¹ Joloon jo Kaisarea, injen yang iasonan Kornelius, bapangkat perwira jo bala tantara Italia. ² Iaan na salalaman langkoa bayok sambayang; lagipun arengen tangannan manulung jo tuun yang paralun. ³ Andanpamalam minso jo jam samilan aso-inaan, mita Malaekat, Alatala mondok nana kada'a joan, " Kornelius!" ⁴ Kornelius ingka! Sambil mambele lindo' Malaekat iaan bada, " Ijen aika ninde tuan?" Malaekatanpun manyuut joan, " Sombangngu na pamindaranu jo tu mamanseen datarimana kole'a Alatala. ⁵ Kate'ni'in suro'na tu'un lamba jo Yope, awana yang ason i-Simon-nan yang iasonan busi Petrus. ⁶ Iaan salalaman langko nana tu panyamak kulit yang iasonan i-Simon langkoan jo biring laut-tan. ⁷ Anyapanna de'naan tangkat Malaekatan, Korneliusanpun malong jo ulunn nan, na sera bala tantara-a yang parasayaan busi jo Alatala. ⁸ Mamin-naan datutun kausana kole'a Kornelius jo arinaan aika samua yang mamin dalamin, mamindaripadanaan iaan mayuro lamba jo Yope. ⁹ Imber asoan ilalama palamba'annan to minso'na jo biring kotaan, I-Petrus-san manik jo tudungan untuk manyombaang. ¹⁰ minso jo jam anam-man tarasa arapan dan to mangkaan jau yang pandeen ikaan, patangaan to pasadia kaan malam, iaan mita jalu, ¹¹ Sarata darayang mata'an maruan dakita kole'a suannan tabuka , injen kate kaen yang ara'an tauran mando jo tana'an. ¹² Jo tauranna kaenan talola busi masam-masam inatang kai ampat, yang melettan jo tana'an, katenan busi kate ta burungan jo suan-nan. ¹³ Mamin i-naan dadalinga kole'a injen tu bada joan: ¹⁴ Sadingao, Petrus, saatna inatangan naan maminnaan kanna." Petrus-sanpun bada, inju kate'naan, iakkan injuak kala' mangkan jalu akotor na jalu baraattan. ¹⁵ ''Dadalingpilagi aling tuun-naan kaduangkaliaan: ¹⁶ " Aika yang mamin dabarakati kole'a Alatala, daina padang baraat." Jaluun-niin sampai tarajadi katalungkalia; mamin denaan kaen yang tauranan ¹⁷ Manduang lagi katonongngana i-Petrus-san mamikirang aika rati yang dakitaan kole'a de'angan, belena, tu yang dautusan kole' Kornelius kadengnga idapan katombangan raa, setelah mamin datanya'ang dari deka dalan intamaan, ¹⁸ Ari'naan malong jo tu'un sambil mananya inanna akade i-Simon yang iasonan i-Petrus lalako injene. ¹⁹ Patangngaan i-Petrusan mamkirang aika yang dakitaan, sumangat yang bailang-ilangnganpun bada jo'an, " Belena, ara talu muntuariin-naan manyari jo'nuun. ²⁰ Sadingngao, mandonao, tangkatnao na arinaan. Dainao kalangganan tangkatnain sarata, iaknga yang mutussan jo arinaan. ²¹ Mamin dari pada inaan Petrus-san mando sidua na arinaan nana kada'a, " Iaknga yang i-sariin ingkin. Aika pamondokngin-nan?". ²² Arinaan bada, " Korneliusan tu bapangkat, tu yang maam, parasaya jo Alatala, lagipun basamam, dakilala kole' samua tu dari bansa Yahudi, dabaritaang kole'a Alatala yang boreseen mamita jonin-nan untuk mondok jo langkoan, supaya dapatkin manantalinga barita yang dawaan." ²³ Mamin naan arinaanpun dawa intama sararak dan dasuro samalam kole'a i-Petrus. Imber asoan iaan sading lalong tangkat sama-sama na arinaan, injenbusi saurun-saurun dari Yope yang tambaan. ²⁴ Kate aso minaan, arinaan tangkat jo Kaisarea. Korneliusan na gulungan minso'a, menang-enangina jo arinaan. ²⁵ Pas intama i-Petrus-san, dasambut kole'a Kornelius sambil malingkutut jo kaian I-Petrusan ammo kalakon yang kate'naan sambil bada, ²⁶ " Kadengngao! Iakanpun muntuariak." ²⁷ Manduang bada'a i-Petrus-san joan, iaan intama, dabele kole'a tuun sikapulung mansen nana. ²⁸ Iaan bada jo arinaan, " I-kataoang aka ingkin urang Yahudin-nan injupande siparamennan nana tu boannan. Katebo kada'a Alatala jo ku'un ingkiin injuki pande mangutuki na paratrat tu'un. ²⁹ " Inan-na de pamondok-ku'un niin iakkan injuak manyalia waktu dautusku'un. Jaji, batanyaak jo nin nan aika ratian ingkinan dautuskin untukku." ³⁰ Kornelius bada, " ampat aso yang lalon jo jam yang samaan, iakan patangngaan manyombaangku jo andanpamalaman, kukita injen baba kadeng idapanku'un makai baju basinar-sinar. Iaan bada, ³¹ "Kornelius, manyombangngun dadalingana kole'a Alatala, basamammun jo tu yang injuun muna aika-aika manyo dateatebao kole'a Alatala. ³² Jaji suro'na sera muntuari lamba jo Yope, pasidua'anga nana i-Simon jo biring lautan." Buanuna mo'bo dapataoangi kole'a. Jaji kusuro' lambabo mo' tu'un nan jonuun. ³³ Susu nyawakuun ingkoon mondokkanko. Kate'niin ingkam man injen kausnamma indi'e siaroan na Alatala, untuk manantalingnga aika yang dasuro'angngan kole'a Alatala untuk ipadampeang." ³⁴ Mamin-naan i-Petrus-san mambe' baba'a lalong bada, "Kadajajikupoangnga Alatala inju barat jo intika-tika. ³⁵ Kate'nanbusi jo samua bansa intikapun yang sambayangan, mam kalakon-nan pasti datarima Kole'a. ³⁶ Ikataoang ingkin baritaan, tu yang dautusan jo bansa Israel-lan, padampeang pasan tio sule-ulekin malaloi Yesus Kristus, yang iasonan Alatala iboa samua'a. ³⁷ ingkin kadiripun mataoangkin jalu yang tarjadi jo Yudea, imulai dari Galilea, salapas Yohanes-san mamin iparamandi'i; ³⁸ Kajadianan-naan injen sangkutanna nana Yesus urang Nazareth, Katebo Alatala mamin mambarakati joaan nana Sumangat yang boreseen nana kakuasaanna. Iaan tangkat untuk parabuatan mam dan mamole'i samua tu yang dakuru-karu setan-nan, inanpun dapat dalakukan kole'a Alatalaan nan manyaratai joaan. ³⁹ Ingkamman niinna saksi dari samua yang mamin dakarajaan, mam jo banua urang Yahudi nana Yerusalem. Arinaan muno manggantung joaan jo kayu salibpan, ⁴⁰ mamin naan Alatala matio balik joaan, jo aso kataluaan barikan iaan dakilala kole'a tu'un. ⁴¹ Inju poang jo samua muntuariin, jo saksi yang mamin daile'i sabalumman kole'a Alatala kole'nam, katenanbusi jo yang tu mamin mangkan sama-samaan nana. ⁴² Ian mamarintah joan untuk padampeang dongo jo tu ambattan, iniin'na muntuari yang daile'in kole'a Alatala, yang madilin dari tu yang lagi tio'on sampai tu yang mateen. ⁴³ Nabi ini'na yang basaksi jo tu ambattan, mamin-naan tika yang parasayaan Jo Alatalaan akan dampuni samua doaan malaloi asonna." ⁴⁴ Patanga'a bada'a i-Petrus-san manganai hal inaan, sumangat yang boresenpun mintama lalama jo samua tu ambattan yang mandalinga dongoon. ⁴⁵ Samua kalompok tu yang parasayaan, yang basunatan mondok nana i-Petrus jaji taranyan, kole'a sumangat yang boresen dapandeang jo tu'un yang boanan bansa Yahudi. ⁴⁶ Ara ira mandalinga tu yang boanan Yahudi sipadaan nana kada kadiri'a na mamudi-mudia jo Alatala. Dabarikan i-Petrus-san manjawab, ⁴⁷ Pade akade i-paboanang ae'en ni'in dari muntuari yang injupi iparamandi'i, Katebo ingki Tu'un nin busi maminna manarima sumangat yang boresen. ⁴⁸ Mamin naan iaan manyuro jo ara iraan iparamandi'i ilalamma ason na Yesus Kristus. Ara iraan mamita manyuro samalam jo I-Petrus-san salama unsa-unsa aso.