¹ Napenepo, Yahweh adalanga kuna Djochuwa: ² "Langa kuna mbumba yaIziraeli, utchiti: 'Daidzani maluwani yakuwalira kuti Ine ndidakubvunzani napakati paMozisi. ³ Itani izvi kuitira kuti mubodzi angaulaya munhu mubodzi nakumanikidziwa akwanise kwenda kweneko. Maluwani eneya yanadzagala mbuto yakuwalira sososo kuna weneule kuti anaswaga kugulunga gazi nathangwe lamunhu kuti aulayiwa. ⁴ Weneule kuti aulaya anadzafira libodzi latche maluwaniya, anadzagala pakupinda napo pamusuwo futi anadzapanganidza mulandu watche kuna wanyantsembe waluwani linero. Napenepo, iwo wanadzamutola kwendanaye mukati mwaluwani ese wanadzamupasa mbuto ibodzi kuti alalame pakati paiwo. ⁵ Ese, kana unango atchiuya kaezera kugulunga gazi laweneule kuti aulaiwa, wanhu wamuluwani hawadzamupereki weneule kuti aulaya. Iwo awadzamubvunzi, thangwe aulaya nyauyatche hasikuda ese hakhalibe tchizondi na iye kumasureku. ⁶ Muulayi anadikana kulambirira muluwani linero kuswikira kuti awoneka pamberii pagungano kuti atongiwe, ese panepo analambirira kuswikira afa mukulu wanyantsembe kuti alikutonga ntsiku zenezo. Napenepo, weneule kuti, aita chumacho, aulaya nyauyatche anadzahirira kuluwani latche tchairo futi pamui watche, kuluwani latche adawala"'. ⁷ Napenepo, waiziraeli wadadaidza Kedesi, kuGalilea, ku mutunhu wamabango yaNaftali; Sikemi, kumutunhu wamabango yaEfraimi; na Keriate-Arba (kuti ndi Hebromi), kumutunhu wamabango yaDjuda. ⁸ Kunza kwaDjorodani, kumabudira dzuwa kwa Djeriko, wadadaidza Bezeri, murusere lanhunda yamutupo waRubeni, Ramote, kuGileade, wamutupo waGade; naGolani, ku Basani, wamutupo waManase. ⁹ Aya ndiyo maluwani yadadaidziwa kuna yentse mbumba iya iziraeli ese nakuna wanyakuuya kuti walikulalama pakati paiwo, wanakwanisa kuwala kwenda kuna iyo, kuitira kuti weneule anaulaya nyauyatche, nkhabe mulandu, nakwanise kuwala kuna iro, atchiswaga kukhotchererha. Wenei hadzafi naboko laweneule kuti anada kugulunga gazi laweneule kuti afa, nkhabe kuuya kapangiziwa gungano kuti atongiwe.