¹ Kwatsi Jesu nehla entsabeni, waladzelwa ticumbi letinyenti tebantfu. ² Kwase kufika umuntfu labenebulephelo, wakhuleka kuye watsi, "Nkhosi, nawutsandza, ungangihlambulula." ³ Jesu welula sandla, wamtsintsa watsi, "Ngiyatsandza. Hlambuluka." Nembala wahlambuluka masinyane ebulephelweni bakhe. ⁴ Jesu watsi kuye, ungatjeli muntfu, kodvwa hamba uye kumphristi akubone, bese wenta umnikelo wekubonga lowamiswa nguMosi, ukhombise nebantfu kutsi sewuhlantekile." ⁵ Kwatsi asangena eKhaphenawume, wahlangabetwa yindvuna yelikhulu lemasotja, yamncenga ⁶ yatsi, ''Nkhosi, sisebenti sami silele phansi endlini, sife luhlangotsi, sisebuhlungwini lobukhulu." ⁷ Jesu watsi kuyo, "Ngiyeta, mine ngitamphilisa." ⁸ Lendvuna yaphendvula yatsi, ''Nkhosi, angikafanelwa nekutsi ungene ngaphansi kweluphahla lwendlu yami, kepha shano livi nje, khona sisebenti sami sitawuphila. ⁹ Nami nginetiphatsimandla letingetulu kwami, nginemasotja langaphansi kwami. ngitsi kulelinye, "Hamba,'' lihambe, ngitsi kulelinye, "wota la," lite, nencekwini yami ngitsi, ''yenta loku," ikwente." ¹⁰ Jesu makeva loko, wamangala, watsi kulaba bebamulandzela, ngicinisile, ngitsi kini, Ngisho naka Israyeli angizange sengikutfole kukholwa lokunje. ¹¹ Ngitsi kini, labanyenti bayawuchamuka emphumalanga nasenshonalanga, bahlale etafuleni kanye naAbrahama, naIsaka, naJakobe embusweni welizulu. ¹² Kodvwa emadvodzana embuso ayawukhishelwa ebumnyameni bangaphandle, lapho kuyawuba khona kukhala nekugedletela kwematinyo. ¹³ Jesu watsi endvuneni, "Hamba, akwenteke kuwe njengekukholwa kwakho." Lesisebenti sasindza ngaleso sikhatsi. ¹⁴ Jesu wase ungenisa ekhaya laPhetro, lapho wefika wakhandza unina tala waPhetro alele embhedzeni, aphetfwe ngumkhuhlane. ¹⁵ Jesu watsintsa sandla sakhe umkhuhlane wamyekela. wasukuma wamlungisela kudla. ¹⁶ Kwatsi nasekuhlwa, baletsa kuye labanyenti lababenemadimoni, wabakhipha bonkhe bomoya lababi ngelivi nje, waphilisa bonkhe labebagula. ¹⁷ Kuze kugcwaliseke loko lokwakhulunywa ngumphrofethi Isaya nakatsi, ''Wasetfwalela butsakatsaka betfu, watisusa kitsi tifo tetfu.'' ¹⁸ Jesu watsi nakabona sicumbi simkakile, wase utsi akwewelelwe ngesheya kwelwandle. ¹⁹ Kwase kufika sati semtsetfo satsi, Mfundisi, ngitakulandzela, ngisho nome uyaphi." ²⁰ Jesu wamphendvula watsi, Timphungutja tinemigodzi, netinyoni tinetidleke, kodvwa iNdvodzana yeMuntfu ite indzawo yekulala iphumule." ²¹ Lomunye webafundzi bakhe watsi kuye, ''Nkhosi, asewungivumele kucala sengiyewungcwaba babe'' ²² Kepha Jesu watsi kuye, ngilandzele, uyekele labafile, bangcwabe labafile babo." ²³ Kwatsi Jesu nakangena esikebheni, bafundzi bakhe bamlandzela. ²⁴ Kwase kuvuka sivunguvungu selwandle lesikhulu, sikebhe sadzimate sagutjetelwa ngemagagasi, kepha Jesu abelele. ²⁵ Bafundzi baya kuye bayamvusa batsi, "Nkhosi, sisindzise sesiyafa! ²⁶ Jesu watsi kubo, "Nesabani, nine bekukholwa lokuncane?" wasukuma wasekhuta lesivunguvungu kanye nelwandle, kwase kuba khona kuthula lokukhulu. ²⁷ Bantfu bamangala, badzimate batsi, "'Kantsi muntfu muni lona, imimoya nelwandle kuyamlalela?" ²⁸ Kwatsi Jesu nasafikile ngesheya, eveni lemaGadara, wahlangabetwa bantfu lababili lababenemadimoni, baphuma emathuneni. Babeyingoti lenkhulu kangangekutsi kwakungasahambi muntfu ngaleyo ndlela. ²⁹ Bamemeta batsi, "Sinamsebenti muni nawe, Ndvodzana yaNkulunkulu? Sewute kutosivisa buhlungu yini sikhatsi sisengakafiki?" ³⁰ Madvutane nalapho kwakudla umhlambi lomkhulu wetingulube. ³¹ Emadimoni ancenga Jesu atsi, "Nawusikhipha la, sitfumele singene kunangu umhlambi wetingulube." ³² Jesu watsi kuwo, "Hambani!" Ngako aphuma angena etihontjini, wonkhe lowo mhlambi wagijima wewusa sihosha, wangena elwandle, wacwila wafa. ³³ Lamadvodza abelusile abaleka aya edolobheni, afike abalandzisa yonkhe indzaba, nekutsi kwentekani kulamadvodza lamabili labenemadimoni. ³⁴ Ngako ke wonkhe umuntfu kulelo dolobha waphuma wayawuhlangabeta Jesu, batsi kube bambone, bamncenga batsi akesuke kulelo live labo.