¹ Yesu winjile nukuchilinganya mu yeliko. ² Lolini, kwali umunthu izina lyakwe Zakeyo. Walinji akasonchezya wa msonkho nupya walinji amukankala. ³ Walondanga ukulola yesu ukuti aweni, kwene atamuweni, piwumba, pamulandu wakuti wali umufupi. ⁴ Apano wutwike kunkholelo mumuti uwamukuyu ukuti amulole, pamulandu wakuti yesu walukuti akuyachilinganya inzila yilyakwene. ⁵ Lino Yesu wafika pamasyo, waweni kupela nukuti kuli weliwe, ''Zakeyo, yika zuwa, uwanda wilelo nkhuyayikala mung'anda yako.'' ⁶ Apano wisike zuwazuwa nukumupochelela ni nsansa. ⁷ Lino wonsi yalola chii yayilizyinye, nukuvwanga ukuti, ''waya pakukomenkhana nu munthu umononyi. ⁸ Zakeyo wimilile ati kuli mwene, ''Lola, mwene pavyuma vino nkhweti nimasendako pakasi nukwankhanya ayalanda. nupya ndinaposile umunthu chimwi, nimamuwezezya kanayi.'' ⁹ Yesu watili kuli weni, '' ilelo ukupusuka kwinjila mung'anda yako, pamulandu wakuti nawe wemwana wakwe Ablahamu. ¹⁰ Pakuti u mwana wamunthu wizile pakulonda nukupususya ayanthu ayaponge.'' ¹¹ Lino yuvwa ivinthu vii, wapitilizizye nukuwawuzya mu chili, pamulandu wakuti wapalamile ukufika ku Yelusalemu, nupya yelenginye ukuti uwufumu wakwe Leza wumaloleka. ¹² Apano watili, ''umunthu wumwi umuchindame wayile kunsi iyakutali nukuyapoka uwufumu nukuwelela. ¹³ Wamile ayawonvi yakwe ikumi nukuwapa amakopala nukuti kuwoliwo, ''ziwomvyini kumalonda ukufika pano ndizila .' ¹⁴ ''Kwene ayeninsii yamupasile, yatumile aanthu ukuti yakakomenkhane nawe, ayati, ''tutamazumilizya ukuti umunthu wii atuteke.'' ¹⁵ Vyachitike lino wawelela pano wapochela uufum, wapingwile ayawonvi yano wawapile ikopala ukuti yize kuli weliwe, walondanga amanye umuzano wuno yazanyile. ¹⁶ ''Uwanthandiko wizile pankolelo pakwe, wavwanzile, 'Mwene, ikumi lino mwampile nazanamo nupya ikumi lyuze.'' ¹⁷ ''Umuchindame watili kuli weni, wachita ningo, we muwonvi umuzima. Pamulandu wakuti waluli wemusuwilwe mu lunono, nomba nimakupa amaka pa misumba ikumi. ¹⁸ Wakwe chili wizile, avwanga, 'pikopala linu, Mwene,nazanamo ayawuze yasano.' ¹⁹ ''Umuchindame watili kuli weni, 'ulamulile imisumba ukuchila yasanu. ²⁰ Muze wizile, avwanga, ''Mwene, ikopala iyinu lii, lino nasunzile ningo nu kuyinyepapakamwenda, ²¹ nawatinga, bamulandu wakuti wamutale mukasenda vino mutayikapo nukusinza pano mutatanda.'' ²² ''Umuchindame watili kuli kuli wene, ''nimakususya na mazwi yako, wemuwomvi umukasu. wamanya ukuti nemunthu umutale, nkhasenda vino nthayisile nukusinza vino nthatanzile. ²³ Ngichani chino utayisile ikopala lyane kumalonda, ukuti pano nkhuwela ngali napochelela ponga ni yapapela.'' ²⁴ Umuchindame aati kuli yano yali papipi, ''pokini ikopala lino ali nalyo mumupe wino ali namakopala ikumi.'' ²⁵ ''Yatili kuli weliwe, ''Mwene, ali nawo amakopala ikumi.'' ²⁶ ''Nkhuvwanga kuli mwemwe, ukuti wensi wino ali navyo amamupa ivinji, kwene wino atakweti amamupoka na kano ali nako. ²⁷ Kwene ayalwani yane, yano yatandondanga ukuti inje ne mfumu yawo, mwize nawo kuno muwakome pankholelo pane. ²⁸ Lino yavwanga amazyi yaa, wakolezile nukukwela ku Yelusalemu. ²⁹ Walile wapalamila kupipi na ku Betifage na Beteniya pano yali pa mwamba wumwi wuno yakati Oliveti, watumile ayalondezi yayili ³⁰ Watili, ''yanjini ku muzi wuno mupalamine nawo. Pano mukuyayinjilanga, mukuyazana umwana wamphunda wuno yatakwelapo. Mukamusapule mumulete kuno. ³¹ Nanthi wumwi akuwakolowozya, ''ichani chino mwamusapula umwana wa mphunda?'' 'mukati mwene amulonzile.'' ³² Yano yatumilwe yayili yazana ukuya namuno Yesu wawatumile. ³³ Lino yakumusapula, ayenecho yatili kuli yene, ''Ichani chino mukusapula umwana wa mphunda''? ³⁴ Yati, ''Mwene akumulonda.'' ³⁵ Yamulesile kuli Yesu numwana wamphunda wilya kuli Yesu, yasumbile ivizwalo vyawo pa mwamba wamphunda nukumukwezyapo. ³⁶ Pano Yesu wapitanga, yanzile ivivwalo vwawo mumusewo. ³⁷ Kwene linoyapalamila papipi nu mwamba uwa Maolive, iwumba lyonsi lilya yalondezi iyasechile yapundilizyanga pakwimbilila, iyamutumvizye Leza pamulandu wamilimo yonsi iyamaka yino yayiweni, ³⁸ Ayavwanga, ''umupepwe wino akwiza mwizina lyakwe mwene,'' umutende mwiyulu nu muchindamisye mwiyulu!'' ³⁹ Yamwi mwiwumba lya ya Falisayi yatili kuli weni, ''musambilizi, muwamyalaze ayalondezi yinu.'' ⁴⁰ Yesu waswike nkhuwanena nanthi yamyalala, amawe ayano yamapunda.'' ⁴¹ Lino Yesu walola umusumba, wawulilile, ⁴² Watili, ''uwanda wilelo chelichine ukumanya chino chikawaletela umutende.'' Kwene nomba vyafisamika mu manso yinu. ⁴³ Amuno amanda yaliwizila pano ayalwani yinu yali wayalizya konsi konsi nukuwayulizya ponsiponsi. ⁴⁴ Yalawaponya pansi nayaninu ponga, yatalisya iwe manthi limwi papela pa lyuze pamulandu wakuti mutamanyile insita iya yakuwapitila.'' ⁴⁵ Yesu winjile mu ng'anda ikalamba yakwe Leza nukutalika ukuwafumya yakakazya, ⁴⁶ Watili kuli yene, ''chalembwa, ing'anda yane yilaya ing'anda ya mapepo,' kwene mwayipanga ukuya ing'anda ya vipondo. ⁴⁷ Yesu wasambilizyanga amanda wonsi mung'anda ikalamba yakwe Leza. Yasimapepo ayakalamba na ya kawalika yalondanga ukumukoma, pakuti yali nthunguluzi ya wanthu. ⁴⁸ Kwene yatazanyile inzila yino yangamukomela pamulandu wakuti ayantu wonsi yuvwichisyanga.