu vaambula. ²¹ Nni vaa hambiriza muntu yaa vaalyi kulyi hitira nna kazwa kuungi kuti a hiinde chitavero cha Jeeso, mukwaame yaa vaalyi ku suumpwa Sayimoni wa Serene iisi wa Alekizanda nne Rufaasi. ²² Masolye nni va lyeeta Jeeso mu chivaka chi suumpwa Gologota (chiku landununwa njo kuti, Chivaka cha kagovolyi"). ²³ Va va muhi vujwara vu kopeenywa nne mafuta a nuunkisa vulotu, mmi nna kaana ku vunywa. ²⁴ Va va muvambulyi choku kauhanya chizavalo chaakwe choku kava indawula ku vona kuti isolye lyimwe nne lyimwe mulyi hiinde chibalyi chihi. ²⁵ Yi vaalyi inako yo vuutatu chiva mu vaambula. ²⁶ Nni va ngola ha shishupo milaandu yaakwe, "Simwiine wa Vajuda." ²⁷ Mmi nna vambulwa nne vasa voovere, zumwe nnena mu iyaanza lya malyo zumwe nneena ku mamonso. ²⁸ Mmi ingolo nni lyee zuzirizwa lyicho kuti, ²⁹ Aavo va vaalyi ku hita nni va mutuka, nni va nyuunga mitwi yaavo nni vati, "Aaha! uuwe yoo vaalyi ku woola ku rutununa iteempere choku yi zaaka mu mazuva ootatwe, ³⁰ Lyi haze mane u suuke haansi lye chifwapaano!" ³¹ Che nzira yi swana Vapurisita vakaando va vaalyi ku mushewunwiina voonse, nne vangolyi, nni vaacho kuti, a vaa haza vantu vaangi, mmi lyiinu iiye ka woolyi kulyi haza. ³² Lyiinu a Kirisiti, Simwiine wa Isiraera, a suuke ha hanu vuti ha chifwapaano, kuti tu woolye ku vona choku zumina." Mmi mane nnaavo vava vambulwa nnaaye nni va mutangoola. ³³ Che inako yoku mana iyaanza nne ka mwiina keerima nni ka wuumba inkaanda yoonse mbwiita che inako yoku mana iyaanza nne toonne. ³⁴ Che inako yoku mana iyaanza nne toonne Jeeso nna huwa che lyiinzwi ikaando, ''Eloyi, Eloyi, lama savakatani?'' yi landununwa kuti, "Ireeza waangu, Ireeza waangu, Uni soherereere inzi?" ³⁵ Vamwe vava ziimeene ha fwiihi nni vaa zuwa maanzwi aakwe ku zwaaho cho kucho kuti, "Mu vone kweete u suumpa Elija." ³⁶ Zumwe nna ngoombola, choku ka viika shaantukwe ha chipoonji, kuchi someka ha luhe, ku zwaaho choku muha kuti anywe. Mukwaame wa teni nnaacho kuti, "Tu vone nandi Elija mweeze a mu suusa." ³⁷ Lyiinu Jeeso nna huwa che lyiinzi ikaando mmi nna fwa. ³⁸ Mmi ijira lyo mu iteempere nni lyaa haluka koovere kuzwa ku iwulu lya teni kuya haansi. ³⁹ Mmi lyiinu musenchurona yaava lolyereere Jeeso chiinga vona kuti lyiinu chaa fwa che iiyi inzira, nnacho kuti, "Cho vusakusima uuzu unkosi, Mwaana we Ireeza." ⁴¹ Mmi ku veena vakulwaakazi vava lolyereere nni va ziimeene halyezana. Mukati kaavo ku veena Mariya Magadalena, Mariya ( nyina wa Jemusi nne mwaanche wa Josese), nne Salome. ⁴⁰ Ka kuti cho u siina kwa Galaliya va vaati nni va mushaala mu masulye nne ku muteendera. Mmi hape nne vakulwaakazi vaangi nni veeza nnaaye nni va keeza kwa Jerusalema. ⁴² Chitengwaana chiinga chaa sika, ka kuti chilyi vaalyi Izuva lyo kulyi Tukisereza, iilyo nje, izuva lyiina ha vusu vwe Insavata, ⁴³ Joosefa wa Aramatiya nne za kwa teni. A vaalyi mukwaame yoo kutekeha wo vukopano, yaa va zimaniine muvuso we Ireeza. A vaa yeendi kwa Pilato nna seena lyoowa choku ka kumbiira chitupu cha Jeeso. ⁴⁴ Pilato nna komokwa kuti Jeeso mane chaa fwa kalye; mmi choku suumpa musenchurona choku mu vuuza nandi Jeeso chaa fwa kalye. ⁴⁵ Lyiinu Pilato chiinga a lyemuha cho musenchurona kuti Jeeso chaa fwa, muviri wakwe nna wuha Joosefa. ⁴⁶ Joosefa a va ka wulyite ijira ihiya. Nna a ka mu suusa ha chifwapaano, naa mu hambeera che ijira, choku ka muviika mu ikuumbu lyi vaa veezetwa mu ivwe. Ku zwaaho nna pindumwiina ivwe ha mulyaango we inkuumbu. ⁴⁷ Mariya Magadalena nne Mariya nyiina Josese nni vaa vona haa va wuungwa Jeeso.