¹ Apano wawanenyile umulumbe vino yangapepela kasita wensi nukuti mutawelela ichisila, ² ati, ''Mu musumba wumwi mwali kapingula wumwi wino atatinanga Leza nupya atachindikanga ayanthu. ³ Nomba mumusumba mwali umwanachi wumwi umufwilwe, nukuti wizanga kayili kayili kuli weliwe, ati, 'ngavwa nzane uwumolimo kuli yano nkhwiminkhana nawo.' ⁴ kunsita inthali atalondanga ukumwavwa, kweni lino papita insita watili pali wenga, ''Napano nsitina Leza nanthi ukuchindika umunthu, ⁵ kweni pamulandu wakuti umufwilwe wi i akantchuzya, nimamwavwa pakuzana uwumolimo, ukuti atanthonsya nukwiza yiza kwakwe.'' ⁶ Apano mwene watili, ''wuvwini kuli vino kapingula wawufi akuvwanga. ⁷ Nomba Leza atalaleta uwumolimo kuyasilwa yakwe yano yakamulilila umusanya nu wusiku? wuzye weni alizyela pano yali? ⁸ Nkhuwane ukuti aliwaletela uwumolimo zuwa zuwa. Napo kwene, pano u Mwana wa Muntnu alizanga, wuzye alizana isuwilo munsi ya pansi?'' ⁹ Apano wavwanzile kupya umulumbe wuu kuli yano yasuwile muli wonga ukuti ayalungamane nukusula ayawuze, ¹⁰ ''Ayanthu yayili yayile mwitempheli pakupepa wenga wali umufalisayi na muze wali akasontchezya wa misonkho. ¹¹ Umufalisayi umufalisayi wimilile nukupepe ivinthu vii ukuyana na weliwe, 'Leza, nkhukutayizya nthalingine nayanthu yawuze_ ayapondo, ayayembu, yamalaya_ nanthi akasontchezya musonkho wino. ¹² Nkhafunga kayili pa mulungu wonsi. Nkhayika ichikumi pali vyonsi vino nkhazana.' ¹³ Kweni kasontchezya wamisonkho, wimilile apatali, atinulanga nanthi amanso yakwe kwiyulu, kweni wumile ichisawo, ati, 'Leza, nguvwilini uluse, ne muyembu.' ¹⁴ Nkhuwanena, umunthu wi i wawelile ku ng'anda yakwe ataswefiwa ukuchila umuze, pamulandu wakuti wensi wino akayikwezya yalamwisya, kweni wensi wino akayisya yalamukwezya.'' ¹⁵ Ayanthu yaletanga ayanawo ukuti awaleme, kweni lino yachilola, yawakalipile. ¹⁶ Kweni Yesu wawamile kuli weliwe, ati, ''Lekini ayana ayanono yize kuli nene, nukuti mutawalesya. Pakuti uwumwene wakwe Leza uwawo. ¹⁷ Ichumi nkhuwanena wensi wino atapochelela uwumwene wakwe Leza ngati umwana ichendi utalinjilamo.'' ¹⁸ Katungulula wumwi wamukolowozizye ati, ''Kasambilizya musuma, mfwile mbombe chani ukuti pysane uwumi wa muyaya?'' ¹⁹ Yesu wamunenyile ati, ''Ichani chino ukamphunda musuma? Pataya umusuma nkhandi Leza mutupu. ²⁰ Wayamanya amasunde _ utachendeka, utakoma, utayiya, utaya we kamboni wawufi, chindika so na nyoko.'' ²¹ Katungulula watili, ''ivinthu vyinsi vii nkhavisunga ukufuma kuwantche. ²² Lino Yesu wuvwa vii, wamunenyile ati, ''Ichinthu chonga chino ukusowelwa. Ufwile ukazye vyonsi vino ukweti nukwankhanya kuyasaluke, nukuti ulaya nichuma kwiyulu _ iza, nkhonkha.'' ²³ Kweni lino katungulula wuvwa vii, wizile asoka sana, amuno wali umukankhala. ²⁴ Apano Yesu, wamulola ukuti wasoka watili, ''kwawatalila wuli ayanthu ayakankhala ukwinjila uwumwene wakwe Leza! ²⁵ Chingaya ichipepuke ingamila ukwinjila pakawina kansindano, ukuchila umunthu umukankala ukwinjila mu wumwene wakwe Leza.'' ²⁶ Yano yachuvwile chii yatili, ''Nomba aweni wino angapusuka?'' ²⁷ Yesu waswike, ''ivinthu vino vitanga vichitwe nayanthu vikachitwa na Leza.'' ²⁸ Petulo watili, ''Ichisuma, tusile vyonsi vino ivyakwitu nukukukonkha,'' ²⁹ Yesu alino watili kuli woliwo, ''Ichumi, nkhuwanena ukuti pasi wino asile ing'anda, nanthi umuchi nanthi ayanyina, nanthi ayakwasi, nanthi ayana, pamulandu wawumwene wakwe Leza, ³⁰ aweni wino atalapochela ivivule munsita yii, na mumanda yano yakwiza,uwumi wamuyayaya.'' ³¹ Lino wawakonganika ikumi na yayili(12) pano ali, wawanenyile ati, ''Lolini tukuya ku Yelusalemu, ivinthu vyonsi vino vyawalikwa nayakasesema ivya Mwana wa Munthu vilafichiliswa. ³² Pakuti alapelwa kuya mitundu, yalamusoweka, nukumusewanya nukumuswilila amati. ³³ Ndiyamuma, yalamukoma, pawanda wakwe chitatu alazyuka nupya.'' ³⁴ Yatuvwichishanga na chimwi pa vinthu vii, nizwi li i lyawafisime, yatuvwichisyanga ivinthu vino yavwanzile. ³⁵ Vyachitike ukuti, lino Yesu wapalama ukufika ku Yeliko, nthonkho wumwi wikalanga mumbali mumusewo walenganga, ³⁶ wuvwile uwumba likupita, wakolowozizye ichani chino chawombwanga. ³⁷ Yamunenyile kuno a Yesu waku Nazaleti akuchilinganya. ³⁸ Apano nthonkho walizile, ati, ''Yesu, Mwana Davide, nguvwila uluse.'' ³⁹ Yano yakolezile yamukalipile nthonkho, yamunenanga ukuti amyalale. Kweni apano walizile ukuchila, ''Mwana Davide nguvwila nguvwila uluse.'' ⁴⁰ Yesu lino achili ayimilile, wapingwile kuno yamulete umunthu kuli weliwe. Lino nthonkho wapalama, Yesu wamukolowozizye, ⁴¹ ''Ukulonda nkhuwombele chani?'' watili, ''Mwene, nkhulonda ukulola.'' ⁴² Yesu wamunenyile ati, ''Pochelela ukulola kwako. Isuwilo lyako lyakupozya.'' ⁴³ Papokwene watalike ukulola nukumukonkha, nukulumbanya Leza.''