¹ Shimpenka atameke kushonga uye kuntere ya lifuta, ntani yayo mbunga yayinene kuna mukundurukida. A rondo muwato ogho wa kaliro mulifuta, makura ashungiri. Mbunga nayintje yayo paurundu kuntere yalifuta. ² Uye ava shongo vininke vyavingi mumafanikito namu marongo ghendi, vino mbyo aghambire kukwavo. ³ "Teghererenu ! Mukuni kwa yendire aka kune mbuto yendi. ⁴ Opo a kunine mbuto yimwe ayi were mudjira, makura vidira aviya yidjonaurapo. ⁵ Mbuto yimwe a yiwere palivhu lya mawe, opo pa piliro livhu lya liyingi. Mpopo tupu makura ayi shontjo nakumena, mora kapi pa kalire livhu kuntji. ⁶ Ngoli opo lya pumine liyuva, vimenwa avipi, ntani morwashi kapi vyakalire na ndandani, avi kukuta. ⁷ Mbuto yimwe ayi ayiwere muvi menwa vya miya. Vimenwa vya miya vinya a vi ya kuru makura a vi yirwarwa, makura kapi vya yimineko mbuto. ⁸ Mbuto yimwe ayiwere pa livhu lya liwa, ayikuru nawa, na kuyima nyango yayiwa, oyo ya vhukiro vikando dimurongo ntatu, dimorongo nta yimwe, dogoro lifere limwe. ⁹ Makura aghamba ashi, ''Kehe ghuno a karo namatwi, ghakuyuvha a yuvhe!" ¹⁰ Opo a kalire Jesus pentjendi, ovo vamu kaliliro pa pepi navanya ronambiri ava mu pura vyakuhamena mafanikito ghanya. ¹¹ Uye ava tantere ashi, ''Anwe kuna mupa vyalihoramo lya untungi waKarunga. Ene ngoli kwavo va pandje, navintje mafanikito tupu, ¹² mpo ngoli ashi opo va kenga, mo kuna kukenga, ene ngoli kapivana kumona, ntaninka, ngava ka yuvha, mo ngava yuvha, ngoli kapi ngava vikwata lighano, nkwandi ngava ku vyute makura Karunga ngava ghupirepo.'' ¹³ Uye aghamba kukwavo ashi, ''Shino shifanekito kapi muna shikwata lighano ndi? Makura weni ngoli omo ngamuka vhura kukwata lighano lya mafanekito naghantje? ¹⁴ Mukuni kukuna nkango. ¹⁵ Vano mbovo vakuntere yandjira, oko vana kunu nkango. Tupu va di yuva, mpopo tupu Satana ghuye kuya ayava shakane nkango odo vana kunu mwavo. ¹⁶ Ntani vano mbo ngoli vanya vambuto oyo vakunine palivhu lyamawe; vavo, opo vayuvire nkango kuditambura mpopo naruhafo. ¹⁷ Ene ngoli mwavo mwato ndandani, vavo kudidimika paka ruvede kakafupi. Kuruku yaruvede pakutameka kwa maghudito namasheteko mukonda yankango dinnya, vavo makura kuwako. ¹⁸ Shimpe nka, vamwe mbo mbuto oyo vakunine mukatji kavitondo vya miya. mpovali ovo va yuvango nkango, ¹⁹ Ene ngoli mukonda ya vinka vya udjuni na mayedo gha ungavo nashihoro shavi ninke navyo peke vyavyo kuyamo naku dipagha nkango, dado makura kupira viyimwa. ²⁰ Mbuto yinya vakunine palivhu lya liwa mbovanya va yuvango nkango, kudi tamburako, naku dipura namutjima davo nadintje, nakutikitamo ovyo ashana Karunga. vavo yira shimenwa shashiwa osho shayimango nyango rontatu, rontayimwe, ndi vikando lifere ngoweyo. ²¹ Jesus aghamba ashi, "kuvhura ghungeneke ramba mundjugho ghuyi ture muntji yashihemere ndi munda yaghuro? Kuyi ngeneka ghuyi ture kushitondo osho ya yimana nga ramba. ²² Mbyovishi kundereko ovyo vya vando ngavi diro kuyivikwa, ntani kwato vyamu kahore-hore ovyo ngavi piro kuya parukenu. ²³ Nangeshi ogho akaro nomatwi ghakuyuvita, murenkenu ayuve!'' ²⁴ Uye ava tantere ashi, ''Teghererenu nawa ovyo muna kuyuva, morwashi shimetito osho una kumetita nove ntjo ngava kakumetitira, ngava kaku wedererako nka muuyingi. ²⁵ Mukondashi kehe ghuno akaro navyo, ghuye ngava mu wedererako vyavingi, keheuno apiro, ngava kamu shakana novyo akara navyo kare.'' ²⁶ Aghamba nka ashi, ''ghuntungi waKarunga kwa kara yira mukuni ogho akunango mbuto yendi mulivhu. ²⁷ Ghuye kurara matiku nakurambuka ngura-ngura, mbuto yayo mushontja na kumena, mundjira oyo apira kuyiva mukuni mbuto. ²⁸ Livhu kumena rukokotwa pa lyene; Pamuhovo ndungu, ntani matwi, ntani ngoli mbuto yakukoka yene kudimutwe. ²⁹ Pa ku pya mbuto, mpopo tupu makura, kutumamo vakukesha morwa shi shirugho shakuyangura rukokotwa shinatikimo.'' ³⁰ Shimpe nka aghamba ashi, ''Kunke tuvhura kushetakanita untungi waKarunga, ndi walye shifanikito munke tuvhura kurughanita muku vifaturura? ³¹ Kuna kara yira ntanga yayididi, oyo yina karo ashi, paku yi kuna, ndyo yoyididi po kuntanga nadintje pantunda yalivu. ³² Shimpe nka, paku yikuna yayo kukura kuya pitakana vimenwa navintje vya mushipata, nakuya kara nadimutavi dadinene, mposhi vidira vya muwiru ngavi vhure kutunga vitunguru vyavyo mu mundulye wa dimutavi dasho.'' ³³ Navifanikito vino vyaviyingi ngoweyo mo aghambire nkango kukwavo, ava ntantere vyaviyingi kutwara omo vavi kwatire lighano, ³⁴ Ntani ghuye kapi ava ghambitire ahana kuruwanita vifanikito. Ene ngoli opo a kalire pantjendi, kafatururanga navintje kuvarongwa vendi. ³⁵ Muliyuva linya, opo ya tikire ngurova , aghamba kukwavo ashi, ''Tuyendenu musheli munya.'' ³⁶ Makura ava tundu pa mbunga, vaka yende kumwe na Jesus, moomu tupu a kalire muwato. Pakalire mawato ghamwe ogho ghayendiro naye. ³⁷ Makura likundungu lyankondo unene alishapuka, makura mankumpi aghaweranga muwato dogoro wato hambara kuyura mema. ³⁸ Shirugho sho Jesus ghuye kuruku rwa wato, anarara turo. ava murambwita, nakughamba ashi, "Murongi, ove kundereko shinka ashi atwe kuna kushana kufa ndi?'' ³⁹ Arambuka alitughumukiri likundungu, naku tantera lifuta, ''Mwena! Kuture!'' Makura likundungu a li shayeke, makura akukutura unene. ⁴⁰ Makura uye aghamba kukwavo ashi, ''Vinke muna kutjilira? Kapi muna kara shimpe na mapuliro ndi? ⁴¹ Vavo aghuva yura ghoma wa unene ava kupura vene nava vene ashi, ''Are nani mwene ghuno, morwa mpiri likundungu nalifuta kumulimburukwa?''