¹ Otcha ku Jesus riba pa Kafarnaun, dipus di alguns dias, guintis bin obi kuma Jesus staba na kasa. ² Manga di guintis djunta nunde ku Jesus staba nel, tok lugar ka temba mas, nin na porta, Jesus staba na konta ki guintis palavra di Deus. ³ alguins guintis tisiba pa Jesus un omi manku, kuatru guintis kargalba. ⁴ Ma e ka pudiba tchiga pertu di Jesus pabia guintis tchiuba dimas. N'ton, e tira kubertura di kasa na ki lugar nunde ku Jesus staba nel, e fasi un buraku na tetu, e rianta kanape djuntu ku omi manku ku ditaba nel. ⁵ Jesus odja pa se fe, i fala omi manku: '' fidju, bu pekadu sta purdadu''. ⁶ I temba la alguns pursoris di lei ku staba na pensa na se korson: '' ⁷ kuma ku e omi pudi papia de manera? I sta na lebsimenti! Kin ku pudi purda pekadu si i ka Deus?'' ⁸ kinti kinti, Jesus, sibiba na si Spiritu ke ku e sta na pensa entri delis, I fala elis: '' ⁹ Ke ku manda bo sta na pensa e kusa na bo korson? Ke ku mas fasil fala e omi manku: '' bu pekadu sta purdadu'' o fala: '' lanta, pega bu kanape bu ianda''? ¹⁰ Ma, pa bu sibi kuma Fidju de Omi tene puder na tera pa purda pekadu,'' I fala manku:' ¹¹ ''Ami falu: '' lanta, pega bu kanape bu bai pa bu kasa''. ¹² I lanta djanan, i pega si kanape i sai di ki kasa dianti di tudu guintis, na manera ki tudu guintis fika dimiradu e n'gaba Deus e staba na fala: ''nuka no ka tchiga di odja un kusa su es''. ¹³ I bin sai mas pa bera di mar, manga di guintis bin pa el, n'sina elis. ¹⁴ Otcha ki na pasa, I odja Levi, fidju di Alfeu, ku sinta ba nunde ke ta kobraba m'pustu, I falal: ''siguin'' i lanta i siguil. ¹⁵ Otcha Jeus staba na mesa na kasa di Levi, manga di kobraduris di m'pustu ku guintis ku kustuma fasi pekadu e na kumeba ku Jesus ku si disipulus, pabia manga di guintis na siguil ba, ¹⁶ otcha ku pursoris di lei di Farizeus odja kuma Jesus staba na kume ku kobraduris di m'pustu, e papia ku disipulus ali Jesus e fala elis: '' pabia di ke Jesus na kume ku kobraduris di m'pustu ku guintis ku ta fasi pekadu''. ¹⁷ Otcha Jesus obi es, I fala elis: ''alguin ku san ka pirsisa di mediku; son duenti ku pirsisa. N'ka bin pa tchoma justus, ma guintis ku ta fasi pekadu''. ¹⁸ Disipulus di Djon ku di farizeus staba na djundjun'gha alguns guintis bin pa Jesus e puntal:'' pabia di ke ku disipulus di Djon ku di Frizeus ta djundjun'gha , ma bu disipulus ka ta djundjun'gha ?'' ¹⁹ Jesus punta elis: '' anta kilis ku kumbidadu pa kasamenti ta djundjun'gha na ora ku noivu sta inda ku elis? Na mumentu ku e tene noivu, e ka pudi djundjun'gha. ²⁰ Ma dias na bin n'de ku noivu na tiradu delis, e na djundjun'gha. ²¹ ninguin ka ta menda un padas di ropa nobu na un ropa bedju; si alguin fisi kila, ki menda na rumpi ki ropa bedju, asin kau mas garandi na danadu. ²² Ninguin ka ta pui vinhu nobu na sakus bedju; si i fasi kila, ki vinhu nobu na rumpi kur, asin vinhu djunta ku sakus na dana. I mindjor, pui vinhu nobu na sakus nobus''. ²³ Na un dia di sabadu, i kontisi, Jesus na pasaba na alguns ortas, si disipulus kunsa na iabri kaminhu e staba kebra garans di midju. ²⁴ Farizeus papia ku El e falal: ''djubi, pabia di ke ku manda e na fasi un kusa ku ka dibi di fasidu na dia sabadu''. ²⁵ I fala elis: '' bu tchiga di lei ke ku Davi fasi otcha ki teneba nesessidadi ku fomi, el ku guintis ku sta ku el? ²⁶ Kuma i ianda na kasa di Deus otcha Abiatur seduba garandi di saserdoti i kume pon ku staba na pirsensa di Deus, ku ka dimitidu pa kalker alguin kumel, son saserdotis; i dal tambi pa kilis ku staba ku el''? ²⁷ Jesus fala:''sabadu i fasidu pa omi, i ka omi ku fasidu pa sabadu. ²⁸ Tudu manera, Fidju di Omi i Sinhor di sabadu''.