¹ I Saulusan satuju mangana'i kamateana. Mamin aso inanna ambata jemaat jo Yerusaleman iria-ria'an; dabarikan ambat tuu parasaya'an tararan-raran saraa-raa banua Yudea nana Samariaan, ara rasulan arantang bo. ² Ara tuu yang parasaya'an manguburang jo i Stefanusan nana manaisiin jooan. ³ Tapi i Saulusan mamborang jemaat; mintamai tuu saraa-raa langko barik manarik maruan baba bibinge, dabarikan ari naan dapintama jo lalam penjaraan. ⁴ Mamin naan ara yang tararan-raranan naan tangkat mandongoang firman. ⁵ Mamin naan i Filipusan tangkat jo kota yang injenan jo Samariaan to' mandongoang Kristus jo ari naan. ⁶ Injene unsa' mintuari yang mandalingaan nana mitaan tanda-tanda yang dakarajaan kole' i Filipus, mamarati aika yang dapadangan kole'a. ⁷ Sebab dari ambat tuu yang manarima' Firmanan naan, maruan ambat sumangat baraatan nana dookka; ambat busi tuu injuun pande lamba' nana tuu ajengkangan dapamaman. ⁸ Katenanna ambat tuu susu'un nyawa'an jo lalam kota nande'. ⁹ Tapi jo kotaan naan injene sera mintuari yang asonan i Simon, alunna malakon makoang patauanga; maniang tuu jo Samariaan tangkarado'an, Padang kalea boan tuu sambarang. ¹⁰ Samua tuu jo Samariaan, dari yang baike'en mondok jo yang araa'an, mamarati jooan, barik ari naan bada, " Tuu'un niin Kuasa Alatala yang ipadang araa'an." ¹¹ Ari naan manantalinga jooan, kole' dari joloon kasak maniang tuu tangkarado'an nana patoangaan de' naan. ¹² Barikan maminanna ari naan parasaya' aika yang mamin dadongoangan kole' i Filipus mangana'i Kerajaan Alatala nana mangana'i asona Yesus Kristus, ari naan i pamandi', mam baba mam bibinge. ¹³ Diri'a i Simonan jaji parasaya' busi; mamin ipamandi', iyaan simalo'-malo' nana i Filipus, barik mamin dakita tanda-tanda nana jau dakarajaan, iyaan nyan. ¹⁴ Mamin ara rasul jo Yerusaleman mandalinga bahawa urang Samariaan mamina manarima Firman Alatala, ari naan mutus jo i petrusan nana i Yohanes jo ara iraan. ¹⁵ Mondok injene, i Petrusan nana i Yohanes mandoang jo ari naan, manto' dapata manarima Roh Kudus. ¹⁶ Karena sampai saat inaan, anjaupi tuu damandoi Roh Kudus; kole' ambatapi ipamandi' jo lalam asona Tuhan Yesusan. ¹⁷ Barikan i Petrusan nana Yohanes manjejenang tangana iboa ari naan, baru'na ari naan manarima' Roh Kudus. ¹⁸ Dakita'a kole' i Simon bahawa Roh Kudusan dapat ipandeang malaloi panumpangan tangana ara rasulan, iaan manandeang duit jo i Petrusan nana Yohanes. ¹⁹ Lo'a," Meangak kuasa katenan busi, manto' tiap kutumpangan tangan ku'un jo tuu'un ari naan manarima' Roh Kudus." ²⁰ Tapi i Petrusan bada joan," Alo'ana duit nuun anyap nana diri'nu, kole' muna' pikirannu dapatko mambali karunia Alatala nana duitan. ²¹ Injuko muna' tawa' jo pakara iniin, kole' atenun injua mam jo aroa Alatala. ²² Kole' katenanin batobat nain dari raata ate nin, badoa nain jo Tuhanan, manto' ambat niat jo ate nun dampuni kole'a. ²³ kole' kukitanin jo lalam rasun apaitan nana jo lalam lantat dosaan." ²⁴ I Simonan manyuut loa," Doangak jo Tuhanan, manto' aika yang ipadangan ingko inju malo'i joku'un. ²⁵ Mamin i Petrusan nana Yohanes basaksi nana mandongoang Firman Tuhan, ari naan mole' jo Yerusaleman; jo sapanjang dalanan, ari naan mandongoang Injil saraa-raa desa urang Samaria. ²⁶ Mamin naan sera malaikat Tuhanan bada jo i Filipusan kalo'a," Sadingao tangkat nao barik katin jo Selatanan yang manujuun dari Yerusalem jo Gazaan"(Dalanan niin injene jo padang gurunan.) ²⁷ Barik iaan kadeng laloang tangkat. Belena, injene sera baba urang Etiopia, iaan de'naan kasim'a pambesar Kandake, ratu urang Etiopia. Iaan nanna yang batanggungjawapan jo ambat kamusanan. Iaan mondok jo Yerusaleman to' sambayang. ²⁸ Jo lalam keretaan waktu lamba' to' mole'an, iaan tanga mambasa kitab nabi Yesaya. ²⁹ Mamin naan bada Roh'an jo i Filipusan," Tangkatnao lamba'nao biringa keretaan nan." ³⁰ Dabarik i Filipusan laloang lamba'ana, barik dadalinga tuu'un nan tanga' mambasa kitab nabi Yesaya, barik iaan bada" Matoang bao akade' ratia aika yang tanga' ibasaan ingko?" ³¹ Urang Etiopian naan bada,"Lo'aika ak to' matoangan, anjauun tuu parajani ja ku'un? Mamin katenaan i Filipusan dapita manik jo lalam keretaan duduk simalo' nanna. ³² Ayat yanga tanga' dabasaan kole' urang Etiopiaan de'naan kateniin,"kate singko' dombaan iaan ibibit jo koson panyembelianan; barik kate anak domba yang abisuun jo ijoloa tuu to' manggunting buluan, Iaan amo' manga' baba'a. ³³ Jo lalam ma'manse'an adelan ijoloi joan. Tika yang dapatan manunnutun kanturunana? Kole' iala'a nyawa'an dari bumiin. ³⁴ Barik urang Kasiman naan mananya' jo i Filipusan, lo'a,"Iakan to' mananya'ak joonuun, mangana'i tika dapadangan kole' nabiin naan? mangana'i diri'a kadiri' atau mangana'i tuu boan? ³⁵ Dabarikan bada i Filipusan; damulai dari kutipan firman jo tulisan lalam kitab Yesayaan yang mandongoangan jo Yesusan. ³⁶ Jo dalanan, sidua' nana koson yang muna' ae'en; barik Kasiman naan bada, "Belena, muna' ae' indi'e; injen aka yang marintangin joku'un to' ipamandi'?" ³⁷ (Salinan tuu joloon isabeang Kis. 8:37, Bada i Filipusan, " Anti'ko parasaya' nana sapano' atenu, pandeko ipamandi'." Urang Etiopiannan manyuut, "Parasaya'ak bahawa Yesus Kristusan naan Anak Alatala.") ³⁸ Dabarikan urang Etiopiaan naan paranti kereta'a. Mamin naan mando jo lalam ae'en, i Filipus nana Kasiman de'naan, mamin katenan dapamandi' kole' i Filipus. ³⁹ Mamin poang maruan dari ae'en; i Filipusan darariang kole' Roh Alatala, laloang injuana dakita kole' Kasiman naan, barik iaan lamba'bo nana susua nyawa'an. ⁴⁰ Tapi i Filipusan ikita jo Asdodtan dalaloia poang banuaan naan, barik iaan mandongoang Injil jo saraa-raa kota mondok jo Kaisareaan.