¹ Lino Yesu wamala vyonsi vino walandanga ku yanthu yano yamuvwanga, ayinjila umu Kapernaum. ² Pa nsita yikwene umukalamba wa yasilika wali nu muzya wino wamuchinchike sana, wali umulwale nu kuti walipapipi ukufwa. ³ Lyo umukalamba wayasilika wuvwa apa mulandu wakwe Yesu, amutumila akombe ama Yuda, uku kumulenga ukwiza nu kumupozya muomvi wakwe. ⁴ Lino yafika kuli Yesu, yamuwuzichizizye nukumupapata, nukulanda, ''chilingine mwemwe ukumuwombela vino, ⁵ pa mulandu watemwa umutundu witu, nukuti awino watukulile sinagogi witu. ⁶ Apano Yesu wapisile nawo. Kwene lyo ali papipi ni ng'anda, umukalamba wayasilika amutumila ya chiuza uku kumunena, '' Mwene, utatiwayichuzya, pa mulandu ntayine apakuti winjile umung'anda yane. ⁷ Pa mulandu uno ntalingine nemwenecho ukwiza kuno muli, lelo uvwange sile izwi nu muomvi wane amapola. ⁸ Nga vino nali ne munthu wino indi pansi pa uteko,na yasilika pansi pali nene, Ndi navwanga kuli wenga, 'yanga,' nga nukuya, na kuli muze, 'Ndanga, 'nukwiza, nakumuomvi wane, 'womba chii.'nu kuchiomba.'' ⁹ Lino Yesu wuvwa chii, wamuzungwike, nu kusenuchila kwiwumba lino lyamukonsile alanda, ''Nkuwanena, nanthi umu Israel kwene ntatala nzane isuwilo lya musango wuu.'' ¹⁰ Lino yano yawatumile yaswilila uku ng'anda, yazanyile nu muomvi ali ningo. ¹¹ Ukufuma papo, Yesu wayile uku musumba uno yatinji Naini,na alondezi yakwe ni uwumba ili ka lamba yapisile nawe. ¹² Nga lino wapalama apapipi nu mupongolowa musumba, lolini, umunthu wino wafwile yamunyamwile, umwana wengasile umonsi muli nyina(wino walinji umufwilwe),ni iwumba ilikulu ukufuma uku mu sumba lyalinji nawe. ¹³ Lino mwemwe wamulola umwanachi, uluse lwamulemile sana nukumunena, ''utalila.'' ¹⁴ Apano wayile wakumya ichinthamfu chino yanyamulile umwili, na yalya yano yanyamwile yimilile sile. Avwanga, ''mulumendo, nkhukunena, katuka'' ¹⁵ Umufwe akatuka ayikala nu kutandika ukuvwanga, na Yesu amupela nyina. ¹⁶ Apano intete zyawalemile wonsi, nu kupitilila ukumutayizya Leza, ayati, ''Kasowela mukalamba watakatuka muli sweswe'' na ''Leza watapemfoula anthu yakwe'' ¹⁷ Luu ululumbi lwakwe Yesu lwasasile monsi umuYudea numumizi yonsi yikalamba iya mupipi. ¹⁸ Alondezi yakwe Yoani yamunenyile vyonsi ukuyana ni vintu vii. ¹⁹ Apano Yoani wamile yayili apa yalondezi yakwe nu kuwatuma kuli mwene nu kulanda, ''A Mwene wino yakuti alinukwiza, pamwi twalindilila muze?'' ²⁰ Lino yafika papipi kuli Yesu, antu yatili ''Yoani kawatizya watutuma kuli mwemwe ukuti, ''aweni wino ukwiza, pamwi twalindilila muze?'' ²¹ Umu nsita yiyokwene wapozizye ayantu ayinji ku maulwale na yachulike na yano yali ni mipansi iyipe, ni ntonko izinji zyatalike ukulola. ²² Yesu wayaswike nu kuwanena, ''Ndi mwapita kamusimichilini Yohani vino mwavilola nu kuvwa. Intonko zikulola, alemale yakupita, ayamambombo yakuswepa, yapuli yakuvwa, ayafwe yakukatuka ku wumi, na na apina yawalandilanga ilandwe ilisuma. ²³ Umunthu wino atakuleka ukusuwila muli nene pa mulandu wa imiwombele yane ali nulongo.'' ²⁴ Zyalanga nkombe zyakwe Yohani zyapita, Yesu atalika ukunena amaumba kuyana na Yohani, ' ichani chino mwayile umumapoli apakulola? Inthete lino likupungwa nu muza? ²⁵ Nga fwandi chino mwayile apakulola ichani? Umunthu wino wazwite ivizyalo ivitonthe? Lolini, yano yakuzwala ivizwalo vwapamutengo ayano yakwikala umumasano yakwe yamwene. ²⁶ Ngafwandi chino mwayile mulola kweneko ichani? Akasowela? Umolimo Nkhuwanena, nu waliulusya kwene pali kasowela. ²⁷ Pali weliwe amawaliko yalembwa, 'lola, nkutuma intumi yane pamanso yakwe wino amakuteyanyizya injila pano uchili.'' ²⁸ Nkhuwanena, pali yano yakwata na anachi pasi na wenga umukalamba ukulusya Yoani. Lelo wino wayichefwa umu wene wakwe vLeza ali mukalamba ukumulusya,'' ²⁹ (Lino wonsi ayanthu yuvwa vii, pali pamwi na yakasonkhesya ya musonko, yazumile ukuti Leza umutele, pamulandu wakuti yawatizye nu uwatizo waliwe Yoani. ³⁰ Lelo Afalisei na yakasambilizya yisundo yakanyile ukulonda kwakwe Leza ayinenecho, pa mulandu yatawatiziwe na Yoani.) ³¹ ''Ukuchani, uzye, ningawakolanya anthu ya mukulu wuu? Yakolana na ya weni? ³² Yakolana na yanche yano yaakwiza pachisankhano, yano yikazile nu kupundana nu kulanda, '' twawalizizye mutolilo, mutachinyile. Twimbile ulwimbo lwamfwa, kwene mutalizile.'' ³³ Lelo Yoani kawatizya wizile atalyanga mukate nupya atamwanga uwengwa, nukulanda, ''Ali nu mupasi uyipe.'' ³⁴ Umwana wa Munthu wizile walyanga nu kumwa, nukulanda, ''Lolini, umunthu umupunuke nupya a ching'wela, a chiuza wakasonkhesya wa misonkho na ayembu!'' ³⁵ Lelo Amano yakwe Leza yakailanjizya wonsi umu yano yakwe.'' ³⁶ Nomba wenga waya Falisei wamwamile Yesu pakulya. Lino Yesu winjila umung'anda ya mufalisei, wikazile apa tebulo apakulya. ³⁷ Wuvwini, kwalinji umwanachi umumusumba wino walinji umuyembu. Lino wamanya ukuti Yesu wali apakulya apa tebulo umung'anda yamu falisei, walesile ibotolo lya mafuta amanunchile. ³⁸ Pano wimilile ukunsai kwakwe mupipi na matamba yakwe, akulila, watalike ukumutifya amatamba yakwe na minsozi, nu kuya kumbula ni inyele izya kumutwe wakwe nu kufyompa amatamba yakwe nu kuyapaka na mafuta ayanunchile. ³⁹ Lino Umufalisei wino wamwamile Yesu walola chii, welenginye wenga umumwenzo wakwe nukulanda, ''Nanthi umuntu wii wali a kasowela, ngali wamanyile umwanachi chi wino akumulema nukuti umuyembu.'' ⁴⁰ Yesu wamwaswike nukumunena, ''Simoni, inkweti chimwi icha kukunena.'' Alanda, ''chivwange, Kasambilizya!'' ⁴¹ Yesu awanena, ''wumwi kakongolesya uwandalama wali na a ya nko ngole yayili. Wenga wali ni nkhongole izya nimpiya imiyanda isano, na muze wali ni nkhongole izya nimpiya makumi yasano. ⁴² Pano yapotwa ukumuwezezya, wawatetile wonsi yayili. Nomba, pali yano aweni wino angamutemwa ukulusya?'' ⁴³ Simoni wamwaswike nu kulanda, '' Nemo nkwelenganya wino wawatetile ukulusya.'' Yesu amunena, ''wapingula ningo.'' ⁴⁴ Yesu aseleuchila uku mwanachi nu kumunena Simoni, wamulola umwanachi wii. Ninjila umung'anda yako. Wemo utampile amanzi ya amatamba yane, kwene wene wii watafula amatamba yane na minsonzi yakwe nu kuwakumbula ni nyele zyakwe. ⁴⁵ Wemo utamfyomfyile kwene ukufuma pano ninjilile muno atatazile aleke ukufyompha amatamba yane. ⁴⁶ Wemo utampasile mafuta pamutwe, kwene wene watampaka amatamba yane namafuta anuchinchile. ⁴⁷ Achino, nkuwanea, amaluyembu yakwe, yano yalinji ayinji, yati yatetelewa- achino atemilwe apakulamba. Lelo wino watetelwa panono, akatemwa panono. ⁴⁸ Apano wamunenyile, ''Amaluyembu yako yatetelwa.'' ⁴⁹ Yano yali nawe ponga apakulya yatalike ukuvwanzyanya, ''Aweni wii wino akutetela namaluyembu kwane?'' ⁵⁰ Alino Yesu amunena umwanachi, ''Isuwilo lyako lyakupususya, pita mumutende.''