¹ Opo vatikire kushelikunya ya lifuta, mulidingonoko mukunda lya Gerasenese. ² Kuno Jesus uye kunakudumpuka muwato, Amumonekere mukafumu ogho a atundililiro mumayendo ,mukafumu uno kwakalire nampepo dakunyata. ³ Mukafumu uno kwatungire mumayendo. Kundereko ogho avuliro kumukava, nampili kumumanga namaghuketanga. ⁴ Ghuye kava mumangereranga rwarungi navipandeko, namaghuketanga. ngoli ghuye ka ndembauranga mauketanga naku petapeta vipandeko. Kwato ogho ghakaliro nankondo wakuvura kumu kona. ⁵ Kehe matiku na mwi pambira na kumandundu, kaliraghananga nakukuteta naghumwendi namawe ghautwe. ⁶ Opo ghamonine Jesus kughure amuduri nakutongamena kumeho yendi. ⁷ Uye kwalilire nakuyiyira naliywi lyalinene, ''Vinke nirughana nove ove, Jesus, mona Karunga munankondo nadintje? Nakukandere mulidina lya Karunga mwene, washa hepeka.'' ⁸ Makura ghuye kaghambanga kukwendi ashi, ''Rupukamo mwauno mukafumu, ove mpepo yakunyata.'' ⁹ Ghuye amupura ashi, ''Are lidina lyoye?'' Ghuye avalimburura ashi, ''Lidina lyande ame Legion, morwa atwe tuvayingi.'' ¹⁰ Ghuye amukanderere rukando-narukando ashi kapishi amutjidemo mumudingonoko mukunda unya. ¹¹ Makura utanga wa vinguru kwa lyelilire papepi na nkambamo, ¹² Mpepo dakunyata dinya adi mukanderere ashi, ''Tutume muvinguru, mposhi tungene mwavyo. ¹³ Makura adi pulitiri; Mpepo dakunyata dinya adirupuka nakungena muvinguru, vyavyo makura aviduka vighurumukire pashikunumuko vikawere mulifuta, vyavyo kwakalire vinguru mafere maviri vya kuminitiro nakufa mulifuta. ¹⁴ Ovo va litiro vinguru ava duka vakatante ovyo vya shorokiro mudoropa na kusheli kunya ya doropa ntani naku dimukunda dakundurukido doropa, vantu ava rupuka vakakenge ovyo vyashorokiro. ¹⁵ Makura avaya kwa Jesus ava mono murume ogho vayivire akaliro nampepo dadidona, ogho akwatire naku ruwanitanga ndemoni walidina Legion, Uye ana shungiri mpopo, ana dwata vyuma, vikara vyendi kwaneghedire ashi ghuye muntu wa muwaawa, anavyukiri mughuntu wendi nawa-nawa. Makura aghuva yere ghoma. ¹⁶ Ovo vamonino ovyo vyashorokiliro kogho ghakaliro nampepo dadidona ava vatantere kuhamena kuvinguru ashi weni omo vyashorokire. ¹⁷ Makura ava tameke kumukandere atundemo mulidingonoko lya mukund wavo. ¹⁸ Kuno uye kuna kuronda muwato, murume wampepo dadidona amukanderere ashi ndi akare naye. ¹⁹ Ngoli Jesus kapi amupulitilire, makura amutantere ashi, ''Yenda kumundi ghoye nakuvantu voye ghuvatantere ovyo anakuruwanene Karunga, ntani weni omo ana kufere nkenda.'' ²⁰ Makura akayenda nakutameka kuyuvita, uye kwayendire kudoropa murongo damumudingonoko. Ghuye atantere vantu ovyo amuruwaninine Jesus, vantu navantje vyava tetukitire. ²¹ Shirughosho Jesus ghuye ana rutunka musheli kunya nawato, mbunga yayinene ayipongo nakumudingurukida, uye kuntere ya lifuta. ²² Makura ghumwe wava mpititi wa Sinangonge walidina Jairus aya, makura opo amukengire, awere kumpadi da Jesus. ²³ Naku mukanderera vikaando vyaviyingi, nakughamba ashi, '' Monande wamudidi, wamukadona kuna kushana adohoroke.'' Na kukanderere ya uka mukambeke maghoko ghoye mposhi akare nawa aparuke.'' ²⁴ Makura, Jesus ayendi naye, ntani nambunga yayinene ayi mukwama tupu vana kukutindayika pepi naye. ²⁵ Mukatji kavo kwakaliremo mukamali ogho akaliro kushidira, mwaka murongo na mbiri. ²⁶ Ghuye kwahepire ghunene kuvapangi vavangi naku hepeka navintje ovyo awekire, mulivango lyakukuyuva hashako uvera wendi aghukuwederere. ²⁷ Opo ghayuvire vyaku hamena kwa Jesus, mpo ayendire kuruku rwendi mumbunga makura akwata kulirwakani lyendi. ²⁸ Mpo aghambire ashi, ''nange tupu nikwata kuvyuma vyendi, kuniveruka.'' ²⁹ Opo ghamukwatire, honde mbyoya shaghekire kupita, ghuye avi kuyuvire murutu rwendi ashi anaveruka kughuvera wendi. ³⁰ Jesus mpopo tupu adimburura ashi, nkondo dina tundu mo mwendi. Apiruka mumbunga nakupura ashi, '' Are anakwato ku vyuma vyande?'' ³¹ Varongwa vendi avaghamba kwendi ashi, ''Ghuna mono mbunga omo vanakukupatilikida vanakukundurukida, ghughambe ashi are ana ngumo?'' ³² Ano ngoli Jesus akenge kenga mumbunga ashane ogho aviruwanino. ³³ Mukamali, ayivire ashi vinke vyamushorokeliro, atjira nakukankama. Aya awere kumeho ya Jesus nakumutantera ghushiri naghuntje. ³⁴ Amu tantere ashi, ''Monande wamukamali, lipuliro lyoye linakuverura. Yenda mu mpora ntani veruka ku ghuvera ghoye.'' ³⁵ Ghuye shimpe kuna kughamba, vantu vamwe vakutunda kuvampititi vamu Sinangonge, avaghamba ashi, ''Monoye wamukamali anadohoroka. Morwa nke nka ushatiyarera murongi?'' ³⁶ Makura opo ayiyuvire Jesus mbudi oyo vaghambire, atantere mpititi waSinagoge ashi, ''vyasha mutjilita. Korenu mulipuro.'' ³⁷ Ghuye kapi apulitilire kehe ghuno amukwame kuupako Petrus, Jakobus na Johanes, muunya Jakobus. ³⁸ Avayatiki mumundi wa mpititi waSinagoge makura amono vantu kuna kuyoghotera ngudu, vavo kwa lilire nakukwenaghuka unene. ³⁹ Opo angenine mundjugho, aghamba kukwavo ashi. ''Vinke muna garapere ntani nevi muna kulilira? Mwanuke kuna rara tupu turo kapi anafu.'' ⁴⁰ Vavo ava mushepe. Ava shuvu navantje pandje nakushimba vashe va mwanuke na vawina navo ayendire navo, angene moomo akalire mwanuke. ⁴¹ Aghupu lighoko lyamwanuke nakumutantera ashi, ''Talitha, koum!'' ovyo vatoroka ashi, " Mwanuke wamukadona, ame nakukutantero ashi, rambuka.'' ⁴² Mpopo tupu mwanuke wamukadona arambuka nakuvareka kuyende( mwanuke kwakalire ghuye mwaka murongo nambiri). Vavo vyavatetulire unene nakuyura ruhafo rwarunene mudimushima davo. ⁴³ Uye avarawiri shankondo nkondo ashi kwato ogho vavitantera. Makura avatantere vamupeko vyakulya alye.