¹ Amadus, ka nhos kridita na kualker spiritu, mas nhos buska sabi si es nben di Deus, pamodi munti falsu profetas ten stadu ta sai pa mundu. ² Atrabes disu nhos ta rikonhesi Spiritu di Deus: Tudu spiritu ki ta konfesa ma Jizus Kristu ben en karni, e di Deus, ³ i tudu spritu ki ka ta konfesa a Jizus e ka di Deus, mas sim e spritu di antikristu, kel ki nhos obiba ma ta binha, i ki gosi ja sta na mundu. ⁴ Kiridus fidjus, nhos e di Deus, i dja nhos venses, pamodi Kel ki sta na nhos e mas grandi ki kel ki sta na mundu. ⁵ Kes spiritus la es e di mundu, sendu asi kuza kes ta fla e di mundu, i mundu ta obis. ⁶ Nos e di parti di Deus. Kel ki konxi Deus ta obinu, kel ke ka di Deus ka ta obinu. E si ki nu ta konxi spiritu di verdadi e spiritu di eru. ⁷ Amadus, nu ama kumpanheru, pamodi amor e di Deus, i tudu kel ki ta ama e nasidu di Deus i e konxi Deus. ⁸ Kel ki ka ta ama, ka konxi Deus pamodi Deus e amor. ⁹ Deus manifesta se amor na nos meiu: kantu ke manda Se Uniku Fidju pa mundu, pa nu vivi atraves del. ¹⁰ I na keli sta amor: Ka foi nos ki ama Deus, mas Deus ki amanu, i el invia Se Fidju komu sakrifisiu pa nos pekadus. ¹¹ Amadus, si Deus amanu asi, nu debi tanbé ama kunpanheru. ¹² Ningén nunka odja Deus. Si nu ama kunpanheru, Deus ta pirmanesi na nos, i Si amor e aperfeisuadu na nos. ¹³ Asi nu ta sabi ki nu sta Nel i El na nos, pamodi El ten dadu nos di se spiritu. ¹⁴ I nos nu ten odjadu i tistimunhadu ki o Pai invia Se Fisju komu Salvador di Mundu. ¹⁵ Kualker un ki konfesa ki Jizus e Fidju di Deus, Deus ta manti nel, i el na Deus. ¹⁶ Nos nu konxi i nu kre na amor di ki Deus ten pa nos. Deus e amor, i kenha ki ta pirmanesi na amor tanbe e sta pirmanesi na Deus, i Deus nel. ¹⁷ I es amor ten sidu aperfeisuadu na nos, pa ki nu ten kunfiansa na dia di julgamentu, pamodi sima El e si tanbe nos e nes mundu. ¹⁸ Na amor ka ten medu, pelu kontrariu, amor perfetu bota medu fora, pamodi medu ta involvi punison, i ken ki ten medu ka foi aperfeisuadu na amor. ¹⁹ Nu ta ama pamodi Deus amanu primeru. ²⁰ Si algen fla: "N ta ama Deus", ma e ta ódia se irmon, el e mintrosu, pamodi kel ki ka ta ama si irmon, ki e ta odja, el ka podi ama Deus, ki e ka ta odja. ²¹ I nu ten kel mandamentu di parti di Deus, ki kel ki ta ama Deus debi ama tanbe se irmon.