¹ Ene we, wakona kughamba eyi yina kukuwa no muragho ghomatawero. ² Muhonge hatutughuru hohakuru haghombape, maghanomwene,kwiyuka mumatawero, muruhakitho no mumakutureromo. ³ Shime karo mundhira dhofotji muhonge ha mbuyama hohakuru hakare no mi dhoghuhunga, mbadi ghokughamba ghumbango, endi ghupika kuvinyu ghomwingi, ene ha kare hahongi kuyinu yoyiwa, ⁴ no mudeghure hashengeteya ha hake hatutughuru wawo nohahake hanawo, ⁵ hakare nomaghano mwene , ghukushuki, mbuyama mwene ghopadidhiko, nokukara ghutawedhi kwawatutughuru wawo, podigho eshi nando dhaNyambi mbadi ha kudhi hukuruke karo. ⁶ Mundhira karo dhofotji, mutjokedhe hangaghu harughanithe maghano ghomawa. ⁷ Kehe pano wakona kukunedha ghothinda eshi thitamenedhi thoyitenda yoyiwa. Muyihonga yoye wakona kuneghedha mo ghushemwa, ⁸ difumaneko no mbudhi dhoghuhunga edhi dha pitakana ghuyi, podigho eshi keho oyu sho ghakwimanganyene ghakone kushwahuka yoyishi ghanapiri yinu yoyiyi eyi sho ha ghambe kukwetu. ⁹ Muhonge hayipika omu shohakone kukutekera hakuru wagho muyinu yoyiheya, ha wahafithe no mbadi ha kukanyeke nawo, ¹⁰ mbadi hedhe kukwagho ene hanedhe thitamenedhi thothiwa thomatawero, podigho eshi hawedherere kumakuhongo gho kuhatera kwaNyambi mushuturi wetu. ¹¹ Kuthinyeke thaNyambi thina kuhokora kumashutukero ghohanu wahe. ¹² Kuna kutudeghura kushwena ghunyambi no kuhaka yinu yokaye no kupara tukukunge twathinda, ghuhunga noyipara yoghunyambi ghuna kupara pano, ¹³ omu tuna kukengerera kughutho mukuwana matungekero ghetu ghomakurupero, mamonekero gho makuyero ghaNyambi wetu shokuru nomushuturi wetu Jesusi Kristusi. ¹⁴ Jesusi ghakutapire yithinda kukwetu podigho eshi ghatushwaghithe kudhimiragho dhokupira mudyo no ghatende makushukero noghakutendere hanu wendi thinda ghomudyo awa hakara no dirura mukutenda yirughana yoyiwa. ¹⁵ Mukughamba yinu yi, mutjokedhe hanu hayitende yinu yi, no kutapa maraghuthwero no hakadhimiragho. No mbadiko oyu shamunyathe.