¹ Paghulusi, muApostoli waKristusi Jesusi kupitera mumahimeno gha Nyambi, na Timoteghusi gho mukurwetu, ² kwaNyambi hanuwendi hokupongoka no hakurwetu homatawero mwaKristusi awa hadi kuColossae. Thinyeke thikare nenu, no thiraro thokutunda kwaNyambi gho Wihetu. ³ Kutapa ndangi kwaNyambi, ghoWihe Fumu Jesusi Kristusi, no nanyi tumuraperere kehepano. ⁴ Twayuva kuhatera makuruperero ghoye mwaKristusi Jesusi no ruhakitho oru wakara naro kohanu waNyambi hokukushuka. ⁵ Wakara no ruhakitho ru pamurandu gho mukurupero ghaghakuturekera mudiwiru. Wayuva kuhatera makururupero kughutho munando dhoghushemwa, nando dhomoyo, ⁶ edhi dheya mumoye. Mbudhi dhi kuna kwima mbuyo nokuna kukura mukayae kokahe. Dharughana yinu yi mumoye kutunda diyuwa di wadhiyuvire no wakuhongire kuhatera thinyeke thaNyambi mughushemwa. ⁷ Edhi ne mbudhi edhi wakuhongire kwaEpaphras, muhakwa wetu gho muwa, aye murughanai ghakara nomakurupero gha Kristusi pakatji ketu. ⁸ Epaphras hatenda ghutudimukitha yoruhakitho roye pamupepo. ⁹ Pamurandu ghoruhakitho ru, kutunda diyuwa twayuvire yi kadi twashagheka kumuraperera. Tunarombanga eshi ghakuyarithe no maghano ghoyihima yendi no ghukonakoni no matjwathaneno ghopamupepo. ¹⁰ Tuna rapereranga eshi ghuyende nothitambo mwaFumu mukumuhafitha mumandhira ghendi. Tuna rapereranga eshi wakwime mbuyo mukehe yino yirughana yoyiwa no nanyi wakukurure mumaghano ghaNyambi. ¹¹ Tuna kuraperera ghakutanarithe mukeheyino kukutha mangcamu ghoruhakitho mukehe maghukukutu no mataterero. ¹² Tuna raperera eshi ghukare norufo mukutapa ndangi kwaWihetu, oyu ghakutenda ghukare noyiwana mughupingwa wanu waNyambi hokupongoka muthishe. ¹³ Ghatushwayitha mudikokore noghatutuma kughufumu waMwanendi ghoruhakitho, ¹⁴ omu twakara eshi ghumango mukutu kunga endi kutuyeyura, makuthigherero gho maharwero. ¹⁵ Aye ne thothiperende tha Nyambi ghokudhira kumona,mbedi ghoyivareka yoyihe. ¹⁶ Mumwendi yinu yoyihe yapwire kutenda, oyi yo mudiwiru noyi yopakaye, yinu yokumona noyokupira kumona. Yikare ha fumu endi wahakara nongcamu dhokuraghura hanu, ghuhurumende endi hakamangcamu, kehe thino thapwire kutenda kupitera mumwendi no yendi. ¹⁷ Aye papendi kughutho ghoyinu yoyihe, no mumwendi yinu yoyihe ghayipaka pofotji. ¹⁸ Aye yomutwi ghoyirama, ngirishe. Aye yomatangero no yombedi kutunda mukatji kawafu, aye ghashimba dyango dyokutanga muyinu yoyihe. ¹⁹ Nyambi ghahaka hafa eshi ghuyari wendi wakona kukara mumwendi, ²⁰ no kukuthighegherera kupitera mwaMwana yinu yoyihe kukwendi. Nyambi ghatendire thiraro kupitera mumanyinga ghendi pathikurushe. Nyambi ghathigherera yinu yoyihe yikare yopakaye endi yomudiwiru. ²¹ Paruvedhe rofotji namwe mwakarire mbadi mwadimuki kwaNyambi no mwakarire mwanyathi wendi mumaghanovno muyitenda yoyimango. ²² Ene pano ne ghamushutura payirama yendi yonunu kupitera muyifa. Ghatendire yi mukumuneghedha ghukushuki, makutondovoro, no kumukutha ye, ²³ ngeshi mutwikere mumakurupero, kughatenda no ndjikiti, kadi kumushwaghitha kumakurupero ghombudhi edhi mwayuva. Edhi ne dho mbudhi ghatapa kwakeheyu ghavareka pamuve. Odhi ne dho mbudhi odhi Me, Paghulusi, nakarire nomupika. ²⁴ Pano nakuhafa muyinyanda yange kukwenu, no nayaritha nyama dhange eyi yakupirapo manyandekero ghaKristusi pamurandi ghoyirama yendi, adho ne ngirishe. ²⁵ Pamurandu ghodhi ngirishe ame nomuvereki, kukutha muyitumbukera yaNyambi eyi gha tapire kukwange yenu, mukukumithamo nando dhaNyambi. ²⁶ Oghu ne ghoghudhindo ghoghushemwa oghu hondekire myaka no myaka no muhoko kumuhoko ene pano hana yituneghedha ko hanu waNyambi hokupongoka. ²⁷ Kukwagho Nyambi ghashanine kutenda no kudimukitha ghutungi gho mangcamu gho hgudhindo ghu mukatji kaGentiles, aye ne Kristusi oyu ghadi moye, makurupero ghokuroruhe. ²⁸ Twawatongwere mumwendi, no kuwatongera eshi mbadi hatende ghuyi no yikuhonga yoghunyanyami, podigho eshi tuneghe kehe munu ghakure mwaKristusi. ²⁹ Poyi nakurughana no kukondja kukutha mungcamu dhendi edhi dhidi payirughana mumwange ngcamu.