¹ ''Ungehluleli labanye, kute nawe ungetewuhlulelwa nguNkulunkulu. ² Ngobe ngaloko kwehlulela lenehlulela ngako labanye, nani niyakwehlulelwa ngako, nangaleso silinganiso lenitilinganisa ngaso, nani niyakulinganiswa ngaso. ³ Pho, ulunakeni lutsi lolusesweni lwemzalwane wakho, kodvwa ube ungalunaki lolugodvo lolusesweni lakho? ⁴ Nome ke ungasho kanjani kumzalwane wakho utsi, asengikukhiphe nalu lutsi lolusesweni lakho, ibe kantsi kuvundle lugodvo esweni lakho? ⁵ Mtentisi, cala kucala ukhiphe lugodvo lolusesweni lwakho, emvakwaloko ke utakubonisisa kahle kutsi ukhiphe lutsi lolusesweni lwemzalwane wakho. ⁶ Ningatiniki tinja lokungcwele, ningawalahli ematje enu etihontjini laligugu, funa tiwagcobagcobe ngetinselo tato, bese tigucukela kini tiyanidzabudzabula. ⁷ "Celani, nitawuphiwa, funani, nitawutfola, nconcotsani, nitawuvulelwa. ⁸ Ngobe wonkhe locelako uyakuphiwa, nalofunako uyawutfola, nalonconcotsako uyavulelwa. ⁹ Ngubani emkhatsini wenu lekungatsi umsa wakhe nakacela sinkhwa, yena amnike litje? ¹⁰ Nome acele inhlanti, yena amnike inyoka? ¹¹ Nangabe ke nine lenibabi kangaka nikwati kubapha bantfwabenu tipho letinhle, kakhulu kanganani ke uYihlo losezulwini utakubapha lokuhle labacelako kuye. ¹² Ngako ke konkhe lenifisa kutsi bantfu bakwente kini, kwenteni nani kubo, ngobe ngulowo umgogodla wemtsetfo newemfundziso yebaphrofethi, ¹³ "Ngenani ngelisango lelincane, ngobe lisango libanti nendlela ibanti leyisa ekubhujisweni, banyenti labangena ngalo. ¹⁴ Kepha lisango lincane nendlela yincane leyisa ekuphileni, nebantfu labayitfolako bambalwa.'' ¹⁵ ''Caphelani baphrofethi bemanga, labeta kini banjengetimvu ngaphandle, kodvwa ngekhatsi banjengetimphisi letibukhali. ¹⁶ Niyawubati ngemisebenti yabo, njengetihlahla tatiwa ngetitselo tato. Emagelebisi angakhiwa yini etihlahleni temanyeva, noma emakhiwa elugaganeni? ¹⁷ Sihlahla lesimnandzi sitsela titselo letimnandzi, kantsi sihlahla lesibi sitsela titselo letimbi. ¹⁸ Sihlahla lesimnandzi singeke sitsele titselo letimbi, kanjalo futsi nesihlahla lesibi singeke sitsele titselo letimnandzi. ¹⁹ Sonkhe sihlahla lesingatseli titselo letimnandzi siyajutjwa, silahlwe emlilweni. ²⁰ Ngako ke baphrofethi mbumbulu niyawubati ngetitselo tabo. ²¹ Akusibobonkhe labatsi kimi 'Nkhosi Nkhosi' labayawungena embusweni welizulu, kodvwa ngulabo labenta intsandvo yaBabe losezulwini. ²² Ngalelo langa labanyenti bayawutsi kimi 'Nkhosi Nkhosi, asizange yini siphrofethe ngelibito lakho? asiwakhiphanga yini emadimoni ngelibito lakho?Asiyentanga yini imisebenti leminyenti nalemikhulu ngelibito lakho?' ²³ Ngitobese ngiyawuphendvula ngitsi, ''Angizange senginati! Sukani kimi, nine benti balokubi' ²⁴ ''Ngako ke wonkhe lova lamavi ami awente, ufanana nendvodzana lehlakaniphile, leyakha indlu yayo etikwelidvwala. ²⁵ Kwase kuna imvula, imifula yagcwala, nemimoya yahhusha, yetama kuyiphephula lendlu, kodvwa ayizange iwe, ngobe yayakhelwe esisekelweni lesasilidvwala. ²⁶ Kodvwa loyo lova lamavi ami angawenti, ufanana nendvodza lesilima, leyakha indlu yayo esihlabatsini. ²⁷ Kwase kuna imvula, imifula yagcwala, nemimoya yahhusha yayiphephula lendlu, yaze yawa. Maye! kwaba kukhulu loko kuwa kwayo.'' ²⁸ Kwatsi Jesu nacedza lenkhulumo yakhe, ticumbi tebantfu tase timangele ngalemfundziso yakhe, ²⁹ ngobe abebafundzisa njengemuntfu lonemandla, hhayi njengetati tabo temtsetfo.